يتاليادا اباي قۇنانباي ۇلىنىڭ ەسكەرتكىشى اشىلدى

ريمدەگى ۆيللا گراسيولي ساياباعىندا (Parco di Villa Grazioli) قازاق حالقىنىڭ ۇلى اقىنى ءارى ويشىلى اباي قۇنانباي ۇلى ءبيۋستىنىڭ سالتاناتتى اشىلۋى ءوتتى، - دەپ حابارلايدى aqshamnews.kz ءتىلشىسى. 

ءىس-شاراعا ق ر مادەنيەت جانە اقپارات ءمينيسترى ايدا بالايەۆا، قازاقستان رەسپۋبليكاسىنىڭ يتاليا رەسپۋبليكاسىنداعى توتەنشە جانە وكىلەتتى ەلشىسى ەربولات سەمبايەۆ، يتاليالىق زيالى قاۋىم وكىلدەرى مەن قازاقستاننىڭ رەسمي دەلەگاسياسى مۇشەلەرى قاتىستى.

مينيستر سالتاناتتى ءىس-شارادا سويلەگەن سوزىندە اباي قۇنانباي ۇلى – قازاق حالقىنىڭ رۋحاني كەمەلدەنۋىنە باعدار بولعان، ادامزاتتىڭ اسىل مۇراتتارىن ناسيحاتتاعان ۇلى تۇلعا ەكەنىن اتاپ ءوتتى. ونىڭ شىعارمالارىنداعى باستى يدەيا – ادامگەرشىلىك، ادىلدىك، ءبىلىم مەن ەڭبەك ارقىلى ىزگىلىككە ۇندەۋ. سوندىقتان دا اباي بەينەسىنىڭ ءدال ريم قالاسىندا بوي كوتەرۋى – مادەنيەتتەر مەن وركەنيەتتەر اراسىنداعى رۋحاني كوپىردىڭ بەلگىسى بولارى انىق.

"كەيىنگى جىلدارى مەملەكەتتەرىمىز اراسىنداعى قارىم-قاتىناس ەرەكشە سەرپىن الدى. وتكەن جىلى قازاقستان رەسپۋبليكاسىنىڭ پرەزيدەنتىنىڭ يتالياعا رەسمي ساپارى مەن يتاليا مينيسترلەر كەڭەسىنىڭ ءتورايىمى قازاقستانعا جاساعان رەسمي ساپارى ىنتىماقتاستىقتى جاڭا دەڭگەيگە كوتەردى. ال قىركۇيەك ايىندا يتاليا پرەزيدەنتى قازاقستانعا كەلىپ، جاڭا بايلانىستارعا جول اشىپ، ءبىرقاتار ماڭىزدى كەلىسسوزدەر جاسالدى. بۇگىنگى اباي ەسكەرتكىشىنىڭ اشىلۋى – سول كەلىسىمدەردىڭ كورىنىسى، ەكى حالىق اراسىنداعى دوستىق پەن ءوزارا قۇرمەتتىڭ بەلگىسى دەپ بىلەمىن"، – دەدى ايدا بالايەۆا.

ايتا كەتسەك، قازاقتىڭ ۇلى اقىنى ابايدىڭ ەسىمى شەتەلدە زور قۇرمەتكە يە. اقىنعا ارنالعان ەسكەرتكىشتەر، بيۋستەر مەن مونۋمەنتتەر الەمنىڭ كوپتەگەن ءىرى قالالارى مەن استانالارىندا ورناتىلعان. ولاردىڭ قاتارىندا، تاشكەنت، ماسكەۋ، قازان، بىشكەك، بەيجىڭ، كاير، بۋداپەشت، تەگەران، انكارا، ىستامبۇل، نيۋ-دەلي، جەنيەۆا، پاريج، رەنن، سارايەۆو، تبيليسي، بەرلين، سەۋل، حاركوۆ، باكۋ جانە ريو-دە-جانەيرو قالالارى بار.