نەمەسە 14 اۋىر وپەراسيانى باستان وتكەرگەن انەل مەن ونىڭ بارلىق اۋىرتپالىعىن بىرگە كوتەرىسكەن مارلەن تۋرالى.
ءبىزدىڭ ديماش قۇدايبەرگەن كوپكە ءمولدىر ماحاببات حيكاياسىمەن تانىمال بولعان مارلەن مەن انەلدىڭ دىنمۇحاممەد ەسىمدى ۇلىنا كىندىك اكە بولدى. بۇل تۋرالى ەرلى-زايىپتى جاستار وزدەرىنىڭ Instagram پاراقشاسىندا انشىمەن تۇسكەن سۋرەتتەرىن جاريالاي وتىرىپ، قۋانا حابارلادى.
قوس عاشىق
«بالامىزدىڭ كىندىك پاپاسىمەن العاشقى سۋرەتى. ءبىزدىڭ ديمالوكتىڭ كىندىك پاپاسىنا كوپ راحمەت! ديماش سياقتى ەل سىيلايتىن جاقسى، ادال جان بولسىن»، – دەپ جازدى انەل. الەۋمەتتىك جەلى قولدانۋشىلارى دا جاس وتباسىنى قۇتتىقتاپ، جىلى لەبىزدەرىن جەتكىزدى.
ءيا، جاقىندا مارلەن مەن انەلدىڭ تۇڭعىشى ۇلى دۇنيەگە كەلىپ، سابيگە دىنمۇحاممەد دەگەن ەسىم بەرگەن بولاتىن. ەندى ديماش كىندىك اكەسى بولعان بوبەكتىڭ اتا-اناسى كىمدەر، سوعان از-ماز توقتالا كەتەيىك.
انەل مەن مارلەندى ەشكىم ۇمىتا قويماعان بولار. ەرەكشە ماحاببات يەلەرى تۋرالى وقىرماندارىمىزعا ايتا وتىرايىق.
انەل مۇراتوۆا مەكتەپتە جۇرگەندە سىرقاتقا شالدىعادى. مارلەن نۇرگاسەنوۆ ەكەۋى ءبىر مەكتەپتە وقىعان. ەكى جاستىڭ دوستىعى مەكتەپ قابىرعاسىندا باستالىپتى. العاشىندا ەكەۋى تەلەفونمەن، عالامتور ارقىلى سويلەسىپ جۇرگەن. كەيىن مارلەن 9-سىنىپتى ءبىتىرىپ، اقتوبەگە كوللەدجگە وقۋعا تۇسەدى، ال انەل مەكتەپتە وقىپ جۇرەدى.
قىز 2009 جىلى وكپەسىنە سالقىن تيگىزىپ الىپ، اۋرۋحانادا ۇزاق جاتادى. اۋرۋى مەڭدەپ، ولار اناسى ەكەۋى اقتوبە قالاسىنا تەكسەرىلۋگە بارادى. مارلەن بۇل تۋرالى دوسىنان ەستىپ، قىزعا كەلەدى. سول كەزدە ەكەۋى بىر-بىرىنە جاقىنىراق ءجۇرىپ، قالادا قىدىرادى. ءبىراق انەل وعان ءوزىنىڭ اۋرۋى جونىندە ەشتەڭە ايتپايدى. مارلەن بولسا، ونى قۇلسارىعا پويىزعا شىعارىپ سالادى. ال ءبىر جىلدان سوڭ انەلدىڭ ءبىر وكپەسىن تۇگەلىمەن الىپ تاستاۋ كەرەك بولعان. انەلدىڭ اناسى قاراعاندىنىڭ تۋماسى ەكەن، ول قىزىن سوندا وتا جاساتۋعا اكەتەدى.
تاباندى جىگىت
انەل قاراعاندىعا وپەراسياعا كەتىپ بارا جاتقاندا، ءبىر كۇن بۇرىن جىگىتكە تەلەفونمەن جاعدايىن ايتادى. ول نەگە ەكەنى بەلگىسىز، قاشان، قاي پويىزبەن شىعاتىنىن سۇراستىرىپ الادى. انەل مىنگەن پويىز اقتوبەگە سوقپايدى، قاندىاعاشقا توقتايدى. ال مارلەن ساباقتان قاشىپ شىعىپ، اقتوبەدەن قاندىاعاشقا كەلىپ، قىزدىڭ ۆاگونىنا وتىرىپ الادى. انەل جىگىتتىڭ بۇل ارەكەتىنە قۋانىپ تۇرسا دا، «ساباعىڭ قايدا؟» دەپ سۇرايدى الاڭداپ. «سەن وپەراسياعا كەتىپ بارا جاتقاندا مەن قالاي ساباقتا وتىرامىن؟» – دەيدى جىگىت. ارينە، قىزدىڭ اناسى دا بۇعان تاڭقالادى.
