قازاقستاندا ماگيستراتۋرا مەن دوكتورانتۋراعا قابىلداۋ تالاپتارى وزگەردى. بۇل جايىندا ەلىمىزدىڭ ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا ءمالىم ەتتى، دەپ حابارلايدى almaty-akshamy.kz
«جوعارى وقۋ ورىندارىنىڭ قاۋىمداستىعى مەن رەكتورلار كەڭەسى تامىز كەڭەسىنىڭ وتىرىسىندا ماگيستراتۋرا مەن دوكتورانتۋراعا قابىلداۋعا قاتىستى ۇسىنىستار ەنگىزگەن بولاتىن. ەگجەي-تەگجەيلى تالقىلاۋدان كەيىن ءبىز قابىلداۋ ەرەجەلەرىنە وزگەرىستەر ەنگىزۋ تۋرالى شەشىم قابىلدادىق. ەندى ماگيستراتۋرا مەن دوكتورانتۋراعا قابىلداۋ جىلىنا ەكى رەت وتكىزىلەدى. ياعني، ماگيستراتۋرا مەن دوكتورانتۋراعا ءتۇسۋ ەمتيحاندارى ءداستۇرلى تۇردە تامىز ايىندا جانە قوسىمشا جەلتوقسان ايىندا ۇيىمداستىرىلادى. وسى نورما 2021 جىلى كۇشىنە ەنەدى دەپ جوسپارلاپ وتىرمىز»، - دەپ جازادى مينيستر.
ونىڭ ايتۋىنشا، وسى ماقساتتا ۇلتتىق تەستىلەۋ ورتالىعىنىڭ قىزمەتكەرلەرى كەشەندى تەستىلەۋ مەن ءتۇسۋ ەمتيحاندارىن قوسىمشا ۇيىمداستىرادى. قۇجاتتاردى قابىلداۋ قاراشا ايىندا باستالادى.
«البەتتە، قۇجاتتارى مەن ەمتيحاندارىن تاپسىرۋعا، قاجەتتى سەرتيفيكاتتاردى الۋعا ۇلگەرمەگەن ازاماتتار ءۇشىن بۇل جاعىمدى جاڭالىق ەكەنى ءسوزسىز. جازعى قابىلداۋ ناۋقانى مەن وتكىزىلگەن ەمتيحانداردىڭ قورىتىندىسى بويىنشا ماگيستراتۋرا مەن دوكتورانتۋراعا ارنالعان ءبىلىم بەرۋ گرانتتارىنىڭ ارتىق قالۋىنا بايلانىستى ازاماتتار وسى جىلدىڭ جەلتوقسان ايىندا مەملەكەتتىك گرانتتاردى يەلەنە الادى. دايىندىق باعىتتارى بولىنىسىندە گرانتتاردىڭ سانى مەن قۇجاتتاردى قابىلداۋدىڭ ناقتى مەرزىمدەرى تۋرالى اقپارات قوسىمشا جاريالانادى»، - دەپ تۇيىندەدى ءسوزىن اسحات ايماعامبەتوۆ.