جاسوسپىرىمدەرگە سالۋعا بولاتىن الەمدەگى جالعىز ۆاكسينا امەريكالىق Pfizer قازاقستانعا جىلدىڭ سوڭىندا اكەلىنەدى دەپ جوسپارلانىپ وتىر.
قازان ايىنان باستاپ 2 ميلليون ءجاسوسپىرىم كوروناۆيرۋسقا قارسى ەكپە الادى، دەپ حابارلايدى Almaty-akshamy.kz
ق ر دەنساۋلىق ساقتاۋ ءمينيسترى الەكسەي سويدىڭ ايتۋىنشا، 12 مەن 18 جاس ارالىعىنداعى بالالار مەن جاسوسپىرىمدەرگە اتا-اناسىنىڭ نەمەسە اسىراۋشىسىنىڭ رۇقساتىمەن عانا ەكپە سالىنادى.
الەكسەي سوي ءقازىر مىڭداعان ازامات بالالارىنا ۆاكسينا سالعىزۋدى سۇراپ وتىرعانىن ايتتى. ويتكەنى، ۆيرۋستىڭ «دەلتا» شتامى تەك ەرەسەكتەر عانا ەمەس، بالالاردىڭ اراسىندا دا جىلدام تارالۋدا.
ءدال وسى مۋتاسيالىق ۆيرۋستان سولتۇستىك قازاقستان وبلىسىندا تاياۋدا 1 جاستان اسقان بوبەك قايتىس بولدى. دارىگەرلەر كىشكەنتاي بالاعا ۆيرۋس اتا-اناسىنان جۇققانىن حابارلادى. جىل باسىنان بەرى قازاقستاندا 34 مىڭ بالا كوروناۆيرۋس جۇقتىرىپ، ونىڭ ەكەۋى كوز جۇمعان. ءقازىر 558 بالا ستاسيونارلىق اۋرۋحانادا ەمدەلىپ جاتىر. ۆيرۋس جۇقتىرعان جاڭا تۋعان 13 نارەستە دارىگەرلەردىڭ باقىلاۋىندا بولسا، 4 ءسابيدىڭ جاعدايى اۋىر.
دەنساۋلىق ساقتاۋ ءمينيسترى الەكسەي سوي جاسوسپىرىمدەرگە ۆاكسينا سالۋ ارقىلى بالالاردىڭ عانا ەمەس، ۆاكسيناعا قارسى كورسەتىلىمى بار ەرەسەكتەردىڭ دە ءومىرىن ساقتاپ قالۋعا بولاتىنىن مالىمدەدى. ايتا كەتەيىك، Pfizer ەكپەسى 12 جاسقا تولماعان بالالارعا سالىنبايدى.