اقشادان قىسىلعاندا لومباردقا جۇگىنىپ، "كەيىن جابا سالامىن" نەمەسە "اقشا تابىلسا قايتا ساتىپ الارمىن" دەپ ويلايتىندار ءالى بار. لومبارد قىزمەتتەرىنە قاتىستى وزگەرىستەر ەنگىزىلگەنىنە بىرنەشە جىل وتكەنمەن، كوپشىلىك ونىڭ نەسيە تاريحىنا قالاي اسەر ەتەتىنىن ەسكەرە بەرمەيدى. Aqshamnews.kz رەداكسياسى وسى ماسەلەنى ەسكە سالۋ ماقساتىندا ق ر قارجى نارىعىن رەتتەۋ جانە دامىتۋ اگەنتتىگىنە رەسمي ساۋال جولدادى. اگەنتتىكتىڭ جاۋابىنا سۇيەنە وتىرىپ، لومباردتان قارىز الۋشىلار ءۇشىن ماڭىزدى قۇقىقتىق جانە قارجىلىق تۇستاردى ساراپتاپ كوردى.
لومبارد قارىزى - ميكروكرەديت
2020 جىلدان باستاپ قازاقستانداعى بارلىق لومبارد ميكروقارجىلىق ۇيىمدار دەپ تانىلىپ، قارجى نارىعىن رەتتەۋ جانە دامىتۋ اگەنتتىگىنىڭ باقىلاۋىنا الىندى. وسى كەزدەن باستاپ لومباردتار جەكە تۇلعالارعا بەرەتىن قارىزدار ميكروكرەديت رەتىندە قاراستىرىلادى.
زاڭناماعا سايكەس، لومباردتار بەرىلگەن قارىزدار، ولاردى وتەۋ ءتارتىبى جانە مەرزىمى وتكەن بەرەشەكتەر تۋرالى اقپاراتتى كرەديتتىك بيۋرولارعا مىندەتتى تۇردە ۇسىنۋعا ءتيىس. بۇل دەرەكتەر قارىز الۋشىنىڭ نەسيە تاريحىنىڭ ءبىر بولىگىنە اينالىپ، سوڭعى اقپارات تۇسكەن كۇننەن باستاپ كەمىندە بەس جىل بويى ساقتالادى.
ەگەر لومباردقا وتكىزىلگەن التىن بۇيىم بەلگىلەنگەن مەرزىمدە قايتا الىنباسا، ول وتەلمەگەن قارىز رەتىندە ەسەپكە الىنادى.
لومبارد قارىزى يپوتەكا نەمەسە نەسيە الۋعا كەدەرگى بولا ما؟
لومبارد الدىنداعى قارىز ازاماتتىڭ يپوتەكالىق نەمەسە وزگە دە بانكتىك نەسيە الۋىنا تىكەلەي تىيىم سالمايدى. الايدا بانك نەسيە بەرۋ تۋرالى شەشىم قابىلداعان كەزدە قارىز الۋشىنىڭ قارجىلىق جاعدايىن جان-جاقتى باعالايدى.
اتاپ ايتقاندا، بانك:
- قارىز الۋشىنىڭ تابىسى مەن شىعىستارىن؛
- جالپى قارىزدىق جۇكتەمەسىن؛
- نەسيە تاريحىنداعى بارلىق مىندەتتەمەنى؛
- تولەم ءتارتىبىن ەسكەرەدى.
ەگەر لومباردتاعى قارىز ۋاقىتىلى وتەلىپ وتىرسا جانە مەرزىمى وتكەن بەرەشەگى بولماسا، نەسيە ماقۇلداۋ ىقتيمالدىعى ساقتالادى. ال كەشىكتىرىلگەن نەمەسە وتەلمەگەن قارىزدار تاۋەكەل فاكتورى رەتىندە باعالانادى.
لومباردقا ءجيى جۇگىنۋ بانك شەشىمىنە قالاي اسەر ەتەدى؟
لومباردقا التىن بۇيىمداردى نەمەسە وزگە دە باعالى زاتتاردى ءجيى قويۋ كەيبىر جاعدايلاردا قارجىلىق تۇراقسىزدىقتىڭ جاناما بەلگىسى رەتىندە قاراستىرىلۋى مۇمكىن. نەسيە الۋعا ءوتىنىش بەرگەن كەزدە بانك قارىز الۋشىنىڭ تولەم قابىلەتىن باعالاپ، ونىڭ كىرىس كوزدەرىنىڭ تۇراقتىلىعىنا دا نازار اۋدارادى.
لومبارد قىزمەتتەرىن ءجيى پايدالانۋ بانك الدىندا قارىز الۋشىنىڭ ۋاقىتشا قارجىلىق قيىندىقتارعا تاپ بولاتىنىن كورسەتۋى مۇمكىن. دەگەنمەن ءاربىر قارجى ۇيىمىندا نەسيە بەرۋ تۋرالى شەشىم قابىلداۋدىڭ وزىندىك ىشكى جۇيەسى بار، جانە بارلىق فاكتورلار كەشەندى تۇردە قاراستىرىلادى.
