ارداگەرگە وركەسترمەن ەرەكشە قۇرمەت كورسەتتى
الماتى قالاسى قازاقستان حالقى اسسامبلەياسى ۇلى جەڭىستىڭ 80 جىلدىعىنا وراي 99 جاستاعى ۇلى وتان سوعىسىنىڭ ارداگەرى اناتوليي پوپوۆتى ارنايى بارىپ قۇتتىقتادى.
اشىق اسپان استىندا وتكەن سالتاناتتى ءىس-شارادا ق ر ۇقك شەكارا قىزمەتى الماتى شەكارا اكادەمياسىنىڭ ۇرمەلى اسپاپتار وركەسترى جەڭىس كۇنىنە ارنالعان مۋزىكالىق كومپوزيسيالار ورىندادى.
مادەني شارانى قازاقستان حالقى اسسامبلەياسىنىڭ 30 جىلدىعى اياسىندا الماتى قالاسى قحا اقساقالدار كەڭەسى مەن «جومارت جان» ورتالىعى ۇيىمداستىردى.
ارداگەرگە قۇرمەت كورسەتۋ راسىمىنە قحا اقساقالدار كەڭەسىنىڭ ءتوراعاسى بولات وسپانوۆ، ۇيعىر ەتنومادەني ورتالىعىنىڭ ءتوراعاسى، قحا كەڭەسىنىڭ مۇشەسى ابدۋحاليل دولكۋنتاي، سونداي-اق ارداگەردىڭ بالالارى، نەمەرەلەرى مەن شوبەرەلەرى قاتىستى.
كوپقاباتتى ءۇي اۋلاسىندا وتكەن شارانى كورشىلەرى بالكونداردان باقىلاپ، قول سوعىپ، شىن جۇرەكتەن العىس ءبىلدىردى. اناتوليي پوپوۆقا گۇل شوقتارى مەن سىي-سياپاتتار تابىستالدى.
اناتوليي پوپوۆ 1926 جىلى 13 قاڭتاردا قاسكەلەڭ قالاسىندا دۇنيەگە كەلگەن. 1943 جىلى اسكەري بايلانىسشى بولىپ 2-پريبالتيكا مايدانىنا جىبەرىلەدى. ريگانى ازات ەتۋ وپەراسياسىنا قاتىسىپ، «ريگانى ازات ەتكەنى ءۇشىن»، «گەرمانيانى جەڭگەنى ءۇشىن» مەدالدارىمەن ماراپاتتالعان. سوعىستان سوڭ ساراتوۆ اسكەري-مەديسينالىق ۋچيليششەسىن ءتامامداپ، گەرمانيادا بەس جىل فەلدشەر قىزمەتىن اتقارعان. كەيىن الماتىداعى سانيتارلىق-ەپيدەميولوگيالىق قىزمەتتە 30 جىلدان اسا ەڭبەك ەتتى. ەكى قىز ءوسىرىپ، بۇگىندە 4 نەمەرە مەن 6 شوبەرەنىڭ ارداقتى اتاسى.
تاقىرىپقا وراي:
ابدۋحاليل دولكۋنتاي، «جومارت جان» ورتالىعىنىڭ جەتەكشىسى:
«ارداگەرلەرگە تاعزىم – ءبىزدىڭ ازاماتتىق بورىشىمىز. اناتوليي نازار ۇلى سەكىلدى اتالارىمىزدىڭ ارقاسىندا بۇگىن بەيبىت ءومىر ءسۇرىپ وتىرمىز. قان كەشىپ كەلگەن سول بۋىننىڭ ەرلىگى – جاستارعا ۇلگى. ءبىز ارداگەرلەرىمىزدى ۇمىتپاۋعا، قادىرلەۋگە مىندەتتىمىز. قازاقستانىمىز امان، ەلىمىز تىنىش بولسىن!»
بولات وسپانوۆ، الماتى قالاسى قحا اقساقالدار كەڭەسى ءتوراعاسىنىڭ ورىنباسارى:
«اناتوليي پوپوۆ – ۇرپاققا ۇلگى بولاتىن باتىر. ءبىز اسسامبلەيا اياسىندا جاستارمەن ءجيى كەزدەسىپ، وسىنداي تاعىلىمدى جۇزدەسۋلەر ارقىلى تاريحي سانانى جاڭعىرتىپ كەلەمىز. قالامىزدا اقساقالدار كەڭەسى مەن «جومارت جان» جوباسى بىرلەسىپ، جۇيەلى جۇمىس جۇرگىزىپ وتىر. بۇل شارا – سونىڭ جارقىن دالەلى.
مارگاريتا كيريلوۆنا، شوبەرەسى:
«مەن اتامدى وتە جاقسى كورەمىن. ول بىزگە سوعىس تۋرالى كوپ اڭگىمە ايتىپ بەردى. قورقىنىشتى بولعان ەكەن. جەڭىس ءۇشىن اتامىزعا مىڭ العىس! وسىنداي بەيبىت ءومىر سىيلاعان ارداگەرلەرگە ءبىز ءاردايىم ريزامىز. اتام – ءبىزدىڭ ماقتانىشىمىز!