مادەنيەت جانە سپورت مينيسترلىگىنىڭ بارلىق قىزمەتكەرى ءبىر مەزەتتە، مەملەكەتتىك ءانۇراندى ورىندادى
4 ماۋسىم – قازاقستان رەسپۋبليكاسىنىڭ مەملەكەتتىك رامىزدەر كۇنى - ازاماتتىق بىرتەكتىلىكتى، ۇلتجاندىلىق پەن بىرلىگىمىزدى نىعايتاتىن مەرەكەنىڭ ءبىرى.
مەملەكەتتىك رامىزدەر كۇنى مەرەكەسىنە وراي بەكىتىلگەن ءىس-شارالار جوسپارىنا سايكەس، بۇگىن مادەنيەت جانە سپورت مينيسترلىگىنىڭ بارلىق قىزمەتكەرى ءبىر مەزەتتە، كارانتين تالاپتارىن ساقتاي وتىرا، مەملەكەتتىك ءانۇراندى ورىندادى، دەپ حابارلادى Almaty-akshamy.kz مينيسترلىكتىڭ باسپا ءسوز قىزمەتىنە سىلتەمەلەپ.
ايتا كەتەيىك، اتالعان ءىس-شارا بارلىق مينيسترلىكتە وتكىزىلدى.
انىقتاما:
«قازاقستان رەسپۋبليكاسىنىڭ مەملەكەتتىك رامىزدەرى تۋرالى» زاڭى 2007 جىلى 4 ماۋسىمدا قابىلداندى. وسى زاڭعا سايكەس، جىل سايىن 4 ماۋسىم قازاقستان رەسپۋبليكاسىندا مەملەكەتتىك رامىزدەر كۇنى رەتىندە مەرەكەلەنەدى.
بىلتىر مەملەكەت باسشىسىنىڭ تاپسىرماسىنا سايكەس، مەملەكەتتىك تۋىن جانە ەلتاڭباسىن جانە ولاردىڭ بەينەلەرىن، مەملەكەتتىك گيمنىنىڭ ءماتىنىن پايدالانۋ قاعيدالارىنا وزگەرىستەر ەنگىزىلدى.
ەنگىزىلگەن وزگەرىستەردىڭ ناتيجەسىندە ازاماتتارىمىز ءۇشىن مەملەكەتتىك تۋدى پايدالانۋ اياسى زاڭنامالىق تۇرعىدا كەڭەيتىلىپ وتىر.
اتاپ ايتقاندا، مەملەكەتتىك تۋدى جەكە جانە زاڭدى تۇلعالار عيماراتتاردا (تۇرعىن ۇيلەردە جانە تۇرعىن ەمەس ءۇي-جايلاردا)، ونىڭ ىشىندە بالكونداردا جانە سالتاناتتى ءىس-شارالار وتكىزىلەتىن ورىنداردا پاتريوتتىق سەزىمدەرىن، قازاقستاندىق بىرەگەيلىگىن ءبىلدىرۋ، ەلدىڭ، ونىڭ ازاماتتارىنىڭ جەتىستىكتەرىن قولداۋ ماقساتىندا پايدالانا الادى.
سونىمەن قاتار جەكە تۇلعالارعا وسى قاعيدالارعا ەنگىزىلگەن وزگەرىستەرگە سايكەس، مەملەكەتتىك تۋىن ءبىر قاباتتى جانە (نەمەسە) كوپ قاباتتى عيماراتتاردا ەكستەرەرلى نۇسقادا ورنالاستىرۋ كەزىندە عيماراتتىڭ ساۋلەت ەرەكشەلىكتەرىنە قاراماستان پايدالانۋ مۇمكىندىگى بەرىلدى.
جالپى العاندا، جوعارىدا كورسەتىلگەن وزگەرتۋلەر ەلىمىزدىڭ تۋىنىڭ قولدانىلۋ اياسىن ەداۋىر كەڭەيتەدى، ونىڭ قوعامداعى پاتريوتيزم رۋحىن نىعايتۋعا باعىتتالعان سيمۆولدىق كاپيتالىن جاڭاشا ۇعىنۋعا مۇمكىندىك بەرەدى.