ماگيستراتۋراعا ءتۇسۋ ءۇشىن كەشەندى تەستىلەۋگە قاتىسۋعا وتىنىشتەر قابىلداۋ باستالدى.
تىركەۋ ق ر بعم ۇلتتىق تەستىلەۋ ورتالىعىنىڭ app.testcenter.kz سايتىندا 15 شىلدەگە دەيىن جۇرگىزىلەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ۇمىتكەرلەر ءبىلىم بەرۋ باعدارلامالارى توبى، تەستىلەۋدى وتكىزۋ ءتىلى مەن ورنىنا وتىنىمدەردى قابىلداۋ مەرزىمى اياقتالعانعا دەيىن وزگەرىستەر ەنگىزە الادى. تەستىلەۋ كۇنى تۋرالى اقپاراتتى ۇمىتكەر جەكە كابينەتىنەن الادى. ال، كەشەندى تەستىلەۋ 20 شىلدەدە باستالىپ، 10 تامىزعا دەيىن جالعاسادى.
بەلگىلى ءبىر ءبىلىم بەرۋ باعدارلاماسىنا قۇجاتتاردى تاپسىرار الدىندا تالاپكەرلەر ۋنيۆەرسيتەتتىڭ قابىلداۋ كوميسسياسىمەن كەشەندى تەستىلەۋدىڭ فورماتى جانە تاڭدالعان ءبىلىم بەرۋ باعدارلاماسى توبىنىڭ ماماندىعىنا سايكەستىگى تۋرالى كەڭەسۋى قاجەت. كەڭەستى ۋنيۆەرسيتەتتىڭ ۆيرتۋالدى قابىلداۋ كوميسسياسىنان دا الۋعا بولادى. 2022-2023 وقۋ جىلىنا ارنالعان ماگيستراتۋراعا 13 مىڭنان استام گرانت بولىنگەن. عىلىمي-پەداگوگيكالىق ماگيستراتۋراعا ءتۇسۋ ءۇشىن شەكتى بالل – 75، مامانداندىرىلعان ماگيستراتۋراعا – 50 بالل.
«كەشەندى تەستىلەۋ ەلەكتروندى فورماتتا وتكىزىلەدى جانە ءۇش بولىكتەن تۇرادى: شەت ءتىلى، وقۋعا دايىندىقتى انىقتاۋ جانە ءبىلىم بەرۋ باعدارلامالارى توبىنىڭ بەيىنى بويىنشا تەست. وعان 4 ساعات بەرىلەدى. شەت ءتىلىن ءبىلۋ دەڭگەيىن راستايتىن حالىقارالىق سەرتيفيكاتتارى بولسا، ۇمىتكەرلەر شەت تىلىنەن تەست تاپسىرۋدان بوساتىلادى»، - دەپ ءتۇسىندىردى ق ر بعم ۇلتتىق تەستىلەۋ ورتالىعىنىڭ ديرەكتورى رۋسلان ەمەلبايەۆ.
كەشەندى تەستىلەۋ ناتيجەلەرىمەن كەلىسپەگەن جاعدايدا، ۇمىتكەرلەر تەستىلەۋدەن وتكەننەن كەيىن ونلاين اپەللياسياعا بەرە الادى.