1 قاراشادان باستاپ ماگيستراتۋراعا ءتۇسۋ ءۇشىن كەشەندى تەستىلەۋگە قاتىسۋ ءۇشىن ءوتىنىش قابىلداۋ باستالدى.
تىركەلۋ عجبم ۇلتتىق تەستىلەۋ ورتالىعىنىڭ app.testcenter.kz سايتىندا 18 قاراشاعا دەيىن جۇرگىزىلەدى. تەستىلەۋدىڭ ءوزى 28 قاراشا مەن 11 جەلتوقسان ارالىعىندا وتەدى، دەپ حابارلايدى Almaty-akshamy.kz Elorda.info-عا سىلتەمە جاساپ.
تىركەلۋ كەزىندە ءتۇسۋشى تەستىلەۋدى تاپسىرۋ قالاسىن ءوز ەركىمەن تاڭدايدى. ۇمىتكەرلەر وتىنىشتەردى قابىلداۋ مەرزىمى اياقتالعانعا دەيىن (18 قاراشاعا دەيىن) ءبىلىم بەرۋ باعدارلامالارىنىڭ توبى، ءتىلى جانە تەستىلەۋدى تاپسىرۋ ورنى بويىنشا وتىنىشكە وزگەرىستەر ەنگىزە الادى. تەستىلەۋدى وتكىزۋ كۇنى تۋرالى اقپارات ءتۇسۋشىنىڭ جەكە كابينەتىندە 22 قاراشادا قولجەتىمدى بولادى.
«كەشەندى تەستىلەۋ ەلەكتروندىق فورماتتا وتكىزىلەدى جانە ءۇش بولىمنەن تۇرادى: شەت ءتىلى بويىنشا تەست، وقۋعا دايىندىعىن انىقتاۋعا ارنالعان تەست جانە ءبىلىم بەرۋ باعدارلامالارى توبىنىڭ بەيىنى بويىنشا تەست. بارلىعىنا 3 ساعات 55 مينۋت بەرىلەدى. شەت ءتىلىن مەڭگەرگەنىن راستايتىن حالىقارالىق سەرتيفيكاتتاردىڭ ءبىرى بار وقۋعا تۇسۋشىلەر شەت ءتىلى بويىنشا تەست تاپسىرۋدان بوساتىلادى»، – دەپ ءتۇسىندىردى عىلىم جانە جوعارى ءبىلىم ۆيسە-مينيسترى قۋانىش ەرعالييەۆ.
بيىل عىلىمي-پەداگوگيكالىق ماگيستراتۋراعا ءتۇسۋ ءۇشىن ءوتۋ 75 بالل، بەيىندىك ماگيستراتۋراعا ءتۇسۋ ءۇشىن 50 بالل جيناۋ قاجەت. كەشەندى تەستىلەۋ ناتيجەلەرىمەن كەلىسپەگەن جاعدايدا تۇسۋشىلەر تەستىلەۋ اياقتالعاننان كەيىن ونلاين-اپەللياسياعا بەرە الادى.
جازداعى تەستىلەۋدە ەرەجەنى بۇزعانى ءۇشىن تەستىلەۋگە جىبەرىلمەگەن، سونداي-اق ناتيجەلەرى جويىلعان تۇلعالار كەشەندى تەستىلەۋگە قايتا قاتىسۋعا جىبەرىلمەيتىنىن اتاپ وتكەن ءجون.
ماگيستراتۋراعا تۇسۋشىلەر 4 مىڭعا جۋىق مەملەكەتتىك ءبىلىم گرانتىنا ۇمىتكەر بولا الادى.