مايمىل شەشەگىنىڭ ءورشۋى «پاندەميا» دەپ جاريالاندى

ينفەكسيانى جۇقتىرۋ جاعدايلارى 58 ەلدە انىقتالدى.

دۇنيەجۇزىلىك دەنساۋلىق ساقتاۋ جەلىسى (ددسج) مايمىل شەشەگىن پاندەميا دەپ جاريالادى، دەپ حابارلايدى Almaty-akshamy.kz Covid-19 تارالۋىنا جول بەرمەۋ جونىندەگى ۆاك- عا سىلتەمە جاساپ. 

ددسج ۇيىمىنىڭ سايتىندا ءمالىم ەتىلگەندەي، اتالمىش ۇيىم مايمىل شەشەگىنىڭ ءورشۋىن جاھاندىق ماڭىزى بار توتەنشە جاعداي دەپ تانىدى. قازىرگى ۋاقىتتا ينفەكسيانى جۇقتىرۋ جاعدايلارى 58 ەلدە انىقتالدى، ناۋقاستاردىڭ جالپى سانى 3 400-دەن استى. ينفەكسيانىڭ تارالۋ قارقىنى اپتا سايىن ارتىپ كەلەدى. 

ددسج تەرىس سالداردى ازايتۋ ءۇشىن ۆيرۋس تاراپ جاتقان بارلىق جەردە شۇعىل شارالار قابىلداۋ كەرەكتىگىن اتاپ وتەدى. 

ەسكە سالايىق، بۇعان دەيىن دۇنيەجۇزىلىك دەنساۋلىق ساقتاۋ ۇيىمى 23 ماۋسىمدا مايمىل شەشەگىنىڭ ءورشۋىنىڭ جاھاندىق ءقاۋپىن باعالاۋ ءۇشىن توتەنشە كوميتەت وتىرىسىن شاقىراتىنىن مالىمدەگەن بولاتىن. 

ۇيىمنىڭ باس ديرەكتورى تەدروس ادحانوم گەبرەيەسۋستىڭ ايتۋىنشا، مايمىل شەشەگىنىڭ بۇعان دەيىنگى ءورشۋ جاعدايلارىمەن سالىستىرعاندا، ۆيرۋستىڭ بۇل جولعى نۇسقاسىندا ەرەكشەلىكتەر بار. سول سەبەپتى ۆيرۋسولوگتار بۇعان ءجىتى نازار اۋدارۋى ءتيىس.