شەتەلدىك ءبىر توپ زەرتتەۋشى-ساراپشى 4–8 جاس ارالىعىنداعى بالالارعا «ماحاببات دەگەن نە؟» دەگەن ساۋال تاستايدى. سوندا ورەندەردىڭ بەرگەن جاۋاپتارى ۇلكەندەر كۇتكەندەگىنەن الدەقايدا تەرەڭ ماعىنالى بولىپ شىققان.
رەبەككا، 8 جاستا:
«مەنىڭ اپام ارتريتپەن اۋىرعاندا، وزدىگىنەن ەڭكەيىپ، ءتىپتى اياعىنىڭ تىرناقتارىن بوياي الماي قالدى. سوندا اتام ءوزى دە ارتريتپەن اۋىرىپ تۇرعانىنا قاراماستان اپامنىڭ تىرناعىن ىلعي بوياپ بەرەدى. مۇندايدى ماحاببات دەيدى».
بيللي، 4 جاس:
«سەنى بىرەۋ جاقسى كورەتىن بولسا، وندا ونىڭ سەنىڭ اتىڭدى ايتقانداعى داۋىسى باسقاشا شىعادى. سوندا ءوزىڭنىڭ ەسىمىڭنىڭ ونىڭ اۋزىنىڭ ىشىندە، ءقاۋىپسىز جەردە ەكەندىگىن بىلەسىڭ».
كارەن، 7-دە:
«ەگەر سەن بىرەۋدى سۇيسەڭ، وندا كىرپىكتەرىڭ ءبىر كوتەرىلىپ، ءبىر تۇسەدى. سوندا سەنەن كىپ-كىشكەنتاي جۇلدىزشالار ۇشىپ شىعادى».
كريسسي، 6-دا:
«ماحاببات دەگەندى، ماسەلەن، ءبىر جەرگە تاماقتانۋعا بارعانىڭدا، بىرەۋگە قۋىرىلعان كارتوبىڭنىڭ كوپ بولىگىن ونىڭ ورنىنا بىردەڭە دامەتپەي-اق بەرۋ دەپ بىلەمىن».
لورەن، 4 جاستا:
«مەنى اپكەمنىڭ جاقسى كورەتىنىن بىلەمىن. سەبەبى، ول بارلىق بۇرىنعى كيىمدەرىن ماعان بەرەدى دە، امالسىزدان وزىنە جاڭا كيىمدەر ساتىپ الۋعا دۇكەنگە كەتەدى».
نوەل، 7 جاستا:
«ەگەر سەن ءبىر ۇلعا ونىڭ جەيدەسىنىڭ ۇنايتىندىعىن ايتساڭ، سوسىن ول سول كيىمدى كۇندە ۇستىنەن تاستاماي كيىپ جۇرسە، سول ماحاببات».
مەري، 4-تە:
«ماحاببات دەگەنىمىز – ەگەر سەن تاڭەرتەڭ كۇشىگىڭدى وزىڭمەن بىرگە ەرتپەي، تاڭنان كەشكە دەيىن ۇيدە جالعىز قالدىرىپ كەتسەڭ، سونى دا ەلەمەي، ونىڭ جۇگىرىپ كەلىپ بەتىڭدى جالاۋى».
سيندي، 8 جاس:
«فورتەپيانو كونسەرتىندە ساحناعا شىققانىمدا قاتتى قورىقتىم. زالداعى ادامداردىڭ بارىنە قاراپ تۇرعانىمدا، ماعان قولىن بۇلعاپ، جىميىپ وتىرعان اكەمدى كوزىم شالدى. بۇكىل زالدا ماعان سولاي ىستەگەن تەك اكەم عانا بولدى. سودان سوڭ مۇلدەم قورىقپادىم».
دەنني، 7 جاسار:
«انام اكەمە ارناپ كوفە ازىرلەگەندە، ونىڭ دامدىلىگىنە كوز جەتكىزۋ ءۇشىن الدىمەن ءوزى ءبىرىنشى بولىپ ءىشىپ كورۋى، مىنە، ماحاببات دەگەنىمىز سول».
***
بالا دەگەن – ەڭ ادال، كىرشىكسىز تۇلعا. ول ويىنداعىسىن بۇكپەسىز، سول قالپىندا جەتكىزە بىلەتىن جالعىز تازا ادام. بىردە جازۋشى جانە لەكتور لەو بۋسكاليا ءوزى قازىلىق ەتكەن ءبىر بايقاۋ تۋرالى قىزىقتى جايتتى ايتقان ەكەن. الگى بايقاۋدىڭ ماقساتى ەڭ قامقور بالانى انىقتاۋ بولىپتى. سوندا «ەڭ قامقور بالا» مارتەبەسىن 4 جاستاعى بالدىرعان يەلەنىپتى. ول جۋىردا عانا كەمپىرى قايتىس بولعان قاريانىڭ ەڭ كىشكەنتاي كورشىسى بولىپ شىقتى.
ۇزاق جىل وتاسقان جارى باقيلىق بولىپ، ەڭسەسى ءتۇسىپ، ەكى يىعى قۋشيىپ، سوپيىپ، جالعىزدان-جالعىز كەمسەڭدەپ جىلاپ وتىرعان قارتتى كورگەن الگى بالا ونىڭ اۋلاسىنا يمەنبەي كىرىپ بارىپ، قاريانىڭ تىزەسىنە جايعاسىپ الىپ، كوزدەرى جىپىلىقتاعان كۇيى ءۇن-تۇنسىز وتىرا بەرگەن. بالاقايدىڭ شەشەسى ۇلىنان:
– بالام، كورشى اتايعا نە ايتتىڭ؟ – دەپ سۇراعاندا، بالدىرعان:
– ەشتەڭە. مەن تەك اتانىڭ جىلاپ الۋىنا كومەكتەستىم، – دەگەن ەكەن.