بانكتەر لومبارد قارىزىن قالاي ەسەپتەيدى؟
بانكتەر قارىز الۋشىنىڭ جالپى قارىزدىق جۇكتەمەسىن (جقج) ەسەپتەۋ كەزىندە لومبارد قارىزىن باسقا ميكروكرەديتتەرمەن تەڭ نەگىزدە ەسكەرەدى.
ەگەر قارىز الۋشىنىڭ تابىسىنا شاققانداعى اي سايىنعى تولەم مولشەرى جوعارى بولسا نەمەسە بىرنەشە ميكروكرەديت قاتار جۇرسە، بانك نەسيە سوماسىن ازايتۋى نەمەسە نەسيە بەرۋدەن باس تارتۋى مۇمكىن.
قارىز ۋاقىتىندا وتەلسە، نەسيە تاريحىنا قالاي اسەر ەتەدى؟
لومبارد قارىزى ۋاقتىلى جانە تولىق وتەلگەن جاعدايدا، ول نەسيە تاريحىندا وڭ اقپارات رەتىندە كورسەتىلەدى. بۇل قارىز الۋشىنىڭ تولەم ءتارتىبىن ساقتايتىنىن دالەلدەيدى.
نەگىزگى تاۋەكەل - قارىزدى وتەۋ مەرزىمىن وتكىزىپ الۋ.
قارىز وتەلمەي، كەپىلگە قويىلعان مۇلىك ساتىلسا نە بولادى؟
ەگەر قارىزدى وتەۋ مەرزىمى ءوتىپ كەتسە، لومبارد كەپىلگە قويىلعان مۇلىكتى كەمىندە 30 كۇن ساقتاۋعا مىندەتتى. وسى مەرزىمنەن كەيىن ونى ساتۋعا قۇقىلى.
كەپىلدەگى مۇلىك ساتىلعان جاعدايدا:
- لومباردپەن جاسالعان شارت توقتاتىلادى؛
- قارىز الۋشىنىڭ مىندەتتەمەلەرى جويىلادى.
الايدا قارىزدى وتەۋ مەرزىمىن وتكىزىپ العان بارلىق جاعدايلار نەسيە تاريحىندا ساقتالادى. ياعني، بەرەشەك مۇلىك ەسەبىنەن جابىلعانىمەن، كەشىكتىرۋ فاكتىسى ەسەپتە كورىنىس تابادى.
نەسيە تاريحىنداعى اقپاراتتى قالاي تۇزەتۋگە بولادى؟
ەگەر قارىز الۋشى ءوز نەسيە تاريحىنداعى مالىمەتتەرمەن كەلىسپەسە، ول كرەديتتىك بيۋروعا نەمەسە اقپارات بەرۋشى ۇيىمعا (لومباردقا) جازباشا ءوتىنىش بەرۋگە قۇقىلى.
ءوتىنىش 15 جۇمىس كۇنى ىشىندە قارالادى. ەگەر قاتە راستالسا، اقپارات 10 جۇمىس كۇنى ىشىندە تۇزەتىلەدى، ال قارىز الۋشىعا جاڭارتىلعان نەسيە ەسەبى ۇسىنىلادى.
يپوتەكا الۋدى جوسپارلاعان ازاماتتارعا ۇسىنىستار
ق ر قارجى نارىعىن رەتتەۋ جانە دامىتۋ اگەنتتىگى ازاماتتارعا:
- كرەديتورلار الدىنداعى بارلىق مىندەتتەمەلەردى شارتقا سايكەس جانە ۋاقىتىلى ورىنداۋدى؛
- قارجىلىق جاعدايدى جاڭا قارىزدارمەن كۇردەلەندىرمەۋدى؛
- ۋاقىتشا قيىندىقتار تۋىنداعان جاعدايدا كرەديتورلارمەن بەلسەندى ديالوگ جۇرگىزۋدى؛
- يپوتەكا نەمەسە ءىرى نەسيە الۋعا ءوتىنىش بەرمەس بۇرىن لومبارد قارىزدارىن تولىق جابۋدى ۇسىنادى.
لومبارد - جەدەل قارجىلىق كومەك كورسەتەتىن قۇرال. الايدا ول ازاماتتىڭ نەسيە تاريحىنا جانە بولاشاقتاعى قارجىلىق مۇمكىندىكتەرىنە اسەر ەتۋى مۇمكىن. سوندىقتان لومباردتان قارىز الماس بۇرىن ونىڭ قۇقىقتىق سالدارىن جانە ۇزاق مەرزىمدى ىقپالىن (اسەرىن) ەسكەرگەن ءجون.
قارجى ماسەلەسىندە ۋاقىتشا شەشىمدەر بار، ال نەسيە تاريحى - ۇزاق جىلدارعا قالاتىن قارجىلىق سەنىم كورسەتكىشى.