شارا ەكى ەل اراسىندا ديپلوماتيالىق قارىم-قاتىناس ورناعانىنىڭ 30 جىلدىعىنا ورايلاستىرىلعان.
ءمادريدتىڭ تاريحي ورتالىعىندا، اسەم ونەرلەر ورتالىعى كينوتەاترىندا ۇلتتىق كينونى قولداۋ مەملەكەتتىك ورتالىعى مەن قازاقستاننىڭ يسپانياداعى ەلشىلىگىنىڭ قولعابىسىمەن قازاقستان كينوسى كۇندەرىنىڭ رەسمي اشىلۋ ءراسىمى ءوتتى، دەپ حابارلايدى Almaty-akshamy.kz
سىرتقى ساياسي ۆەدومستۆونىڭ مالىمەتىنشە، شاراعا يسپانيانىڭ سىرتقى ىستەر، ەۋروپالىق وداق جانە ىنتىماقتاستىق مينيسترلىگىنىڭ وكىلدەرى، ديپلوماتيالىق كورپۋس، قازاقتاندىقتار دياسپورا، شەتەلدىك كينوسۇيەر قاۋىم قاتىستى.
كورسەتىلىم باستالار الدىندا سويلەگەن سوزىندە قازاقستان ەلشىسى كونستانتين جيگالوۆ بۇل شارا ەكى ەل اراسىندا ديپلوماتيالىق قارىم-قاتىناس ورناعانىنىڭ 30 جىلدىعىنا ورايلاستىرىلعانىن حابارلادى.
قازاقستاندىق ديپلومات ەكى ەل اراسىنداعى مادەني الماسۋدىڭ جوعارى دەڭگەيىن اتاپ ءوتتى.
ونىڭ ىشىندە سوڭعى جىلدارداعى «استانا وپەرا» مەملەكەتتىك وپەرا جانە بالەت تەاترى مەن قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ گاسترولدىك ساپارى، زاماناۋي قازاق پروزاسى مەن پوەزياسىنىڭ انتولوگياسىنىڭ يسپان تىلىندەگى تۇساۋكەسەرى بار.
ك. جيگالوۆ 2016 جىلدان بەرى «قازاقفيلم» كينوستۋدياسى مەن قازاقستان ەلشىلىگىنىڭ قولداۋىمەن بارسەلونادا وتەتىن جىل سايىنعى ازيا كينوفەستيۆالىندە قازاقستاندىق فيلمدەر تۇراقتى تۇردە كورسەتىلىپ كەلە جاتقانىنا توقتالدى.
اسەم ونەرلەر ورتالىعىندا رەجيسسەر ەرنار نۇرعالييەۆتىڭ «العا» جانە رەجيسسەر فارحاد ءشارىپوۆتىڭ «سحەما» فيلمدەرىنىڭ ەۋروپالىق پرەمەراسى ءوتىپ، وعان ف. ءشارىپوۆ جانە «العا» ءفيلمىنىڭ پروديۋسەرى ماكسيم اكباروۆ قاتىستى.