قاراعاندىدا مارلەن انەلدىڭ جانىندا، اۋرۋحانادا تۇنەپ جۇرەدى. دارىگەرلەر وعان پالاتاعا كىرۋگە رۇقسات بەرمەسە دە، ول ەبىن تاۋىپ كىرىپ كەتەتىن كورىنەدى. تۇنگى اۋىسىمداعى مەدبيكەلەرگە ءتاتتى تورتتار اكەلىپ، ولاردىڭ دا كوڭىلدەرىن كوتەرىپ قويادى ەكەن. ەڭ باستىسى، ۇنەمى انەلدىڭ جانىنان تابىلاتىن. ونى مورالدىق تۇرعىدا قولدايتىن. مارلەن اۋرۋحانادا انەلدىڭ جانىندا ۇنەمى بولۋ ءۇشىن سىرتتاي وقۋ بولىمىنە اۋىسادى. كەيىن دارىگەرلەر «بۇل بالانى كوندىرە المايسىڭ ءبارىبىر» دەپ، قولدارىن ءبىر سىلتەگەن كورىنەدى.
انەلدىڭ وكپەسىن الىپ تاستايدى. كۇنىنە 25 ءتۇرلى دارى-دارمەك قابىلداعاندىقتان، اسقازان-ىشەك جولدارىنىڭ جۇمىسى بۇزىلا باستايدى. دارىگەرلەر وتا جاساۋ كەرەك دەپ، 8 سانتيمەتر ىشەگىن كەسەدى. ال 2012 جىلى جۇرەگى سىر بەرە باستايدى. تەك ءبىر وكپە جۇمىس جاساپ تۇرعاندىقتان، جۇرەككە وتتەگى جەتپەيدى. كەز كەلگەن ۋاقىتتا اۋا جەتپەي قالۋى مۇمكىن بولعاسىن وتتەگى باللونىن الدىرتادى. وسى كەزدە مارلەن قاراعاندىدان جۇمىس تاپقان بولاتىن. ول انەلدىڭ جاعدايىن ەستي سالا، «مەن جۇمىستان شىعام، سەنىڭ قاسىڭدا بولىپ، باللوندى كوتەرىپ جۇرەمىن» دەيدى. ءيا، انەل وتتەگى باللونىنسىز جۇرە المايتىن بولدى. كەز كەلگەن ۋاقىتتا ەسىنەن تانىپ قالاتىن. سول كەزدە دە 10 كەلىلىك وتتەگى باللونىن كوتەرىپ، مارلەن ونىڭ جانىندا ءجۇردى.
«كۇنىم، سەن سونبەشى!»
ۇنەمى اۋا جەتپەي تۇرعاسىن، انەلدىڭ جۇرەگى ورنىنان قوزعالىپ، ارقاسىنا قاراي ىعىسىپ كەتەدى. قاراعاندىدا وكپەسىنە وتا جاساعان دارىگەر «جەدەل وتا جاساۋ كەرەك، جۇرەكتى قالاي دا ورنىنا اكەلۋ كەرەك» ەكەنىن ەسكەرتەدى. مارلەن مەن انەل استانا مەن الماتىنىڭ دارىگەرلەرىنە بارادى. سول كەزدە الماتىعا ماسكەۋدەن كەلگەن پروفەسسور انەلدى تەكسەرۋدەن وتكىزەدى دە، مارلەنگە «سەن قىزدى ارى-بەرى سۇيرەپ، السىرەتە بەرمە، ءومىر سۇرۋگە 30 پايىز عانا مۇمكىندىگى بار، ەشكىم وعان وتا جاساۋ جاۋاپكەرشىلىگىن المايدى، اكە-شەشەسىنە اپار، دايىندالا بەرسىن» دەگەن «ۇكىم» شىعارادى. سوندا مارلەن قاتتى اشۋلانىپ، پروفەسسوردىڭ جاعاسىنا جارماسىپ، «مەن انەلدى ءالى-اق ءسىزدىڭ الدىڭىزعا ساپ-ساۋ اكەلەم» دەپ ايقايلاعان كورىنەدى. سول كۇنى ەكەۋى ساياباققا كەلەدى. مارلەن «سەن پروفەسسور وسىلاي ايتتى ەكەن دەپ بەرىلەسىڭ بە؟ سوعان سەنەسىڭ بە؟ اللاعا نەگە سەنبەيسىڭ؟ قۇدايدان نەگە سۇرامايسىڭ؟ مەن سەن ءۇشىن ءومىر ءسۇرىپ ءجۇرمىن، نەگە ماعان كومەكتەسپەيسىڭ؟ سەن تەك ىشىڭنەن جەڭىلمەشى، مەن سەنىڭ جازىلاتىنىڭا، ءتىرى قالاتىنىڭا تولىقتاي سەنەم، تەك سەن ءوزىڭ سەنبەي تۇرسىڭ»، – دەپ ايقايلاپ تۇرىپ جىلايدى.
انەل كۇيزەلىسكە ءتۇسىپ، تەك ءدارىنىڭ كومەگىمەن ۇيىقتايتىن حالگە جەتەدى. بىردە تۇندە ۇيقىسىنان ويانسا، مارلەن قۇدايدان دۇعا تىلەپ: «سىناپ جاتقانىڭدى بىلەمىن، ءبىراق قاتتى سىناماشى، انەلدىڭ اۋىرعانىنا شىداي المايمىن، جول كورسەتشى» دەپ جالبارىنىپ وتىر ەكەن. ونى ەستىگەن انەل جىلاپ، ءبىر تۇندە ال-كۇش جيناپ، وز-وزىنە سەنىم ارتا باستايدى.
