الماتىدا قوعامدىق كەڭەستە ءىرى شاھارداعى جول قاۋىپسىزدىگى ماسەلەسى تالقىلاندى.
قالالىق پوليسيا دەپارتامەنتىنىڭ باستىعى ارىستانعاني زاپپاروۆ جولدار مەن كوشەلەردە بالامالى كولىك، موپەدتەر مەن ەلەكتروساموكاتتاردىڭ پايدا بولۋىمەن جول-كولىك وقيعالارىنىڭ كوبەيگەنىن ايتتى،دەپ حابارلايدى aqshamnews.kz Polisia.kz-كە سىلتەمە جاساپ.
جىل باسىنان بەرى موپەدتەردىڭ قاتىسۋىمەن 743 جول-كولىك وقيعاسى تىركەلدى، سالدارىنان 14 ادام قازا تاپتى، تاعى 757 ادام جاراقات العان. ال ساموكاتتاردىڭ قاتىسۋىمەن 103 جول-كولىك وقيعاسى بولدى، 109 ادام زارداپ شەكتى، ابىروي بولعاندا، قازا بولعاندار جوق.
– موپەديستەر مەن ساموكاتتار جينالاتىن ورىنداردا 8 موتوەكيپاج تۇراقتى تۇردە پاترۋلدەۋ جۇمىستارىن جۇرگىزەدى. 32 مىڭعا جۋىق موپەديست پەن 28 مىڭنان استام ەلەكتروساموكات پايدالانۋشىسى اكىمشىلىك جاۋاپكەرشىلىككە تارتىلدى. مامانداندىرىلعان ايىپپۇل تۇراعىنا 1700 موپەد قويىلدى. سونداي-اق 100-دەن استام اتا-انا بالالارىنا ساموكات پەن موپەد جۇرگىزۋگە رۇقسات بەرگەنى ءۇشىن جاۋاپقا تارتىلدى. الدىن الۋ ماقساتىندا دەپارتامەنت اكىمدىكپەن، سونداي-اق كيكشەرينگ كومپانيالارىمەن جانە موتو مەكتەبىمەن بىرلەسە وتىرىپ، جۇرتشىلىقتىڭ نازارىن جول قوزعالىسى قاۋىپسىزدىگىنە، جول قوزعالىسى ەرەجەلەرىن قاتاڭ ساقتاۋعا، ەلەكتروساموكاتتاردى، موپەدتەردى جانە موتوسيكلدەردى دۇرىس جانە ءقاۋىپسىز جۇرگىزۋ بىلىكتىلىكتەرىن ارتتىرۋعا اۋدارۋ ماقساتىندا “ERKIN QOZGALYS” ناۋقانىن وتكىزدى، – دەدى، ارىستانعاني زاپپاروۆ.
جالپى، قالالىق پوليسيا باسشىسىنىڭ ايتۋىنشا، جىل باسىنان بەرى شاھار جولدارىندا 3 420 483 جول ەرەجەسىن بۇزۋ دەرەگى انىقتالسا، ونىڭ 1890-ى كولىكتى ماس كۇيىندە باسقارعاندار بولعان.