جۇبايلىق جاراسىم الىپپەسى
ماحابباتتى اركىم ءارتۇرلى قابىلدايتىندىقتان، نەكەدەگى سۇيىسپەنشىلىكتى ساقتاپ قالۋ مەيلىنشە قيىن. ومىرلىك سەرىگىمىزدىڭ وسىناۋ اسىل سەزىمدى قالاي تۇسىنەتىنىن بىلمەسەك، شاڭىراق شاتتىعىنا بۇلت ءۇيىرىلۋى عاجاپ ەمەس...
باس قۇراپ، وتاۋ تىككەنگە دەيىن، ادەتتە، ءبارى كەرەمەت! سۇيىكتىڭدى ءبىر ءسات كورمەسەڭ، بۇكىل ءومىرىڭ توقتاپ قالعانداي، ال قارسى الدىڭنان شىعا كەلسە ءبىتتى، اينالاڭ تەگىس جايناپ، جارقىراپ، كوڭىلىڭ تاسىپ قويا بەرەدى. «ەرتەڭ نە بولادى؟» دەپ ويلامايسىڭ. باقىتتان باسىڭ اينالىپ، سەزىمگە ماس بولعانىڭ سونشا، تاپ وسى ءساتتى تاپجىلماي تۇرىپ قالارداي كورەسىڭ. وكىنىشكە قاراي، ءتىپتى دە ولاي ەمەس. باقىتىڭ ءۇشىن كۇرەسۋدىڭ سوڭعى نۇكتەسى تۇرمىس قۇرۋمەن شەكتەلمەيتىنىن وتباسى بولعاننان كەيىن انىق تۇسىنە باستايسىڭ...
جولى بولماعان جىگىتتىڭ جان سىرى
... ۇيلەنگەننەن كەيىن ماحاببات قايدا كەتەدى؟ بىلەسىز بە، مەن ومىرىمدە ءۇش رەت ۇيلەندىم. بارلىق كەزدە دە ۇيلەنگەنگە دەيىن ءبارى تاماشا بولدى. ءبىراق وتباسىلىق ءومىر باستالعاننان كەيىن-اق، نەگە ەكەنىن، ءبارى ءبۇلىندى. مەنىڭ وعان دەگەن، ونىڭ ماعان دەگەن ماحابباتىنىڭ ءبارى بۋعا اينالىپ جۇرە بەردى. ءبىرىنشى نەكەم شامامەن ون جىلعا سوزىلدى، ەكىنشىسى ءۇش جىلدان اسپادى، ال ءۇشىنشى نەكەم التى جىلدىڭ اينالاسىندا سىر بەردى. ءبىرىنشى نەكەمدە ءۇش-تورت جىل جاپ-جاقسى تۇردىم. ءبىراق دۇنيەگە بالا كەلگەن بويدا ايەلىمنىڭ بۇكىل ىنتا-ىقىلاسى سوعان اۋىپ كەتتى دە، مەنى ەلەمەۋگە اينالدى. بىلاي قاراعاندا، ونىڭ بار ماقساتى – بالا ءسۇيۋ عانا سياقتى بولىپ كورىندى. ال نارەستە ومىرگە كەلىسىمەن، مەن كەرەكسىز بولىپ قالدىم. وسىنى ايتقانىمدا ايەلىم: «ەسىڭ دۇرىس ەمەس، كۇنى-تۇنى بالا باعۋدىڭ قانداي قيىن ەكەنىن تۇسىنبەيسىڭ. قايداعى جوقتى ايتقانشا، ماعان كومەكتەسپەيسىڭ بە؟!» دەپ ءوزىمدى كىنالادى. مەن كومەكتەسۋگە تىرىستىم دا، ءبىراق ودان ەشتەڭە وزگەرمەدى. ارامىز الىستاعان ۇستىنە الىستاي بەردى، ءبىراز ۋاقىتتان كەيىن سەزىم اتاۋلىدان ءتىپتى ەشتەڭە قالعان جوق. ەكەۋمىز دە اجىراسقاندى ءجون كوردىك.
ەكىنشى نەكەم و باستان دۇرىس بولمادى. نە بولىپ، نە قويعانىن ءوزىم تۇسىنبەي دە قالدىم. ءبىز ءبىر-بىرىمىزدى شىن سۇيەمىز دەپ ويلاعانبىز. ءبىراق بال ايىنىڭ ءوزىن ۇرىس-كەرىسسىز وتكىزە المادىق. بىرگە تۇرعان ءۇش جىلىمىز ءۇش عاسىرعا تاتيتىنداي توزاقتا ءوتتى.
