الەمدە جۇڭگو ۆاليۋتاسىنا دەگەن سۇرانىس ارتتى

جالپى جۇڭگو ءيۋانىنداعى اينالىم نارىقتىڭ 4%ء-ىن قۇرايدى.

"Bank for International Settlements" (حالىقارالىق ەسەپ ايىرىسۋ بانكى) قازان ايىنىڭ سوڭىندا   شەتەلدىك ۆاليۋتالاردىڭ بيرجادان تىس اينالىمىنا قاتىستى ءۇش جىلدىق شولۋ ەسەبىن جاريالادى، دەپ حابارلايدى Almaty-akshamy.kz Inbusiness.kz سىلتەمە جاساپ.

وعان سايكەس، بيىلعى ءساۋىر ايىندا بۇكىل الەم بويىنشا ۆاليۋتا ساۋداسىنىڭ ورتاشا كولەمى 7،5 ترلن دوللارعا جەتكەن. بۇل 2019 جىلعى كورسەتكىشتەن (6،6 ترلن دوللار) 14%-كە جوعارى.

الەم بويىنشا ءجيى ساۋدالاناتىن ۆاليۋتالار بەستىگى مىناداي: ءبىرىنشى ورىندا اينالىمى 6،6 ترلن دوللار -اقش دوللارى، ەكىنشى ورىندا اينالىمى 2،3 ترلن دوللاردى قۇرايتىن -ەۋرو، ءۇشىنشى ورىندا جاپون يەنى تۇر، ونىڭ اينالىمى 1،2 ترلن دوللار، ءتورتىنشى ورىندا 968 ملرد دوللار كولەممەن اينالىمدا جۇرەتىن فۋنست-ستەرلينگ، بەسىنشى ورىندا جۇڭگو ءيۋانى.  ونىڭ الەمدىك اينالىمى 526 ملرد دوللاردى قۇرايدى.

جالپى جۇڭگو ءيۋانىنداعى اينالىم نارىقتىڭ 4%ء-ىن قۇرايدى.  بانكتىڭ 2019 جىلعى ەسەبىندە ول سەگىزىنشى ورىنعا تۇراقتاعان ەدى.

ال، الەم بويىنشا اقش دوللارى جەتەكشى ۆاليۋتا بولىپ قالا بەرەدى، ونىڭ نارىقتاعى ۇلەسى  - 88%. ەۋرونىڭ نارىقتاعى ۇلەسى 30،5%، الايدا 2019 جىلعى ەسەپتە بۇل كورسەتكىش 32% بولاتىن.