الماتىدا WKF كاراتەدەن جاستار مەن جاسوسپىرىمدەر اراسىنداعى XXI ازيا چەمپيوناتى مارەسىنە جەتتى.
الاتاۋ باۋرايىندا ۇيىمداستىرىلعان جارىسقا سارى قۇرلىقتىڭ 30-عا جۋىق ەلىنەن 600 تاتامي شەبەرى قاتىستى، دەپ حابارلايدى اlmaty-akshamy.kz.
جاستار مەن جاسوسپىرىمدەر اراسىنداعى بايراقتى باسەكەدە قازاقستان سپورتشىلارى 8 التىن، 5 كۇمىس جانە 11 قولا مەدال ولجالاپ، جالپىكوماندالىق ەسەپتە ەكىنشى ورىنعا يە بولدى. جاپونيا كاراتەشىلەرى 14 التىن، 5 كۇمىس، 4 قولا مەدالمەن كوش باستاسا، ۇزدىك ۇشتىكتى يران (5 التىن، 6 كۇمىس، 11 قولا) سپورتشىلارى تۇيىندەدى.
جارىستىڭ سوڭعى كۇنىندەگى كۋميتە باعدارلاماسىندا دياس اناربەكوۆ (+84 كگ)، بيعابىل جولامان (55 كگ)، اقنيەت شەريزات (50 كگ) پەن بەللا شاماشيەۆا (55 كگ) التىن تۇعىردان كورىنسە، اسقار ساپارعالييەۆ (87 كگ) پەن دايانا دارەنسكايا (68 كگ) فينالدا قارسىلاستارىنا ەسە جىبەرىپ، كۇمىس جۇلدە ەنشىلەدى. ال نيكيتا تارناكين (84 كگ)، نيكول سەنگەل (61 كگ) جانە ۆەنەرا جاقسىبايەۆا (+ 68 كگ) قولاعا قول جەتكىزدى.
«جاس كاراتەشىلەرىمىزدىڭ ازيا چەمپيوناتىنداعى كەرەمەت جەتىستىگى ەلىمىزدە اتالعان سپورت ءتۇرىنىڭ قارقىندى دامىپ كەلە جاتقانىنىڭ ايقىن كورىنىسى. بيىل كاراتەشىلەرىمىز حالىقارالىق جارىستاردا وتە ءساتتى ونەر كورسەتىپ جاتىر. ماسەلەن، ەلىمىزدىڭ ەرەسەكتەر قۇراماسى ازيا ويىندارىندا، الەم چەمپيوناتىندا توپ جارىپ، ۇزدىكتەر قاتارىنان كورىندى. ەندى مىنە، جاستارىمىز قۇرلىق دوداسىندا ءوز مىقتىلىقتارىن دالەلدەدى. ءبىزدىڭ قۇرامادا وسىنداي دارىندى جاس سپورتشىلار ءوسىپ كەلە جاتقانى قۋانتادى»، - دەپ اتاپ ءوتتى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى ەربول مىرزابوسىنوۆ.
ايتا كەتەيىك، بۇگىن كاراتەدەن ەرەسەكتەر اراسىنداعى 1ء-شى ازيا اشىق چەمپيوناتى باستالدى. جارىس 10 قاراشاعا دەيىن جالعاسادى.