ال ءۇشىنشى رەت ۇيلەنگەندە ءبارى تاماشا بولادى دەپ ويلادىم. ونىڭ الدىندا ەكەۋمىز ەكى جىلداي كەزدەسىپ جۇردىك. سول كەزدە ومىرىمدە ءبىرىنشى رەت بىرەۋدى ءسۇيۋ دەگەننىڭ نە ەكەنىن تۇسىنگەندەي بولعام. ونىڭ دا مەنى سۇيەتىنىن سەزگەم. ۇيلەنگەن سوڭ وزگەرىپ كەتتىم دەپ ويلامايمىن. وتباسى بولعاننان كەيىن دە ونى بۇرىنعىداي ءسۇيدىم، ۇنەمى قولپاشتاپ وتىرۋعا، سۇيەتىنىمدى ايتىپ، سەزىمىمدى جاسىرماۋعا تىرىستىم. ايتسە دە باس قوسقانىمىزعا بىرنەشە اي وتىسىمەن-اق كۇڭكىل ءسوز كوبەيدى. اۋەلدە «قوقىستى شىعارمادىڭ»، «كيىمىڭدى ورنىنا ىلمەدىڭ» دەگەن سياقتى ۇساق-تۇيەكتەن باستادى دا، بارا-بارا «مەنى الداپ ءجۇرسىڭ»، «شىنىڭدى ايپايسىڭ» دەپ مىنەز-قۇلقىما نارازىلىق بىلدىرۋگە كوشتى. تۇرمىسقا شىققانعا دەيىن ەشقاشان جاعىمسىز مىنەزى بولعان ەمەس ەدى، ءتىپتى بۇرىن-سوڭدى كورگەن ادامدارىمنىڭ ىشىندەگى وڭدىسى سول بولاتىن. ەشقاشان ەشتەڭەگە شاعىم ايتپايتىن. مەن نە ىستەسەم دە وعان ءبارى كەرەمەت بولىپ كورىنەتىن. ال قالاي ۇيلەندىك، سولاي – مەن قولىنان «تۇك كەلمەيتىن» بىرەۋ بولىپ شىعا كەلدىم. بىرتىندەپ كوڭىلىم قالا بەردى دە اقىرىندا سىنىنا ءتوزۋدى قويدىم. بۇدان ءارى بىرگە تۇرۋدىڭ مۇمكىن ەمەستىگىن ەكەۋمىز دە ءتۇسىنىپ، ءارقايسىمىز ءوز جولىمىزبەن كەتتىك.
سودان بەرى ءالى وي ۇستىندەمىن: شىنىمەن دە، ۇيلەنگەننەن كەيىنگى ۋاقىتتا ماحاببات قايدا قالادى؟ جۇرتتىڭ ءبارىنىڭ جاعدايى مەنىكىندەي مە؟ ەلىمىزدە اجىراسۋدىڭ كوپ بولاتىنى وسىدان ەمەس پە ەكەن؟ ال وتباسىن ساقتاپ قالاتىندار امالسىز تۇرا ما الدە كەيبىر نەكەلەردە ماحاببات شىنىمەن دە ساقتالىپ قالا ما؟ ولاي بولسا، قالايشا؟..
ماحابباتتىڭ نەگىزگى ءتىلى اركىمدە ءارتۇرلى
نەكەگە قاتىستى ماسەلەلەر مەن وتباسىنداعى احۋالدى جاقسارتۋدىڭ قىر-سىرىن زەرتتەگەن بىلىكتى مامان گەري چەپمەن جوعارىداعى ازاماتتىڭ ءبىز تىلگە تيەك ەتكەن اڭگىمەسىن تىڭداي كەلە، جاعدايدى بىلاي تارازىلاعان ەكەن: «ماحاببات قايدا كەتەدى؟» دەگەن بۇل سۇراق – بۇگىندە ۇيلەنگەنى بار، اجىراسقانى بار، مىڭداعان ادامداردى تولعاندىرىپ جۇرگەن ماسەلە. بۇل جونىندە بىرەۋلەر دوستارىمەن كەڭەسسە، كەلەسى بىرەۋلەرى پسيحولوگ ماماندار مەن ءدىن قىزمەتشىلەرىنەن، تاعى بىرەۋلەرى وز-وزدەرىنەن سۇرايدى. جاۋاپتار كەيدە پسيحولوگيالىق تەرميندەر تۇرىندە بولىپ، تۇسىنىككە اۋىر سوقسا، كەيدە ءازىل-قالجىڭ ارقىلى جەتەدى. قاي-قايسىسىندا دا شىندىقتىڭ ۇشقىنى بار بولعانىمەن، ونىڭ ءبارى – قاتەرلى ىسىكپەن اۋىرعان ادامعا اسپيرين بەرگەنمەن پارا-پار.
