بۇل زاڭ جوباسىندا 50-دەن استام ناقتى تۇزەتۋلەر كوزدەلگەن.
تۋريزم جانە سپورت ءمينيسترى ەرمەك مارجىقپايەۆ لۋدومانيا جانە بۋكمەكەرلىك كەڭسەلەردىڭ جۇمىسىن بىرىكتىرۋ ماسەلەلەرى بويىنشا بايانداما جاسادى، دەپ حابارلايدى Almaty-akshamy.kz
ول ءوز سوزىندە مەملەكەتتىك ورگانداردىڭ پرەزيدەنت تاپسىرماسى بويىنشا پارلامەنت دەپۋتاتتارىمەن بىرلەسىپ، ازاماتتار اراسىنداعى قۇمار ويىنعا تاۋەلدىلىكپەن كۇرەسۋ ءۇشىن زاڭنامالىق، ۇيىمداستىرۋشىلىق جانە اقپاراتتىق-يدەولوگيالىق شارالار كەشەنىن قابىلداۋعا ءتيىس ەكەنىن ايتتى.
وكىنىشكە قاراي، قۇمار ويىننىڭ جەتەگىندە كەتىپ جاتقان جاستارىمىزدىڭ سانى كۇنارا ءوسىپ كەلەدى. وڭاي اقشا تابۋعا شاقىرعان ءتۇرلى جارناما جاستارىمىزدى قۇمار ويىنعا الداپ ءتۇسىرىپ جاتىر. قارىزعا باتقان كوپ وتباسى اجىراسىپ، ءتىپتى وز-وزىنە قول جۇمساۋشىلار دا بار. لۋدومانيا – ءبىزدىڭ قوعامدا ءقاۋىپتى دەرتكە اينالدى. مينيسترلىك ويىن بيزنەسىنە قارسى كۇرەس بويىنشا مەملەكەتتىك باقىلاۋ شەڭبەرىندە ءبىرقاتار كەشەندى شارالار قابىلداۋدا، – دەدى ەرمەك مارجىقپايەۆ.
ونىڭ ايتۋىنشا، بۇگىندە ەلىمىز بويىنشا ويىن بيزنەسىمەن اينالىسۋعا 28 ليسەنزيا بەرىلگەن. ونىڭ 5-ەۋى – كازينو، 8ء-ى – ويىن اۆتوماتتارى زالى، 13ء-ى – بۋكمەكەرلىك كەڭسە جانە 2-ەۋى – توتاليزاتور.
مەملەكەتتىك باقىلاۋ شەڭبەرىندە ويىن بيزنەسى قىزمەتتەرىنە تەكسەرۋ جۇرگىزىلىپ جاتىر. زاڭ بۇزىلعان جاعدايدا ولاردىڭ ليسەنزيالارىنىڭ كۇشى جويىلادى. بيىل تەكسەرىس ناتيجەسىندە 7 بۋكمەكەرلىك كەڭسەنىڭ، 5 توتاليزاتوردىڭ جانە 1 ويىن اۆتوماتتارى زالىنىڭ ليسەنزياسى توقتاتىلدى. ءقازىر سوت ارقىلى تاعى 3 بۋكمەكەرلىك كەڭسەنى ليسەنزيادان ايىرۋ ءراسىمى جۇرگىزىلۋدە.
مينيسترلىك AMANAT پارتياسى فراكسياسىمەن بىرلەسىپ، «ويىن بيزنەسى، بۋكمەكەرلىك كەڭسەلەر مەن لوتەرەيا قىزمەتتەرى» بويىنشا ارنايى زاڭ جوباسىن دايىندادى. بۇل زاڭ جوباسىندا 50-دەن استام ناقتى تۇزەتۋلەر كوزدەلگەن. ونىڭ ىشىندە بۋكمەكەرىك كەڭسەلەردىڭ جارناماسىن شەكتەۋ، تۇرعىن ءۇي، دۇكەندەردە، مەديسينا، ءبىلىم بەرۋ نىساندارىندا لوتوماتيكتەردى ورناتۋعا تىيىم سالۋ، ونلاين كازينونى ۇيىمداستىرۋشىلارعا قىلمىستىق جاۋاپكەرشىلىكتى بەلگىلەۋ، ونلاين كازينوعا، زاڭسىز بۋكمەكەرلىك كەڭسەلەرگە ترانزاكسيالار جاساۋعا تىيىم سالۋ، وتەلمەگەن قارىزى بار ازاماتتارعا، ونىڭ ىشىندە اليمەنتتىك جانە سالىقتىق جابىلماعان قارىزى بار ادامدارعا قۇمار ويىندارعا قاتىسۋعا تىيىم سالۋ مەن بۋكمەكەرلەردىڭ قارجى اينالىمىن ناقتى ءبىلۋ ءۇشىن سالىق ورگاندارىنىڭ قارجىلىق-اقپاراتتىق جۇيلەرىمەن ينتەگراسيالاۋ سياقتى تۇزەتۋلەر بار، – دەدى ول.
ءمينيستردىڭ ايتۋىنشا، 21 جاسقا تولماعان جاستاردى قۇمار ويىنعا زاڭسىز قاتىستىرعانى ءۇشىن جاۋاپقا تارتۋ كوزدەلگەن.