ماگنۋس كارلسەن: مەن شاحمات جانە ءوز ويىنىمنىڭ ستراتەگياسى تۋرالى ەشقاشان ويىمنان شىعارعان ەمەسپىن

ماگنۋس كارلسەن جۋرناليستەردىڭ سۇراقتارىنا جاۋاپ بەردى

الماتىدا شاحماتتىڭ راپيد جانە بليس تۇرلەرى بويىنشا 2022 جىلعى الەم چەمپيوناتىنىڭ رەسمي اشىلۋىنان كەيىن وڭىرلىك كوممۋنيكاسيالار قىزمەتىندە وتكەن باسپا ءسوز ءماسليحاتىنا بەلگىلى نورۆەگيالىق شاحماتشى، شاحماتتان قازىرگى الەم چەمپيونى ماگنۋس كارلسەن قاتىستى، دەپ حابارلايدى Almaty-akshamy.kz.

شاحماتشى الماتىلىقتارعا قوناقجايلىلىعى ءۇشىن العىسىن ءبىلدىردى، وزىنە قازاقتىڭ ۇلتتىق شاپانى سىيعا تارتىلعانىن تىلگە تيەك ەتتى. ماگنۋستىڭ ايتۋىنشا، بۇل «قازاقستانعا قوش كەلدىڭىز!» دەگەن انىق ءارى ءبىر ءماندى حابارلاما بولدى.

ماگنۋس كارلسەن جۋرناليستەردىڭ سۇراقتارىنا جاۋاپ بەرە وتىرىپ، سوڭعى جىلدارى بۇكىل الەمدە، سونداي-اق قازاقستاندا زياتكەرلىك ويىنعا قىزىعۋشىلىق ايتارلىقتاي ارتقانىن اتاپ ءوتتى. ونىڭ پىكىرىنشە، بۇل قۇبىلىستىڭ ءبىرقاتار سەبەپتەرى بار.

«ەڭ الدىمەن، كوۆيد پاندەمياسى بولعانىن ءبارىمىز بىلەمىز، سوندىقتان كوپتەگەن ادامدار ءتورت قابىرعاعا قامالىپ، ۇيدە وتىرۋعا ءماجبۇر بولدى. شىن مانىندە، شاحمات ينتەللەكتۋالدى ويىنعا اينالدى، ونى ويناۋ ءۇشىن ادامنىڭ قاي جەردە جۇرگەنى ماڭىزدى ەمەس، ۇيدە دە ويناۋعا بولادى. سونداي-اق، «پاتشايىم ءجۇرىسى» سەريالى ۇلكەن تانىمالدىلىققا يە بولدى، ول دا شاحماتتى تانىمال ەتۋدە ءرول اتقاردى. سونىمەن قاتار، سوڭعى ۋاقىتتا ادامدار تەك ساۋ دەنەگە عانا ەمەس، ويدىڭ ساۋلىعىنا دا ۇمتىلادى. شاحمات – پسيحيكالىق دەنساۋلىقتى ساقتاۋدىڭ تاماشا ءتاسىلى»، - دەپ ماگنۋس كارلسەن شاحماتقا دەگەن قىزىعۋشىلىقتىڭ ارتۋىنىڭ سەبەپتەرىن اتادى.

سونداي-اق چەمپيون كوپتەگەن شاحماتشىلاردىڭ كاسىبي پسيحولوگتاردىڭ قىزمەتىنە جۇگىنەتىنىن ايتتى. ءبىراق ءوزى ءۇشىن ول مۇنى قاجەت دەپ سانامايدى، ءبىراق ارىپتەستەرىنىڭ پسيحولوگتارمەن قارىم-قاتىناسىن جوعارى باعالايدى.
«مەن ءوزىمنىڭ نە ىستەپ جاتقانىمدى، قارسىلاستارىمنىڭ نە ىستەپ جاتقانىن جانە ءار ويىندا مەنىڭ جوعارىعا كوتەرىلۋىم مەن قۇلدىراۋىما نە سەبەپ بولاتىنىن جاقسى تۇسىنەمىن. ارينە، مەن جۇگىنىپ، كەڭەس الاتىن جاقىن ادامدارىم بار، ءبىراق ەشقاشان پسيحولوگتارعا جۇگىنبەپپىن»، - دەپ جاۋاپ بەردى ماگنۋس.
ول جۋرناليستەرگە چەمپيوناتقا قالاي دايىندالاتىنىن دا ايتىپ بەردى.
«بۇل وتە جەكە، مەندە ءدال وسىلاي جاسايمىن دەپ ويلاعان، ناقتى انىقتالعان ستراتەگيا جوق. مەن شاحمات تۋرالى ويلاۋدى ەشقاشان توقتاتقان ەمەسپىن. بۇل - ۇنەمى مەنىمەن ءومىر سۇرەتىن نارسە. مەن قالاي وينايمىن، كىممەن وينايمىن دەپ ويلايمىن. نە ىستەۋ كەرەك جانە نە ىستەمەۋ كەرەكتىگى تۋرالى كاسىپقويلار بولىسەتىن جالپى كەڭەستەر بار. تۇتاستاي العاندا، ولار بۇلىڭعىر، ەڭ باستىسى، باستا ماسەلەنى شەشۋگە دەگەن ۇمتىلىس بولۋى كەرەك. مەن وسىلاي دايىندالامىن. شاحمات مەنى يمپروۆيزاسيالاۋعا جانە ويلانۋعا جەتەلەيدى»، - دەدى ماگنۋس كارلسەن.
ءسوزىن قورىتىندىلاي كەلە، الەمدىك شاحمات جۇلدىزى بۇل تۋرنيردە ۇلكەن تارتىستى ويىن بولاتىنىن اتاپ ءوتتى.