«نەكەدە تاڭعاجايىپ ماحاببات سالتانات قۇرسا» دەگەن تىلەك ءبارىمىزدىڭ وي-سانامىزعا مىقتاپ ورنىعىپ قالعان. تانىمال جۋرنالداردىڭ ءبارى دەرلىكتەي ءاربىر سانىندا نەكەدەگى ءوزارا سۇيىسپەنشىلىكتى قالاي ساقتاپ قالۋعا بولاتىنىن جازادى. بۇل تاقىرىپتا كىتاپ تا كوپ. راديو-تەلەارنالارداعى توك-شوۋلار دا وسى تۋرالى اڭگىمە قوزعاپ جاتادى. نەكەدەگى ماحابباتتى ساقتاپ قالۋ – وتە ماڭىزدى ءىس. ال كىتاپتار مەن جۋرنالداردىڭ، ناقتى كومەك پەن اقىل-كەڭەس بەرۋشىلەردىڭ جەتىپ-ارتىلاتىنىنا قاراماستان، ۇيلەنگەننەن كەيىن ماحابباتىن ساقتاپ قالۋ تەك ساناۋلى عانا جۇپتاردىڭ قولىنان كەلەتىنى نەسى؟ تالاي وتباسى دۇرىس قارىم-قاتىناس جاساۋدى ۇيرەنۋ شەبەرحاناسىنا بارادى، مامانداردىڭ كەڭەسىنە جۇگىنەدى، الايدا ۇيىنە كەلگەندە سىرتتان كورگەن-بىلگەن، ۇيرەنگەن ۇلگىلەرىن قولدانۋعا مۇلدە قابىلەتسىز ەكەنىن بايقايدى. ياعني جۋرنالداردان «ەكىنشى جارتىڭىزعا ءوز سەزىمىڭىزدى ءبىلدىرۋدىڭ 101 ءتاسىلى» اتتى ماقالانى وقىپ، وزىمىزگە اناعۇرلىم سايكەستەۋ 2-3 قاعيدانى تاڭداپ، قولدانىپ كورەمىز، ال جۇبايىمىز مۇنىمىزدى ءتىپتى اڭعارمايدى دا. ءسويتىپ، قالعان 98 ءتاسىلدى جايىنا قالدىرامىز دا، كۇندەلىكتى تىرشىلىگىمىزگە كوشەمىز.
ەگەر سەزىمىمىز جاۋاپسىز قالماسىن دەسەك، جۇبايىمىزدىڭ ماحابباتىنىڭ نەگىزگى ءتىلىن مەڭگەرۋگە ءتيىسپىز. بۇل رەتتە، وسى سۇراقتاردى قاۋزايتىن كىتاپتار مەن ماقالالاردىڭ سىزگە كومەكتەسە قويۋى نەعايبىل. مۇنداعى ماسەلە – ءبىزدىڭ اسا ماڭىزدى جايتتى، ياعني اركىمنىڭ ءوز ماحابباتىن ءبىلدىرۋ ءتۇرى ءارتۇرلى ەكەندىگىن ۇمىت قالدىرعانىمىز.
