قازاقستاننىڭ لاتۆياداعى ەلشىلىگى لاتۆيانىڭ ەكونوميكا ينستيتۋتىمەن بىرلەسە وتىرىپ، لاتۆيا عىلىم اكادەمياسىندا قازاقستان رەسپۋبليكاسى تاۋەلسىزدىگىنىڭ 30 جىلدىعىنا ورايلاستىرىلعان «قازاقستانداعى رەفورمالار – نيەتتەن ىس-ارەكەتكە» تاقىرىبىندا دوڭگەلەك ۇستەل وتكىزدى، دەپ حابارلايدى almaty-akshamy.kz «حابار 24» سىلتەمە جاساپ.
ق ر سىرتقى ىستەر مينيسترلىگىنىڭ حابارلاۋىنشا، قازاقستان ەلشىسى تيمۋر پىرىمبەتوۆ قازىرگى ۋاقىتتا ەلدە پرەزيدەنت قاسىم-جومارت توقايەۆتىڭ باسشىلىعىمەن جۇرگىزىلىپ جاتقان ساياسي جانە الەۋمەتتىك-ەكونوميكالىق وزگەرىستەر تۋرالى بايانداما جاسادى. اۋديتوريانىڭ نازارى تاۋەلسىز دامۋدىڭ ءۇش ونجىلدىعى ىشىندەگى مەملەكەتتىڭ نەگىزگى جەتىستىكتەرىنە اۋدارىلدى.
ديپلوماتتىڭ ايتۋىنشا، ولاردىڭ ءارقايسىسى جاس مەملەكەتتىڭ ەگەمەندىگىن، ۇلتتىق ەكونوميكاسىن، ىشكى جانە سىرتقى ساياساتىن، حالىقارالىق بەدەلىن نىعايتۋدا ماڭىزدى كەزەڭگە اينالدى. تۇڭعىش پرەزيدەنت ن. ءا. نازاربايەۆتىڭ ەلدىڭ قالىپتاسۋى مەن بۇكىل الەمدە تانىلعان مەملەكەتتىك قۇرىلىستىڭ قازاقستاندىق مودەلىن قالىپتاستىرۋداعى نەگىزگى ءرولى اتاپ ءوتىلدى.
دوڭگەلەك ۇستەل جۇمىسىنا لاتۆيا سەيمىنىڭ ءبىرقاتار دەپۋتاتتارى قاتىستى. اتاپ وتكەندە، ۋلديس اۋگۋليس – «جاسىلدار مەن شارۋالار وداعى» پارلامەنتتىك فراكسياسىنىڭ باسشىسى جانە قازاقستان پارلامەنتىمەن ىنتىماقتاستىق جونىندەگى توپتىڭ جەتەكشىسى، ارماند كراۋزە – سىرتقى ىستەر جونىندەگى پارلامەنتتىك كوميتەتتىڭ مۇشەسى، ليۋبوۆ شيەۆسوۆا – قازاقستان پارلامەنتىمەن ىنتىماقتاستىق جونىندەگى توپ باسشىسىنىڭ ورىنباسارى، سونداي-اق ييەۆا سيلينا – لاتۆيا پرەزيدەنتىنىڭ عىلىم جانە ءبىلىم جونىندەگى كەڭەسشىسى، اكادەميك بايبا ريۆجا – لاتۆيا عىلىم اكادەمياسى ءتورالقاسىنىڭ مۇشەسى، يانيس ۆاناگس – ەكونوميكا ينستيتۋتىنىڭ جەتەكشى ەكونوميستى، ريگا تەحنيكالىق ۋنيۆەرسيتەتىنىڭ پروفەسسورى، ريتۋمس روزەبەرگس – «Netkariga Rita avize» گازەتىنىڭ ساياسي شولۋشىسى، الەكساندر ۆيدياكين – بالتىق-قازاقستان ەكونوميكالىق ىنتىماقتاستىق قاۋىمداستىعىنىڭ ءتوراعاسى جانە لاتۆيا ەكونوميكا ينستيتۋتىنىڭ وزگە دە ساراپشىلارى.
ءىس-شارانىڭ مودەراتورى لاتۆيا عىلىم اكادەمياسى ەكونوميكا ينستيتۋتىنىڭ ديرەكتورى نينا ليندە بولدى. سىندارلى پىكىرتالاس بارىسىندا ۋ. اۋگۋليس، ا. كراۋزە، ل. شيەۆسوۆا، ب. ريۆجا جانە يا. ۆاناگس ءسوز سويلەدى، ولار پرەزيدەنت ق. توقايەۆتىڭ ودان ءارى دەموكراتيالاندىرۋعا، ازاماتتىق ينستيتۋتتاردى نىعايتۋعا، مەملەكەتتىك باسقارۋ تەتىكتەرىن جەتىلدىرۋگە، قازاقستاندىقتاردىڭ ءومىر ساپاسى مەن دەڭگەيىن ارتتىرۋعا باعىتتالعان اۋقىمدى جاڭعىرتىلعان كۇن ءتارتىبىن جوعارى باعالادى.
سونىمەن قاتار، مەملەكەت باسشىسى العا قويعان ستراتەگيالىق ماقساتتار مەن مىندەتتەر الەمدىك ساياسات پەن ەكونوميكانىڭ كوۆيد-19 پاندەمياسىنان كەيىنگى دامۋىنىڭ باسىمدىقتارىمەن ناقتى ۇيلەسەتىنى اتالدى.
ءىس-شاراعا قاتىسۋشىلار ءتۇرلى سالالاردا ورتاق مۇددەلەردىڭ بار ەكەنىنە توقتالىپ، قازاقستان مەن لاتۆيا اراسىنداعى ىنتىماقتاستىقتىڭ قولدا بار الەۋەتىن ءتيىمدى پايدالانۋ قاجەتتىگىمەن كەلىستى.