ۇلتتىق قۇراما ساپىنان پاريج وليمپياداسىنا ليسەنزيا جەڭىپ العان سپورتشىنىڭ ءبىرى – وق اتۋ سپورتىنىڭ وكىلى الەكساندرا لە. وتانداسىمىز دجاكارتادا (يندونەزيا) وتكەن وق اتۋدان ليسەنزيالىق ازيا چەمپيوناتىندا وليمپيادا جولداماسىن جەڭىپ الدى، دەپ حابارلايدى اlmaty-akshamy.kz.
50 مەتردەن پنيەۆماتيكالىق ۆينتوۆكادان وقۋ اتۋ جارىسىنىڭ فينالىندا الەكساندرا لە جەتىنشى ورىنعا تابان تىرەپ، قۇراما قورجىنىنا كەزەكتى وليمپيادا ليسەنزياسىن سالدى.
«بۇل – مەن ءۇشىن كۇتپەگەن جاڭالىق بولدى. وليمپياداعا جولداما جەڭىپ العانىمدى ەڭ ءبىرىنشى باپكەرىمنەن ءبىلدىم. ول فينالدان كەيىن مەن ليسەنزيا جەڭىپ العانىمدى ايتپاعاندا، بىلمەس ەدىم. قۋانىشتى جاڭالىقتى ەستىگەندە قاتتى تاڭ قالدىم»، - دەپ الەكساندرا سول كەزدەگى ەموسياسىمەن ءبولىستى.
كەيىپكەرىمىز كاسىبي سپورتپەن 2017 جىلدان بەرى اينالىسىپ كەلەدى. ونىڭ بۇل سپورت تۇرىمەن شۇعىلدانۋىنا سىنىپتاسى سەبەپشى بولعان. وق اتۋ سپورتىنىڭ جاتتىعۋىنا بارماي تۇرىپ الەكساندرا مۇنداي كاسىبي سپورت ءتۇرى بار ەكەنىن بىلمەگەن. جاس سپورتشىنىڭ سپورتتاعى العاشقى قادامدارى ءساتتى باستالعان سوڭ، ول بۇل سپورت تۇرىمەن شىنداپ اينالىسا باستاعان.
«مەن بۇل سپورتقا كەلگەندە وليمپياداعا قاتىسۋدى، ەڭ ۇزدىك ناتيجە كورسەتۋدى ارمانداپ، ءوز الدىما ماقسات قويا باستادىم. ەگەر ءسىز ءوز كۇشىڭىزدى تولىق كورسەتە الساڭىز، مىندەتتى تۇردە جەڭىسكە جەتەسىز. مەن بوي تۇزەپ، سول سياقتى بولعىم كەلەتىن جالعىز ادام بار، ول – مەنىڭ جاتتىقتىرۋشىم. ياعني، ۇلتتىق قۇرامانىڭ باس باپكەرى – ولگا دوۆگۋن. مەن ونىمەن جۇمىس ىستەۋ ءۇشىن ۇلتتىق كوماندا قاتارىنا قاتتى قوسىلعىم كەلدى. مەن ولگا دوۆگۋنمەن بىرگە جۇمىس ىستەگەندى جاقسى كورەمىن»، - دەيدى سپورتشى.
ءوز كەزەگىندە ۇلتتىق قۇرامانىڭ باس باپكەرى جانە الەكساندرانىڭ جەكە جاتتىقتىرۋشىسى جاس قىزدىڭ كاسىبيلىگى جوعارى دەڭگەيدە ەكەنىن اتاپ وتەدى. ونىڭ ايتۋىنشا، الەكساندرا وزگە سپورتشىلاردان ءوزىنىڭ تالانتىمەن، ادالدىعىمەن ەرەكشەلەنىپ تۇرادى.
«ماعان ونىڭ ەڭ ۇنايتىن قاسيەتى، ول ساتسىزدىككە ۇشىراسا دا ءوز قاتەلىگىن سۇراۋدان، جاڭا ءبىر نارسە ۇيرەنۋدەن ەشقاشان قورىقپايدى. ول ءارقاشان ءوز ويىن ماعان ايتىپ وتىرادى. شاكىرتىم جارىس جولىنا شىققاندا مەن قولداۋ ءبىلدىرۋ ءۇشىن ۇنەمى ونىڭ ارتىندا وتىرۋعا تىرىسامىن. ول ونى سەزەدى. ءتىپتى، ءتاۋىر ناتيجە كورسەتىپ جاتسا دا مەنەن قولداۋدى قاتتى كۇتەدى»، - دەيدى ولگا دوۆگۋن.
كەيىنگى جىلدارى الەكساندرا ىشكى جارىستاردا دا، حالىقارالىق باسەكەلەردە دە ۇزدىك ناتيجە كورسەتىپ ءجۇر. ماسەلەن، ول ەل چەمپيوناتىندا ءبىر التىن، ءۇش كۇمىس جانە 1 قولا مەدال جەڭىپ السا، وڭتۇستىك كورەيادا وتكەن ازيا چەمپيوناتىندا 2 قولا مەدال ولجالادى. ول ءوزىنىڭ جەتىستىككە جەتۋىندە جاقىندارىنىڭ قولداۋى ماڭىزدى ءرول اتقاراتىنىن اتاپ ءوتتى.
«ءبىر كەزدەرى اكەم ماعان «سەنى بۇكىل الەم تانيتىن بولادى» دەپ ايتقانى بار، ءبىراق ول قانداي جولمەن تانىلاتىنىمدى ايتقان جوق. مەنىڭ ويىمشا، قولدا تۇرعان مۇمكىندىكتى ەشقاشان جىبەرمەۋ كەرەك. مەن تەگىممەن ءارقاشان ماقتانامىن. ەگەر تەگىم وسى جەردە (ازيا چەمپيوناتىندا) كوپشىلىكتىڭ ەسىندە قالسا، وندا بۇكىل الەمنىڭ ەسىندە قالادى دەگەن ءسوز»، - دەيدى لە.