لينگۆيستيكا تۇرعىسىنان العاندا، جاپون، جۇڭگو، يسپان، اعىلشىن، گرەك، نەمىس، فرانسۋز سياقتى باسقا دا بىرنەشە نەگىزگى تىلدەر بار. كوپشىلىگىمىز ءوز اتا-انامىز بەن جاقىن تۋىستارىمىز سويلەيتىن ءتىلدى مەڭگەرەمىز. سول ءتىل ءبىزدىڭ نەگىزگى نەمەسە انا ءتىلىمىز بولىپ ەسەپتەلەدى. كەيىنىرەك باسقا دا تىلدەردى ۇيرەنۋىمىز مۇمكىن، ءبىراق ول بىزدەن قوسىمشا كۇش جۇمساۋدى تالاپ ەتەدى. ول تىلدەر ءبىزدىڭ ەكىنشى تىلىمىزگە اينالادى. ءبىراق بارىنەن دە ءوز تىلىمىزدە جاقسى سويلەيمىز، ونى بارىنەن جاقسى تۇسىنەمىز. سول تىلدە سويلەسەك، بىزگە اناعۇرلىم جايلى بولادى. ال ەكىنشى ءتىلدى نەعۇرلىم كوبىرەك پايدالانساق، ونى قولدانا وتىرىپ، ءوزىمىزدى سوعۇرلىم جاقسىراق سەزىنەمىز. مىسالى، تەك ءوز ءتىلىمىزدى عانا بىلسەك جانە ءبىز سياقتى ءوز تىلىندە عانا سويلەيتىن جانە ونىسى بىزدىكىنەن وزگەشە باسقا ءبىر ادامدى كەزدەستىرسەك، ونىمەن قارىم-قاتىناسىمىز شەكتەۋلى بولادى. مۇنداي جاعدايدا يشاراعا، بەت-الپەتىمىز بەن قول قيمىلدارىنا جۇگىنۋگە، ايتارىمىزدى سۋرەت ارقىلى كەسىندەۋگە ءماجبۇرمىز. ارينە، بىردەڭە عىپ قارىم-قاتىناس جاسايمىز، ءبىراق مەيلىنشە ەبەدەيسىز. تىلدىك ايىرماشىلىق – ادامزات مادەنيەتىنىڭ قۇرامداس بولىگى. ەگەر دە قارىم-قاتىناستى ءتيىمدى ەتىپ، مادەني توسقاۋىلداردى بۇزىپ وتكىمىز كەلسە، ارالاسقىمىز كەلگەن ادامدارىمىزدىڭ ءتىلىن مەڭگەرۋىمىز قاجەت.
ماحاببات تۇرعىسىنان العاندا دا جاعداي تۋرا وسىلاي. جۇڭگو ءتىلى اعىلشىن تىلىنەن قالاي ەرەكشەلەنەتىن بولسا، ءسىزدىڭ ماحابباتىڭىزدىڭ ءتىلى دە جۇبايىڭىزدىڭ تىلىنەن ءدال سولاي وزگەشە بولۋى ىقتيمال. اعىلشىنشا سويلەي وتىرىپ، ءوز ماحابباتىڭىزدى بىلدىرۋگە قالاي تىرىساتىنىڭىز ماڭىزدى ەمەس. ويتكەنى جۇبايىڭىز تەك قىتايشا عانا سويلەسە، بىر-بىرلەرىڭىزدى قانشالىقتى سۇيەتىندەرىڭىزدى سول كۇيى تۇسىنە المايسىزدار. ماسەلەن، نەكەلەرىنىڭ ءساتسىز بولعانىن ايتقان جىگىت ءوزىنىڭ ءۇشىنشى ايەلىمەن «ءسوزدى نىعارلاۋ» ارقىلى سويلەسكەن. «ۇنەمى قولپاشتاپ وتىردىم، سۇيەتىنىمدى ايتىپ، سەزىمىمدى جاسىرماۋعا تىرىستىم» دەيدى. ارينە، ول اعىنان جارىلعان، شىنىن ايتقان، ءبىراق جارى ونىڭ ءتىلىن تۇسىنبەگەن. ياعني ول كۇيەۋىنىڭ ءوز ماحابباتىن مىنەز-قۇلقى ارقىلى كورسەتكەنىن قالاعان جانە ونى تابا الماعان. بۇل ارادا شىنايى بولىپ قويۋ از. ەگەر نەكەمىز باياندى بولسىن دەسەك، جۇبايىمىزدىڭ ماحابباتىنىڭ نەگىزگى ءتىلىن انىقتاپ الۋعا ۇمتىلعانىمىز ابزال. سونى تاۋىپ، سول تىلدە سويلەۋدى ۇيرەنگەن بويدا ماحابباتقا تولى نەكەنىڭ كىلتىنە قول جەتكىزەرىڭىز انىق.
