ولاردىڭ كوبى تەلەفون، شپارگالكا قولدانۋ سياقتى ارەكەتتەرىمەن ەرەجە بۇزعان.
ماگيستراتۋعا تۇسۋدەن ۇمىتكەر 265 ادامنىڭ تەست ناتيجەسى جويىلدى، دەپ حابارلايدى Almaty-akshamy.kz ق ر عىلىم جانە جوعارى ءبىلىم مينيسترلىگىنىڭ باسپا ءسوز قىزمەتىنە سىلتەمە جاساپ.
تەستىلەۋ ناتيجەلەرىمەن كەلىسپەگەن جاعدايدا ونلاين-اپەللياسياعا بەرۋگە بولادى. اپەللياسياعا تەستىلەۋ اياقتالعاننان كەيىن 30 مينۋت ىشىندە ءوتىنىش بەرىلەدى، ءوتىنىش بەس كۇن ىشىندە قارالادى.
ۇلتتىق تەستىلەۋ ورتالىعى ماگيستراتۋراعا تۇسۋگە ارنالعان كەشەندى تەستىلەۋدىڭ ارالىق قورىتىندىسىن جاريالادى.
ورتالىقتىڭ حابارلاۋىنشا، تەستىلەۋ باستالعالى 35 مىڭعا جۋىق ادام ماگيستراتۋراعا ءتۇسۋ ءۇشىن ەمتيحان تاپسىرىپ، ولاردىڭ 45%-عا جۋىعى شەكتى بالل جيناعان. ورتاشا كورسەتكىش – 72 بالل. ءبىر قاتىسۋشى ماكسيمالدى 150 بالدىڭ 140-ىن جيناعان.
«تەستىلەۋ باستالعالى 265 قاتىسۋشىنىڭ ناتيجەسى جويىلدى. ونىڭ ىشىندە 144 وقۋعا ءتۇسۋشى سمارتفون، شپارگالكا جانە باسقا دا تىيىم سالىنعان زاتتاردى الىپ وتۋگە تىرىسقانى ءۇشىن تەست تاپسىرۋ مۇمكىندىگىنەن ايىرىلدى. كەشەندى تەستىلەۋ كەزىندە ەرەجەلەردى بۇزعانى ءۇشىن اۋديتوريادان 117 ادام شىعارىلىپ، ولاردىڭ ناتيجەلەرى جويىلدى. سونىمەن قاتار پوستپروكتورينگ قورىتىندىسى بويىنشا 4 ادامنىڭ ناتيجەسى جويىلدى. ولار ەمتيحان ماتەريالدارىن سۋرەتكە ءتۇسىرىپ، اۋديتوريادان الىپ شىعۋعا تىرىسقان»، - دەپ جازىلعان حابارلامادا.
ۇلتتىق ءبىرىڭعاي تەستىلەۋدەگى سەكىلدى كەشەندى تەستىلەۋگە كىرگىزۋ ءۇش دەڭگەيلى جۇيە بويىنشا جۇزەگە اسىرىلاتىنى بەلگىلى. Face ID جەكە باسىن سايكەستەندىرۋ ارقىلى، جەكە كۋالىك بويىنشا، سونداي-اق وتىرعىزۋ ورنىندا جەكە باسىن سايكەستەندىرۋ جۇرگىزىلەدى.
«تەستىلەۋدىڭ ءبىرىنشى اپتاسىندا كىرگىزۋ كەزىندە 4 بوگدە تۇلعا انىقتالدى. ياعني، قاتىسۋشىلار وزدەرىنىڭ ورنىنا باسقا ادامدى جىبەرىپ، تەستىلەۋدەن وتپەك بولعان. ءتيىستى شارالار قابىلداندى. كەشەندى تەستىلەۋدىڭ ەكىنشى اپتاسىندا بۇنداي ەرەجە بۇزۋشىلىقتار انىقتالعان جوق»،- دەلىنگەن ۇتو حابارلاماسىندا.
وسى اپتادا ازاماتتىق ەمەس جوعارعى وقۋ ورىندارى، اتاپ ايتساق جوعارعى سوت جانىنداعى سوت تورەلىگى اكادەمياسى، ق ر بپ جانىنداعى قۇقىق قورعاۋ ورگاندارى اكادەمياسى، ق ر ءىىم اكادەمياسى، ق ر تجم م. عابدۋللين اتىنداعى ازاماتتىق قورعاۋ اكادەمياسىنا تۇسۋگە تىركەلۋ اياقتالعان. وسى ساناتتاعى وقۋعا تۇسۋشىلەر ءۇشىن شەت تىلىنەن ءتۇسۋ ەمتيحانى 6 تامىزدا وتەدى.
ايتا كەتسەك، بيىل ماگيستراتۋراعا 13 مىڭنان استام گرانت بولىنگەن. كەشەندى تەستىلەۋ 20-شىلدەدە باستالدى، 10 تامىزدا اياقتالادى.