الماتىدا 41 جاستاعى ەركەك تۋعان اناسىن پىشاقتاپ ءولتىردى دەگەن كۇدىككە ىلىنگەن ەركەك تۋرالى كورشىلەرى ايتتى، دەپ حابارلايدى اqshamnews.kz كتك-عا سىلتەمە جاساپ.
ولاردىڭ ايتۋىنشا 41 جاستاعى ەر ادام تۋعان اناسىن پىشاقتاپ ولتىرگەننەن كەيىن ءمايىتىن كىلەمگە وراپ، قوقىسقا تاستاعان.
"1988 جىلدان بەرى وسىندا تۇرامىز. وكىنىشتى. ءالى دە سەنە الار ەمەسپىن. ەكى پەرزەنتى بار. ۇلكەنى اننا امەريكادا تۇرادى. كىشىسى، وسى يۆان، 1984 جىلعى، جۇيكە اۋرۋىنا شالدىققان. ۇنەمى اۋرۋحاناعا جاتقىزىپ تۇرادى. اۋرۋى كۇز مەزگىلىندە قوزادى. ۇيىندە ۇنەمى ايقاي-شۋ بولاتىن. ويتكەنى كۇزدە اۋرۋى اسقىنادى. ءتىپتى اۋلادا ويناپ جۇرگەن بالالارعا دەيىن تيىسەتىن"، - دەيدى مارقۇمنىڭ كورشىسى گالينا.
كۇدىكتى بۇعان دەيىن بىرنەشە مارتە تەرەزەدەن دە سەكىرگەن ەكەن. بۇل ۇيدە تەك اناسى ەكەۋى تۇرعان. پاتەردەن قاتتى داۋىس ءجيى ەستىلىپ، تالاي رەت كورشى-قولاڭنىڭ تىنىشىن بۇزعان. ناۋقاس ەش جەردە جۇمىس ىستەمەگەن.
72 جاستاعى قاريانىڭ ولىمىنە قاتىستى قىلمىستىق ءىس قوزعالدى. ال ءقازىر وقيعا بولعان پاتەردىڭ ەسىگى مورلەنگەن.
"41 جاستاعى جەرگىلىكتى تۇرعىن ءوز اناسىن ءولتىرىپ، بۇل دەرەك بويىنشا قىلمىستىق ءىس قوزعالدى. سەزىكتى ءىزىن سۋىتپاي قاماۋعا الىندى. وقيعانىڭ باسقا دا ءمان-جايى انىقتالۋدا. الدىن الا بولجام بويىنشا، سەزىكتى جۇيكە اۋرۋىنا شالدىعىپ، ەسەپتە تۇرعان. سوت شەشىمى بويىنشا ۇكىممەن سوتتالادى"، - دەيدى الماتى قالاسى پد رەسمي وكىلى سالتانات ازىربەك.