«مايقايىڭالتىن» اق اۋماعىنداعى اپاتتى تەرگەۋ جونىندەگى كوميسسيا ناتيجەلەرىن جاريالادى.
ارنايى كوميسسيا 4-24 قاڭتار ارالىعىندا تەرگەۋ جۇرگىزدى. كوميسسيا قۇتقارۋشىلاردىڭ توپتىق قايعىلى جاعدايىنا اكەپ سوقتىرعان وقيعا بويىنشا 7 تۇلعانى جاۋاپتى دەپ تانىپ وتىر، دەپ حابارلايدى Almaty-akshamy.kz
اتالعان كەزەڭ ىشىندە ق ر توتەنشە جاعداي مينيسترلىگى ونەركاسىپتىك قاۋىپسىزدىك كوميتەتى ءتوراعاسىنىڭ ورىنباسارى مۇسا تانابايەۆتىڭ توراعالىعىمەن كوميسسيا مۇشەلەرى جوبالىق قۇجاتتامانى زەردەلەپ، تەرگەۋگە 4 ساراپتامالىق ۇيىمدى، ونىڭ ىشىندە رەسەي فەدەراسياسىنىڭ ساراپشىسىن تارتىپ، التىن ءوندىرۋشى كاسىپورىننىڭ كۋاگەرلەرى مەن لاۋازىمدى تۇلعالارى اراسىندا ساۋالناما جۇرگىزدى. سونىمەن قاتار، كوميسسيا شاحتاعا ءتۇسىپ، وقيعا ورنىن زەرتتەدى.
«جان-جاقتى تەرگەۋ جۇرگىزە وتىرىپ، كوميسسيا تاۋ-كەن ماسساسىنىڭ قۇلاۋى سالدارىنان ورىن العان توپتىق جازاتايىم وقيعانىڭ سەبەپتەرى رەتىندە كەلەسىلەردى اتايدى:
- جۇمىس ءوندىرىسى قاناعاتتانارلىقسىز دەڭگەيدە ۇيىمداستىرىلعان؛
- مايقايىڭالتىن» اق جاۋاپتى تۇلعالارى تاراپىنان تاۋ-كەن جۇمىستارىنىڭ ءقاۋىپسىز جۇرگىزىلۋىنە وندىرىستىك باقىلاۋ ءتيىستى تۇردە جۇزەگە اسىرىلماعان؛
- بلوكتاردى وڭدەۋ كەزىندە قازبالاردىڭ قۇلاۋ پروسەسىن باقىلاۋ تيىسىنشە جۇزەگە اسىرىلماعان دەگەن قورىتىندىعا كەلدى.
سونىمەن قاتار، بۇل بوس ورىندارعا ءتيىستى باقىلاۋ جۇرگىزىلمەگەنى، جوبالىق قۇجاتتاماعا سايكەس ازىرلەنگەن تازارتۋ كەڭىستىگىنىڭ بوس جەرلەردىڭ قۇلاۋ ىقتيمالدىلىعى بار ەكەندىگى نازارعا الىنباعانى انىقتالدى.
وسىنىڭ سالدارىنان كەنەتتەن تاۋ ماسساسى قۇلاپ، جازاتايىم وقيعا ورىن العان.
–تەرگەۋ ناتيجەلەرى بويىنشا كوميسسيا مۇشەلەرى جازاتايىم وقيعانىڭ سەبەپتەرىن جويۋ جونىندەگى ءىس-شارالاردى جانە ولاردىڭ ورىندالۋ مەرزىمدەرىن ايقىندادى. ونىڭ ىشىندە شاحتا ديرەكتورىنىڭ، باس ينجەنەردىڭ، باس ماركشەيدەردىڭ، ۋچاسكەلىك ماركشەيدەرلەردىڭ لاۋازىمدىق نۇسقاۋلىقتارى ونەركاسىپتىك قاۋىپسىزدىك سالاسىنداعى زاڭنامانىڭ تالاپتارىن ەسكەرە وتىرىپ قايتا قارالاتىن بولادى،-دەپ حابارلادى ق ر تجم ونەركاسىپتىك قاۋىپسىزدىك كوميتەتى پاۆلودار وبلىسى بويىنشا دەپارتامەنتىنىڭ باسشىسى دانيار انداسوۆ.
لاۋازىمدى تۇلعانىڭ ايتۋىنشا، بۇدان باسقا، تاۋ-كەن قازبالارىنىڭ ونەركاسىپتىك قاۋىپسىزدىك تالاپتارىنا سايكەستىگىنە ەگجەي-تەگجەيلى تەكسەرۋ جۇرگىزىلەتىن بولادى.
قۇلاۋى مۇمكىن ايماقتاردى جانە قاۋىپسىزدىك نورمالارىن قامتاماسىز ەتۋدى ەسكەرە وتىرىپ، اۆتوكولىك قوزعالىسىنىڭ مارشرۋتتارى دا ازىرلەنەدى.
اپات
كوميسسيا شەشىمى بويىنشا، توپتىق جازاتايىم وقيعانىڭ ورىن الۋىنا كىنالى رەتىندە 7 ادام جاۋاپتى دەپ تانىلىپ وتىر.
ەڭبەك زاڭناماسىنا سايكەس تەرگەۋ ماتەريالدارى قۇقىق قورعاۋ ورگاندارىنا جىبەرىلدى.
اپات بولعان جەردە اۆاريالىق-قۇتقارۋ جۇمىستارى وقيعا بولعان ساتتەن باستاپ دەمالىس كۇندەرىنسىز جۇرگىزىلۋدە. توپىراقتى گەولوگيالىق سكانەرلەۋ جۇمىسى مەرزىمدى ۋاقىتتا جۇرگىزىلۋدە. جۇمىستار وتە قيىن جاعدايلاردا جالعاسىپ جاتىر. تاۋ جىنىستارىنىڭ قۇلاۋ ءقاۋپى جانە پايدا بولعان شۇڭقىردىڭ استىندا بوس كەڭىستىكتەر بار.