ءماجىلىس دەپۋتاتى: ءبىزدىڭ شارۋالار مال تەرىسىن لاقتىرىپ، قوسىمشا تابىسىنان ايىرىلىپ وتىر
ءماجىلىس دەپۋتاتى يۋريي جۋلين ۇكىمەت باسشىسىنىڭ ءبىرىنشى ورىنباسارى رومان سكلياردىڭ اتىنا ساۋال جولدادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وتاندىق مال شارۋاشىلىعىندا جىل سايىن ءارى كەتكەندە شيكى تەرىنىڭ 10-20 پايىزى وتكىزىلەدى. ال ءىرى قارا مالدىڭ وڭدەلمەگەن 2،5-3 ملن تەرىسى دالاعا تاستالىپ، اۋىلداردىڭ شەتتەرىندە ءشىرىپ جاتىر. اشىق مالىمەتتەر بويىنشا، شارۋالاردىڭ شىعىندارى 14 ملرد تەڭگەنى قۇراپ وتىر. سونىمەن قاتار، وسىدان سانيتارلىق-ەپيدەميلوگيالىق پروبلەمالار دا تۋىندايدى. 5-6 جىل بۇرىن اۋىل تۇرعىندارى ەكسپورتتىق تيىمدىلىگى بار بىلعارى شيكىزاتىنان تابىس الاتىن ەدى. الايدا 2016، 2017 جانە 2019 جىلدارى بىلعارى كاسىپورىندارىن قولداۋ ءۇشىن تەرى ەكسپورتىنا شەكتەۋ ەنگىزىلدى»، - دەدى يۋ. جۋلين.
وسى ورايدا ول اتالعان شەكتەۋ ەلەۋلى ناتيجە بەرمەگەنىن، قازىرگى كەزدە كاسىپورىنداردىڭ جۇكتەمەسى دە ءتيىستى دەڭگەيدە ەمەس ەكەنىن اتاپ ءوتتى.
«بۇل تۇرعىدا اتالعان شەكتەۋ مال تەرىسىن دايارلاۋ سالاسىن مۇلدەم قۇلدىراتىپ جىبەردى. تەرىنىڭ تىم كوپ بولۋى شيكىزاتتىڭ باعاسىن ءتۇسىرىپ جىبەردى. كوپ وڭىردە مال تەرىسىن جيناۋ جۇرگىزىلمەيدى، ويتكەنى ءتيىمسىز بولىپ تۇر. بۇل سالا نەگىزىنەن اۋىلداعى شاعىن بيزنەستى وركەندەتۋگە سەپتىگىن تيگىزەر ەدى. ارينە، بىلعارى وڭدەۋ سالاسىن قولداۋ كەرەك، ءبىراق ونى شارۋالاردىڭ ەسەبىنەن ىسكە اسىرماعانى ابزال. الايدا ۇكىمەت شەكتەۋدى الىپ تاستاپ، ونى ەكسپورتتىق باج سالىعىنا اۋىستىردى – تونناسىنا 200 ەۋرو. بۇل تاعى دا فەرمەرلەر ءۇشىن تۇساۋ بولىپ تۇر»، - دەدى دەپۋتات. ونىڭ سوزىنە قاراعاندا، شيكى بىلعارى دايارلاۋ ماسەلەسى اۋىل شارۋاشىلىعى مەن يندۋستريا جانە ينفراقۇرىلىمدىق دامۋ مينيسترلىكتەرىنە قاتىستى. «ناتيجەسىندە، ەلدە شيكىزات كولەمى ارتىپ جاتقانىمەن، كاسىپورىندار لايىقتى دەڭگەيدە جۇكتەلمەگەن، ال بىلعارىنىڭ شەتەلدىك نارىقتارى يگەرىلمەي جاتىر. ءبىزدىڭ كورشىمىز جۇڭگو ەلى تەرىنى اقش پەن اۋستراليادان يمپورتتايدى. ال ءبىزدىڭ شارۋالار مال تەرىسىن لاقتىرىپ، قوسىمشا تابىسىنان ايىرىلىپ وتىر»، - دەدى ول.
وسى ورايدا ول بىلعارى وڭدەۋ باعىتىن اۋىل شارۋاشىلىعى مينيسترلىگىنە عانا بەرۋدى سۇرادى. سونىمەن قاتار وڭدەلمەگەن تەرىگە سالىناتىن ەكسپورتتىق باج سالىعىن الىپ تاستاۋدى ۇسىندى.
«وڭىرلەردە سەرۆيستىك-دايارلاۋ ورىندارىن اشۋ ماسەلەسىن شەشىپ، اۋىل تۇرعىندارىن مالدارىن ەت كومبيناتتارىنا وتكىزۋدى ىنتالاندىرۋ بويىنشا شارالار قابىلداۋ كەرەك. بۇل ءوز كەزەگىندە ساپالى بىلعارى شيكىزاتىن الۋ ءۇشىن تەرىنى كاسىبي دايارلاۋ مەن سۇرىپتاۋ جۇيەسىن قۇرۋعا مۇمكىندىك بەرەدى»، - دەدى يۋريي جۋلين.