مادەنيەت جانە سپورت ءمينيسترى اسحات ورالوۆ 35 جاستاعى اۋىر اتلەت ۆلاديمير سەدوۆتىڭ ولىمىنە قاتىستى پىكىر ءبىلدىردى، - دەپ حابارلايدى Almaty-akshamy.kz.
مينيسترلىك باسشىسى داڭقتى سپورتشىنىڭ سىڭىرگەن ەڭبەگىنە توقتالىپ، زىلتەمىرشىنىڭ تۋعان-تۋىستارى مەن جاقىندارىنا كوڭىل ايتتى،-دەپ جازدى Tengri Sport.
«بىرىنشىدەن، ارينە بۇل كورنەكتى سپورتشى ەكەنىن ايتقىم كەلەدى، سونىڭ ارقاسىندا ەلىمىزدىڭ تۋى بىرنەشە رەت وليمپ شىڭىنا كوتەرىلدى.
قازاقستان چەمپيوناتتارى مەن حالىقارالىق تۋرنيرلەردەگى تاماشا ناتيجە - بۇل ءبىزدىڭ اۋىر اتلەتيكانىڭ عانا ەمەس، جالپى قازاقستاندىق سپورتتىڭ تاريحىندا قالارى ءسوزسىز.
كورنەكتى سپورتشىنىڭ بارلىق تۋعان-تۋىستارى مەن جاقىندارىنا كوڭىل ايتامىن. ءقازىر قۇزىرلى ورگاندار بۇل ماسەلەنى تەكسەرىپ جاتىر. ارينە، بۇل ۇلكەن شىعىن. ءبىز تاعى دا كوڭىل ايتامىز. قۇزىرلى ورگانداردىڭ ساراپتاماسىنان كەيىن تولىق اقپارات بەرىلەدى»، - دەدى مينيستر.
ەسكە سالايىق، 27 ماۋسىمدا تانىمال قازاقستاندىق اۋىراتلەت ۆلاديمير سەدوۆ وزىنە قول جۇمساپ قايتىس بولعانى بەلگىلى بولدى.
ۆلاديمير سەدوۆ – قازاقستاننىڭ ەڭبەك سىڭىرگەن سپورت شەبەرى، 2008 جىلعى بەيجىڭ وليمپياداسىنىڭ قاتىسۋشىسى، قازاقستان رەسپۋبليكاسىنىڭ ءتورت دۇركىن چەمپيونى، 2010 جىلعى قازاقستان چەمپيوناتىنىڭ رەكوردسمەنى. ءساتتى ونەر كورسەتكەنى ءۇشىن «قۇرمەت» وردەنىمەن ماراپاتتالعان.