الماتى وبلىسى بويىنشا مەملەكەتتىك كىرىستەر دەپارتامەنتى الماتى وبلىسىنداعى بەس ساۋدا ورنىندا ليسەنزياسىز قىزمەت پەن اكسيزدەلەتىن ونىمدەردى زاڭسىز ساتۋدى انىقتادى.
بارلىعى 903 بوتەلكە ءارتۇرلى اتاۋداعى الكوگول ونىمدەرى تاۋارلارعا ارنالعان ىلەسپە جۇك قۇجاتىنسىز جانە 11 620 دانا سايكەستەندىرۋ قۇرالدارىمەن تاڭبالانباعان تەمەكى («Fast»، «Zumerret»، «Oscar» جانە ت.ب.) الىندى، دەپ حابارلايدى اlmaty-akshamy.kz.
اتالعان فاكتىلەر بويىنشا ق ر اكىمشىلىك قۇقىق بۇزۋشىلىق تۋرالى كودەكستىڭ 463، 283 جانە 283-1-باپتارى بويىنشا اكىمشىلىك ءىس-قۇجاتتار جيناقتالىپ، سوتقا جولداندى. اتالعان بۇزۋشىلىقتار ءۇشىن سالىق تولەۋشىلەرگە قۇقىق بۇزۋشىلىقتىڭ تىكەلەي نىساناسى بولعان اكسيزدەلەتىن تاۋارلار تاركىلەنىپ، 50-دەن 150 ايلىق ەسەپتىك كورسەتكىش مولشەرىندە ايىپپۇل سالىنادى.
ەسكە سالامىز! «ەتيل ءسپيرتى مەن الكوگول ءونىمىنىڭ ءوندىرىسىن جانە اينالىمىن مەملەكەتتىك رەتتەۋ تۋرالى» جانە «تەمەكى ونىمدەرىنىڭ ءوندىرىسى مەن اينالىمىن مەملەكەتتىك رەتتەۋ تۋرالى» قازاقستان رەسپۋبليكاسىنىڭ زاڭدارىنا سايكەس، قازاقستان رەسپۋبليكاسىنىڭ اۋماعىندا ءتيىستى ليسەنزياسىز، تاۋارلارعا ىلەسپە جۇك قۇجاتتارىنسىز جانە سايكەستەندىرۋ قۇرالدارىمەن تاڭبالانباعان اكسيزدەلەتىن ءونىمدى وتكىزۋگە تىيىم سالىنادى.