پرەزيدەنت جانىنداعى ورتالىق كوممۋنيكاسيالار قىزمەتىندە مەرزىمدى اسكەري قىزمەتكە شاقىرۋدىڭ كۇزگى ناۋقانى جونىندە قورعانىس مينيسترلىگىنىڭ بريفينگى ءوتتى.
بريفينگ بارىسىندا اسكەري قىزمەتتىڭ تارتىمدىلىعى جانە ودان جالتارۋ جاۋاپكەرشىلىگى توڭىرەگىندەگى ماسەلەلەر تالقىلاندى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
قورعانىس مينيسترلىگىنىڭ، ۇلتتىق ۇلاننىڭ جانە ۇقك شەكارا قىزمەتىنىڭ اسكەرگە شاقىرۋعا جاۋاپتى لاۋازىمدى تۇلعالارى جۋرناليستەردىڭ سۇراقتارىنا جاۋاپ بەردى.
ق ر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتى باستىعىنىڭ ورىنباسارى پولكوۆنيك فارحات ايداربايەۆ قازىرگى اسكەرگە شاقىرۋدىڭ ەرەكشەلىگى شاقىرۋ ناۋقانىنىڭ اشىقتىعى جانە جاستاردىڭ مەرزىمدى اسكەري قىزمەتكە دەگەن سانالى قادامى دەپ اتاپ ءوتتى.
– وسى كۇزدە ەل قارۋلى كۇشتەرىنە – 10000-عا جۋىق، ۇلتتىق ۇلانعا – 6 مىڭنان اسا ادام شاقىرىلادى، ۇقك شەكارا قىزمەتىنە - ءۇش جارىم مىڭعا جۋىق اسكەرگە شاقىرىلۋشى، توتەنشە جاعدايلار مينيسترلىگىنە – 300-دەن استام جانە مەملەكەتتىك كۇزەت قىزمەتىنە 250-دەن اسا ادام ىرىكتەلمەك، – دەپ مالىمدەدى فارحات ايداربايەۆ.
ول ساربازداردىڭ اسكەردەگى قىزمەتتىك ارەكەتى قوعامنىڭ باقىلاۋىندا ەكەنىن اتاپ ءوتتى. ساربازدار انالارى كوميتەتىنىڭ وكىلدەرىنە كەز كەلگەن ۋاقىتتا قارۋلى كۇشتەردىڭ، باسقا اسكەرلەر مەن اسكەري قۇرالىمداردىڭ اسكەري بولىمدەرىنە بارۋعا رۇقسات ەتىلەدى. «وتباسىمەن بەينەقوڭىراۋ» سەرۆيسى جۇمىس ىستەيدى. بۇل ساربازدارعا تۋعان-تۋىستارىمەن بەينە بايلانىس ارقىلى حابارلاسۋعا مۇمكىندىك بەرەدى.
قورعانىس ۆەدومستۆوسىنىڭ وكىلى وعان قوسا مەرزىمدى قىزمەتتەگى اسكەري قىزمەتشىلەرگە قاتىستى قولدانىلاتىن پرەفەرەنسيالارعا دا توقتالىپ ءوتتى.
بەلگىلەنگەن ۋاقىتتا اسكەري بورىشىن وتەگەن، جاۋىنگەرلىك جانە مەملەكەتتىك-قۇقىقتىق دايارلىقتا جوعارى ناتيجەلەر كورسەتكەن جاستارعا گرانتتار ءبولۋ جانە جوعارى وقۋ ورىندارىنان جاتاقحانا بەرۋ نورمالارى زاڭ جۇزىندە بەكىتىلگەن.
جوعارى وقۋ ورىندارى بويىنشا ساربازداردىڭ رەيتينگىن انىقتاۋ جانە ءبولۋ «سروچنيكي 2.0» سيفرلىق پلاتفورماسىندا اۆتوماتتى تۇردە ىسكە اسىرىلادى. جوعارى وقۋ ورنىنا تۇسۋگە دايىندالۋ ءۇشىن اسكەري قىزمەتشىلەرگە ەلەكتروندىق كىتاپحانانى پايدالانۋعا مۇمكىندىك جاسالعان.
قارجى ۇيىمدارى الدىندا قارىزى بار ساربازدارعا 14 اي مەرزىمگە كرەديتتىك دەمالىس بەرۋ – اسكەري قىزمەتكە ىنتالاندىرۋدىڭ تاعى ءبىر فاكتىسى.
كەزدەسۋ سوڭىندا پولكوۆنيك فارحات ايداربايەۆ اسكەردەن جالتارۋ سوڭى ايىپپۇلدار مەن اكىمشىلىك جازالارعا اكەپ سوقتىراتىنىن، ال ءۇشىنشى تۇلعالار ارقىلى مەرزىمدى اسكەري قىزمەتتى كەيىنگە قالدىرۋ نەمەسە بوساتۋ ارەكەتتەرى زاڭسىز ەكەنىن ەسكە سالدى.
– اسكەرگە شاقىرۋدى كەيىنگە قالدىرۋ جانە ودان بوساتۋ مەملەكەتتىك قىزمەت ءتۇرى بولعاندىقتان، ول قىزمەت ازاماتتارعا «ەلەكتروندىق ۇكىمەت» پورتالى ارقىلى كورسەتىلەدى. بۇل قىزمەتتەردى كورسەتۋگە جەرگىلىكتى اتقارۋشى ورگاندار جاۋاپتى، – دەپ ءسوزىن تۇيىندەدى پولكوۆنيك فارحات ايداربايەۆ.