2016 جىلدىڭ اقپانىندا انەلدىڭ جۇرەگىنە وتا جاسالۋ تۋرالى شەشىم قابىلداندى. ءبىراق وتا ۇستەلىنە تەك 30 پايىز عانا كەپىلدىكپەن جاتادى. اناسى: «مۇمكىن ويلانارسىڭ، جاساتپاسسىڭ، قورقىپ تۇرمىن»، - دەپ جىلاسا، مارلەن: «جوق، وتا جاسالادى، مەن سەنەمىن، ءبارى جاقسى بولادى»، - دەيدى. انەلدىڭ ءوزى دە: «ءولىمدى كۇتىپ وتىرعانشا، امال جاساپ ولگەنىم ارتىق»، - دەپ شەشەدى. وتانى 3-4 ساعاتتان ارتىق سوزۋعا بولمايتىن ەدى، سەبەبى پاسيەنت ناركوزدى كوتەرە المايدى. ءبىراق كەيىن بەلگىلى بولعانىنداي، وعان جاسالعان وتا 6،5 ساعاتقا سوزىلعان. تاۋەكەلگە بارعان بىلىكتى حيرۋرگ شىعا سالىپ، بىردەن مارلەندى ىزدەپ تاۋىپ: «انەل ءبارىن جەڭىپ شىقتى، ءتىرى قالدى»، – دەگەن ەكەن ماڭدايىنداعى تەرىن ءسۇرتىپ تۇرىپ. سوسىن باسقا ەش جاققا بۇرىلماستان، ءوز كابينەتىنە بارىپ، قولدارىن ەكى جاققا سوزىپ، كرەسلوسىنا جاتا كەتىپتى دەيدى. قاتتى قالجىراعان، ارينە.
ءسابيدىڭ كىندىك اكەسى – ديماش
مارلەننىڭ قالايدا انەلدىڭ جانىندا بولۋ ءۇشىن قاراعاندىدا دالادا تۇنەگەن كەزدەرى دە بۇگىندە كورگەن تۇستەي. انەل 16 جاسىندا قاتتى سىرقاتتانىپ، 7 جىلعا جۋىق ءومىر مەن ءولىمنىڭ اراسىندا بولعاندا، ونى رياسىز سۇيىسپەنشىلىگىمەن دەمەي بىلگەن مارلەن ماحابباتى تۋرالى عالامتوردا ءجيى جازا باستادى. ەكەۋىنە ادامداردان حاتتار دا اعىلا باستايدى. ەكەۋىنە باقىت تىلەگەن نيەتتەس حاتتاردان كۇن قۇرعاماعان. نەكەسىن 2015 جىلى قاراعاندىدا قيدىرتقان قوس عاشىق 2017 جىلى ەرنار ايداردىڭ «كۇنىم، سەن سونبەشى» اتتى بەينەبايانىنا تۇسەدى. كليپ ءۇش جىلعا جۋىق ۋاقىت ىشىندە YouTube جەلىسىندە 32 ملن قارالىم جيناعان.
وسىناۋ جاس عۇمىرىندا 14 اۋىر وتانى ەڭسەرگەن انەل 10 جىلدان سوڭ ءسابي ءسۇيدى. «اللا بىزگە 10 جىل سابىرمەن كۇتكەن ءسابيدى بەردى. ءيا، ماعان وڭاي بولمادى. دارىگەرلەر «ەشقاشان انا بولمايسىڭ» دەپ نەشە مارتە قولدارىن ءبىر سىلتەدى. ماعان اۋىر تيەتىن، جىلايتىنمىن. ءبىراق ەشقاشان اللادان ءۇمىتىمدى ۇزبەدىم. كۇندىز-تۇنى جانىمدا بولعان، ءبىر كۇن، ءبىر ءتۇن دە جالعىز قالدىرماعان انام مەن مارلەنىمە العىسىم شەكسىز. بارلىق جاعدايىمدى جاساپ، قيىن ساتتە جانىمنان تابىلىپ، قولداۋ كورسەتىپ، ءار جىلاعان سايىن جاسىمدى ءسۇرتىپ، كۇيزەلىسكە تۇسكەن سايىن شىعارۋعا تىرىسىپ، بالانى تۇنىمەن قاراپ، قولىنان كەلگەننىڭ بارلىعىن جاساپ ءجۇردى. 10 جىل بويى مەنىمەن بىرگە سابىر ساقتاپ، ءبىر ءسات بەتىمە باسپاي، سوڭىنا دەيىن اللادان دۇعا سۇراپ، ءۇمىتىن ۇزبەگەن مارلەنگە راببىم ءسابي بەردى»، – دەگەن جان تەبىرەنتەرلىك جازبا قالدىرعان بولاتىن وسىدان ءبىر اي شاماسىندا انەل پاراقشاسىندا. سول ءسابيدىڭ كىندىك اكەسى - ديماش قۇدايبەرگەن!