ماحامبەت دوسمۇحامبەتوۆ قىزمەتىنەن بوساتىلدى

ول اتىراۋ وبلىسىنىڭ اكىمى قىزمەتىنەن كەتتى.

مەملەكەت باسشىسىنىڭ جارلىعىمەن ماحامبەت جولداسقالي ۇلى دوسمۇحامبەتوۆ اتىراۋ وبلىسىنىڭ اكىمى لاۋازىمىنان بوساتىلدى، دەپ حابارلايدى Almaty-akshamy.kz  اقوردانىڭ سايتىنا سىلتەمە جاساپ.

ماحامبەت جولداسقالي ۇلى 1960 جىلى 25 جەلتوقساندا اتىراۋ وبلىسىندا تۋعان.

1983 جىلى ي.م. گۋبكين اتىنداعى ماسكەۋ مۇناي-حيميا جانە گاز ونەركاسىبى ينستيتۋتىن «گەولوگيا جانە مۇناي-گاز كەن ورىندارىن بارلاۋ» ماماندىعى بويىنشا بىتىرگەن.

2016 جىلى قازاق مەملەكەتتىك زاڭ ۋنيۆەرسيتەتى، ىسكەرلىك اكىمشىلىك ماگيسترى بولعان. ەڭبەك قىزمەتىن 1983 جىلى «ەمبىمۇناي» بىرلەستىگىنىڭ بالىقشى بارلاۋ بۇرعىلاۋ باسقارماسىنىڭ گەولوگى رەتىندە باستاعان.

ءتۇرلى جىلدارى «ماڭعىستاۋمۇنايگاز» اق-دا باس گەولوگ، گەولوگيا جانە گەوفيزيكا بويىنشا باس ديرەكتوردىڭ ورىنباسارى، گەولوگيا جانە وڭدەۋ بويىنشا باس ديرەكتوردىڭ ورىنباسارى، باس ديرەكتوردىڭ ءبىرىنشى ورىنباسارى – باسقارما مۇشەسى بولعان.

سوڭعى جىلدارى «ەمبىمۇنايگاز» اق باس ديرەكتورى (باسقارما ءتوراعاسى)، «قازمۇنايگاز» ۇك اق گەولوگيا بويىنشا باسقارۋشى ديرەكتورى – باس گەولوگ، ءىرى جوبالار بويىنشا باسقارما ءتوراعاسىنىڭ ورىنباسارى جانە ءىرى وپەراسيالىق ەمەس اكتيۆتەر جانە تەڭىز جوبالارى بويىنشا باس ۆيسە-پرەزيدەنتى لاۋازىمدارىن اتقارعان.

2016-2019 جىلدارى قازاقستان رەسپۋبليكاسى ەنەرگەتيكا ءمينيسترىنىڭ ءبىرىنشى ورىنباسارى قىزمەتىن اتقاردى.

2019 جىلدىڭ جەلتوقسان ايىنان بەرى اتىراۋ وبلىسىنىڭ اكىمى قىزمەتىن اتقارىپ كەلدى.

«قازاقستان رەسپۋبليكاسىنىڭ تاۋەلسىزدىگىنە 10 جىل» مەدالىمەن ماراپاتتالعان.