ماحاببات قۇتىسى تولىپ تۇرۋى شارت
ادەتتە، «ماحاببات – باعا جەتپەس گاۋھار سەزىم»، «الەمدى العا جىلجىتاتىن دا – ماحاببات» دەپ ايتامىز. مىڭداعان كىتاپتار مەن جۋرنالدار، اندەر مەن فيلمدەر وسى سوزگە تولى.
وسى ورايدا، پسيحولوگتار سۇيىكتى بولۋ – ادامنىڭ نەگىزگى ەموسيونالدىق قاجەتتىلىگى ەكەنىن ايتادى. ماحاببات ءۇشىن ادامزات تاۋ شىڭدارىن باعىندىرادى، تەڭىزدى ءجۇزىپ، ءشول دالانى كەسىپ وتەدى، ادام توزگىسىز قيىندىقتاردى جەڭەدى. ماحاببات جوق جەردە تاۋلار اسۋ بەرمەستەي، تەڭىز ۇشى-قيىرسىز، ال ءشول دالا ادام توزگىسىز ازاپتى بولىپ كورىنەدى، ءسويتىپ، قيىندىق اتاۋلىنى وزىمىزگە شىعارىلعان سوڭعى ۇكىمدەي قابىلدايمىز. تۇپتەپ كەلگەندە، ادام بالاسىنىڭ نەگىزىندە ماحاببات سەزىمى جاتپاعان جەتىستىكتەرىنىڭ ءوزى ماعىناسىز. قاي كەزدە دە ادامي درامانىڭ سوڭعى سەناسىندا باستى ءۇش قاھارمان عانا قالادى، ولار – سەنىم، ءۇمىت، ماحاببات. وسىلاردىڭ ىشىندە بارىنەن دە ماحاببات ماڭىزدىراق.
راس، كوپتەگەن عاسىرلار بۇرىنعى سياقتى، ءقازىر دە ادامزات قوعامىنا ماحاببات ءتان، ءبىراق وسى ءسوزدىڭ ءوزىنىڭ ماعىناسىن كوپ جاعدايدا تۇسىنە بەرمەيمىز. بىلايىنشا، ءبىز ونى مىڭداعان جاعدايدا قولدانامىز. «يتتەردى جاقسى كورەمىن»، ىلە-شالا «انامدى جاقسى كورەمىن» دەيمىز. سۋعا ءجۇزۋ، شاڭعى تەبۋ، اڭعا شىعۋ ءتارىزدى ءسۇيىپ شۇعىلداناتىن ىستەرىمىزدى ايتامىز. ءارتۇرلى زاتتاردى – كۋلينارلىق تاعامداردى، ماشينانى، ءۇيدى جاقسى كورەمىز. يتتەردى، مىسىقتاردى، جان-جانۋارلاردى جانىمىز سۇيەدى. تابيعاتقا – اعاشقا، شوپكە، گۇلگە، اۋا رايىنا تامسانامىز. ادامدارعا – اتا-انامىزعا، ۇل-قىزىمىزعا، جۇبايىمىزعا، دوستارىمىزعا ەت-جۇرەگىمىز ەلجىرەپ تۇرادى. ءبىز ءتىپتى ماحاببات سەزىمىنىڭ وزىنە دە ىنتىقپىز.
بۇل از بولسا، الدەبىر ىس-ارەكەتىمىزدى ءتۇسىندىرۋ ءۇشىن دە «ماحاببات» ءسوزىن قولدانامىز. «مەن ونى سۇيەتىندىكتەن دە وسىلاي ىستەدىم» – كەز كەلگەن ارەكەت وسى تىركەسپەن تۇسىندىرىلەدى. ايەلىنىڭ كوزىنە ءشوپ سالعان ەركەك تە سول قىلىعىن «ماحاببات» دەپ بىلەدى. ءدىني قاۋىم مۇنى «كۇنا» دەيدى. ماسكۇنەمنىڭ ايەلى كۇيەۋىنىڭ بىرىنەن سوڭ ءبىرىن بوساتىپ، شاشىپ تاستاعان بوتەلكەلەرىن جينايدى جانە ونىسىن «جاقسى كورەتىندىگىمنەن» دەپ ويلايدى. پسيحولوگ مۇنى «ءوزارا تاۋەلدىلىك» دەپ اتايدى. اتا-انا دا «ماحاببات» دەپ ءتۇسىنىپ، بالاسىنىڭ بۇكىل تىلەگىن ورىندايدى. ال وتباسى ماسەلەلەرى جونىندەگى مامان مۇنى «جاۋاپسىزدىق» دەپ ەسەپتەيدى. ونداي بولسا، بىرەۋگە ماحابباتپەن قاراۋ، جاقسى كورۋ دەگەنىمىز نە؟..
