Sergek ساراپشىلارى كولىك قوزعالىسىن تالداۋ، مونيتورينگ جانە بولجاۋ ءۇشىن ينتەللەكتۋالدى كولىك جۇيەسىن (ITS) پايدالانا وتىرىپ، الماتىداعى كولىك اعىنىنا تابيعي وقيعالار مەن مەكتەپتەردەگى ساباقتاردىڭ توقتالۋى قالايشا اسەر ەتەتىنىن زەرتتەدى.
ەسەپ نەگىزىنە جەر سىلكىنىسى بولعان ءتۇن، 23 قاڭتاردا ساباقتىڭ توقتاتىلۋى، قالىڭ قار جاۋعان جانە قالىپتى اشىق كۇندەر الىنعان، دەپ حابارلايدى اlmaty-akshamy.kz.
23 قاڭتارعا قاراعان ءتۇنى ساعات 00:09-دا الماتىدا جەر استى ءدۇمپۋى تىركەلگەن. وسىعان وراي، Sergek ITS جۇيەسىنىڭ دەرەكتەرى قالادا كولىك قوزعالىسىنىڭ كۇرت وسكەنىن كورسەتتى. قوزعالىس بەلسەندىلىگى ورتا ەسەپپەن 4،5 ەسەگە ارتىپ، تۇنگى ساعات 01:00-دە شارىقتاۋ شەگىنە جەتىپ، تەك تاڭعى ساعات 5-تە عانا قالىپتى جاعدايعا ورالعان.
جەر سىلكىنىسىنەن كەيىنگى العاشقى ساعاتتا قالا جولدارىنداعى بىرەگەي كولىكتەردىڭ سانى 40%-عا ارتىپ، كەلەسى ساعاتتا ماكسيمۋم 208 مىڭ بىرلىككە جەتتى. بۇل وتكەن اپتانىڭ ءدال وسى ۋاقىتىمەن سالىستىرعاندا 267%-عا ارتىق. قالادان شىققان كولىكتەر سانى دا 152%-عا وسكەن، ەڭ ۇلكەن ءوسىم 01:00 مەن 02:00 ارالىعىندا 239%-دى قۇرادى. سونىمەن قاتار، الماتىدا 23 قاڭتاردا ءبىرىنشى اۋىسىمىنداعى سىنىپ وقۋشىلارى ءۇشىن ساباقتاردىڭ توقتاتىلۋىنا بايلانىستى تاڭەرتەڭگىلىك كولىك قوزعالىسى تومەندەلگەنى تىركەلگەن. الايدا، ورتاشا جىلدامدىق 25 پايىزعا ارتقان.
Sergek ساراپشىلارى قارلى كۇندەردىڭ الماتىداعى كولىك اعىنىنا اسەرىن دە ساراپتادى. زەرتتەۋ ناتيجەسىندە قار جاۋعان كۇندەرى كولىكتىڭ ورتاشا جىلدامدىعى ساعاتىنا ورتا ەسەپپەن 7 كم-گە تومەندەيتىنى انىقتالدى. ال جىلدامدىقتىڭ ماكسيمالدى تومەندەۋى تاڭعى ساعات 8-دە تىركەلگەن. سالىستىرمالى تۇردە، ەگەر اشىق كۇندەرى بۇل ۋاقىتتا جولدارداعى ورتاشا جىلدامدىق ساعاتىنا 44 كم بولسا، قار جاۋعان كەزدە بۇل كورسەتكىش 20%-عا دەيىن تومەندەيدى.
ەستەرىڭىزگە سالا كەتەيىك، Sergek ITS – Sergek قاۋىپسىزدىك جۇيەسىن جاساۋشى قازاقستاندىق IT ماماندارىنىڭ نەگىزگى ازىرلەمەلەرىنىڭ ءبىرى. جۇيە Sergek اپپاراتتىق-باعدارلامالىق جۇيەلەرىنەن الىناتىن «ۇلكەن» دەرەكتەردى (big data) پايدالانا وتىرىپ، كولىك جاعدايىن تالداۋ مەن مودەلدەۋگە مۇمكىندىك بەرەدى. بۇل ءوز كەزەگىندە ۋاكىلەتتى ورگاندارعا كولىك اعىندارىن تيىمدىرەك ۇيىمداستىرۋعا، سونداي-اق قالالىق ينفراقۇرىلىمدى جوسپارلاۋ نەمەسە وعان وزگەرىستەر ەنگىزگەن جاعدايدا نە بولاتىنىن ەسەپتەۋگە كومەكتەسەدى.