ىسكەرلىك كەڭەس اياسىندا «سامۇرىق-قازىنا» مەن ARQ اراسىنداعى ىنتىماقتاستىق تۋرالى مەموراندۋمعا قول قويىلدى
شاراعا لوندون قور بيرجاسىنىڭ جانە قازاقستان رەسپۋبليكاسى سىرتقى ىستەر مينيسترلىگىنىڭ باسشىلىعى، قازاقستاندىق جانە بريتانيالىق ىسكەرلەر قاۋىمداستىعىنىڭ وكىلدەرى قاتىستى، دەپ حابارلايدى Almaty-akshamy.kz
«سامۇرىق-قازىنا» اق باسقارما ءتوراعاسى الماسادام ساتقالييەۆ لوندون قور بيرجاسىنىڭ كاپيتال نارىقتارى جونىندەگى توبىنىڭ جەتەكشىسى ميۋررەي رووسپەن كەزدەسىپ، «قازاتومونەركاسىپ» كومپانياسىن جەكەشەلەندىرۋ مىسالىندا قور مەن بيرجانىڭ ءتيىمدى ىنتىماقتاستىعىن تىلگە تيەك ەتتى. «قازاتومونەركاسىپ» اق اكسيالارىن جاريالى تۇردە ورنالاستىرۋ تۇڭعىش رەت نۇر-سۇلتان مەن لوندونداعى الاڭداردا 2018 جىلى جۇرگىزىلگەن. ال 2019 جانە 2020 جىلدارى قوسىمشا اكسيالار ورنالاستىرىلدى.
ناتيجەسىندە، «قازاتومونەركاسىپتىڭ» 25% ۇلەسى جەكە ينۆەستورلاردىڭ قولىنا ءوتىپ، كومپانيا 785 ملن دوللار كولەمىندە ينۆەستيسيا تارتتى. لوندون قور بيرجاسىنىڭ كاپيتال نارىقتارى جونىندەگى توبىنىڭ جەتەكشىسى ميۋررەي رووس «سامۇرىق-قازىنا» قورىمەن سەرىكتەستىكتىڭ الەۋەتى زور ەكەنىن ەرەكشە اتاپ ءوتتى. سونىمەن قاتار لوندوندا قازاقستان – بريتانيا ىسكەرلىك كەڭەسىنىڭ وتىرىسى ءوتتى. بۇل قۇرىلىمعا «سامۇرىق-قازىنا» قورىنىڭ باسشىسى الماسادام ساتقالييەۆ پەن ۇلىبريتانيانىڭ قازاقستانداعى ساۋدا ەلشىسى بارونەسسا ەمما نيكولسون تەڭ ءتوراعالىق ەتەدى. شاراعا قازاقستاندىق جانە بريتانيالىق ىسكەرلىك قاۋىمداستىقتىڭ وكىلدەرى جانە حالىقارالىق ينۆەستورلار قاتىستى.
بىرىككەن ۇلتتار ۇيىمىنىڭ كليماتتىڭ وزگەرۋىنە ارنالعان COP26 كونفەرەنسياسى قارساڭىندا وتىرىستا قارالعان باستى تاقىرىپتاردىڭ ءبىرى – تۇراقتى دامۋ مەن 2060 جىلعا دەيىن كومىرتەك بەيتاراپتىعىنا قول جەتكىزۋ ماسەلەسى. ىسكەرلىك كەڭەس اياسىندا «سامۇرىق-قازىنا» مەن ARQ اراسىنداعى ىنتىماقتاستىق تۋرالى مەموراندۋمعا قول قويىلدى. ARQ باسشىسى دجۋليانا ماكينتايەر مالىمدەگەنىندەي، بريتانيالىق ينۆەستورلار قازاقستان اۋماعىندا كومىر ءوندىرۋ قالدىقتارىن قايتا وڭدەيتىن كاسىپورىن قۇرىلىسىن جۇرگىزۋگە قىزىعۋشىلىق تانىتىپ وتىر.