«ماحاببات ءتىلىن» مەڭگەرۋ – ۇلكەن ونەر
بالالار پسيحولوگتارى «ءاربىر بالادا نەگىزگى-نەگىزگى دەگەن بەلگىلى ءبىر ەموسيونالدىق قاجەتتىلىكتەر بولادى جانە بالا ەموسيونالدىق جاعىنان ورنىقتى بولۋى ءۇشىن سول قاجەتتىلىكتەر قاناعاتتاندىرىلۋى ءتيىس» دەپ تۇجىرىمدايدى. وسى ەموسيونالدىق قاجەتتىلىكتەردىڭ اراسىندا جاقسى كورۋ مەن نازاردا بولۋ، ءوزىنىڭ بىرەۋگە تيەسىلى جانە قاجەت ەكەنىن سەزىنۋدەن ماڭىزدى نارسە جوق. ەگەر دە بالاعا ءتيىستى كوڭىل بولىنگەن جاعدايدا ول جاۋاپكەرشىلىك سەزىمى جوعارى ازامات بولىپ ەرجەتەدى. ول ماحابباتسىز بالانىڭ الەۋمەتتىك جانە ەموسيونالدىق دامۋى كەشەۋىلدەيدى. ياعني بالا تارتىبىندەگى اۋىتقۋشىلىقتاردىڭ كوپشىلىگى «ماحاببات قۇتىسىنىڭ» بوس ەكەندىگىنەن تۋىندايدى. ارينە، ماحاببات قۇتىسى – كوزگە كورىنبەيتىن نارسە، ءبىراق ونىڭ ناتيجەسى كوزگە ۇرىپ تۇرادى. مىسالى، بالا ءتارتىبىنىڭ ناشار بولۋى – ونىڭ ءوزى سەزىنبەگەن ماحابباتتى، جان جىلۋىن ىزدەۋدىڭ سالدارى.
ءبىر انىعى، ماحابباتتى قاجەتسىنۋ – بالالىققا عانا ءتان نارسە ەمەس. بۇل سەزىم ەسەيگەن كەزىمىزدە، وتباسىلىق ومىردە دە بىزبەن بىرگە جۇرەدى.
«عاشىق بولۋ» بۇل قاجەتتىلىككە ۋاقىتشا عانا جاۋاپ بەرە الادى، ءبىراق ول تەك «جەدەل جاردەم» عانا. كەيىننەن بايقايتىنىمىزداي، ول تەك قىسقا جانە ايتارلىقتاي شەكتەۋلى ۋاقىت ارالىعىن عانا قامتيدى. «عاشىقتىق» كوگىنەن جەر بەتىنە تۇسكەن بويدا ماحابباتقا دەگەن ەموسيونالدىق قاجەتتىلىك قايتادان جوعارىعا قالقىپ شىعادى، ويتكەنى ول – ءبىزدىڭ تابيعاتىمىزدىڭ فۋندامەنتالدى نەگىزى. ول ءبىزدىڭ بۇكىل قالاۋىمىزدىڭ ءدال ورتاسىندا تۇرادى. ماحاببات بىزگە عاشىق بولعانعا دەيىن دە قاجەت بولعان جانە قاشان سوڭعى دەمىمىز تاۋسىلعانشا قاجەت بولا دا بەرەدى. نەكەلەسۋدى قالاۋدىڭ نەگىزىندە دە جار ماحابباتىن سەزىنۋ قاجەتتىلىگى جاتىر. سول سەبەپتى دە، كوپ ادامدار «ەرلى-زايىپتى ەكى ادام ءبىر-بىرىن سۇيمەسە، بايلىقتان نە پايدا؟» دەگەن پىكىردە. دەمەك ماتەريالدىق دۇنيە ماحابباتتىڭ ورنىن الماستىرا المايدى. الدەكىمنىڭ ايەلى «كۇنى بويى ول مەنى كەرەك تە ەتپەيدى، تەك تۇندە، توسەكتە عانا ىزدەيدى. بۇل ماعان ۇنامايدى» دەپ شاعىنادى. ول، ارينە، توسەك قاتىناسىن جەك كورەتىن ايەل ەمەس. ول – ەموسيونالدىق ماحابباتقا مۇقتاج ايەل.
وزگەلەردىڭ ءوزىن جاقسى كورگەنىن قالاپ تۇرۋ – ادامزات تابيعاتىنا ءتان نارسە. وقشاۋلانىپ قالۋ پسيحيكانى قاتتى زاقىمدايدى. قىلمىسكەردى جەكە كامەراعا قاماۋدىڭ اۋىر جازا بولىپ ەسەپتەلەتىنى سودان. الدەكىممەن جاقىن قارىم-قاتىناستا بولۋ، بىرەۋدىڭ ءوزىن سۇيگەنىن قالاۋ ادامزات تىرشىلىگىنىڭ نەگىزى بولىپ تابىلادى. نەكەنىڭ ءوزى دە جاقىندىق پەن ماحابباتقا دەگەن وسى قاجەتتىلىكتى قاناعاتتاندىرۋ ماقساتىنان شىققان. سوندىقتان دا ءدىني ادەبيەتتەر ەرلى-زايىپتىلاردى ءبىر بۇتىنگە اينالۋعا ۋاعىزدايدى. بۇل اركىمنىڭ ءوزىنىڭ تۇلعالىق قاسيەتىن جوعالتۋى دەگەندى بىلدىرمەيدى، ەرلى-زايىپتىلار ءبىر-بىرىنىڭ ومىرىنەن وتە ۇلكەن ورىن الۋعا ءتيىس دەگەن ءسوز.
الايدا قانشالىقتى ماڭىزدى بولسا، ماحاببات تۇسىنۋگە دە سونشالىقتى قيىن. وتباسىلىق شەكسىز باقىت تۋرالى باستاپقى وي-ارمانى شىنايى ءومىردىڭ جارتاسىنا سوعىلىپ، تاۋى شاعىلعان جۇبايلار كوپ. سول سەبەپتى دە: «ماحابباتىمىز ءولدى. قارىم-قاتىناسىمىز كۇيرەدى. بىر-بىرىمىزگە جاقىنبىز دەپ ويلاپ ەدىك، ءبىراق ونىڭ ءبارى ارتتا قالدى. بىزگە ەندى بىرگە بولعان ۇنامايدى. ءبىز ءبىر-بىرىمىزدىڭ قاجەتتىلىگىمىزگە جاۋاپ بەرە المايمىز» دەيدى. ولاردىڭ وقيعالارى بالالار سياقتى ۇلكەندەردىڭ دە «ماحاببات قۇتىسى» بولاتىنىن كورسەتەدى. بالكىم، سىر بەرە باستاعان نەكەنىڭ تەرەڭىندە مەڭزەگىشى ءنولدى كورسەتىپ تۇرعان قۇتى جاسىرۋلى تۇرعان بولار؟ ەرسى قىلىق پەن جاتىرقاي قاراۋعا، قورلاپ سويلەۋ مەن سىناپ-مىنەۋگە سول قۇتىنىڭ بوستىعى سەبەپكەر بولسا شە؟ ەگەر ونى تولتىرۋدىڭ ءتاسىلىن تاپساق، نەكەمىزدى دە جاڭعىرتا الاتىن بولارمىز؟ بالكىم، سول قۇتى نەكەنىڭ مىزعىماستىعىن قامتاماسىز ەتەتىن كىلت شىعار؟
ءبىر ەسكەرەر جايت، اۆتوكولىككە جانارماي قانشالىقتى قاجەت بولسا، ماحابباتتىڭ ەموسيونالدىق قۇتىسىنىڭ تولى بولۋى نەكە ءۇشىن سونشالىقتى ماڭىزدى. سوندىقتان ماحابباتتىڭ نەگىزگى تىلدەرىنىڭ قانداي بولاتىنىن ءتۇسىنۋ جانە سونىڭ قايسىسىن جارىڭىزدىڭ قۇپ كورەتىنىن ءبىلۋ ءومىرىڭىزدى تۇبەگەيلى وزگەرتەتىنىن ۇمىتپاڭىز. ماحاببات قۇتىسى تولعاندا ادامداردىڭ مىنەز-قۇلقى مەن ىس-ارەكەتى دە وزگەرەدى.
(عالامتور ماتەريالدارى نەگىزىندە ازىرلەندى)