كۇزدە ينفلياسيا تەجەلەدى – ماقسات حالىق

يپوتەكالىق كرەديتتەردىڭ پايىزى ءوسىپ كەتەتىن بولسا، وندا ءۇيدى يپوتەكاعا الاتىن ادامداردىڭ سانى ازايادى

جىل باسىندا 9،75 پايىز بولعان بازالىق ستاۆكا ەندى 14،5 پروسەنتكە جەتتى، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.

ساراپشىلاردىڭ ايتۋىنشا، ۇلتتىق بانكتىڭ مۇنداي شەشىمى دەپوزيتتە اقشالارى بار ازاماتتار ءۇشىن ءتيىمدى. ويتكەنى وعان قوسىلاتىن ۇستەمەقى دا ارتادى. ال جاڭادان كرەديت الاتىندار ءۇشىن نەسيە قىمباتقا تۇسەدى. ەكونوميست ماقسات حالىقتىڭ ايتۋىنشا، بازالىق ستاۆكانى ينفلياسيادان تومەن ۇستاسا، تاۋەكەل جوعارى بولادى. كەيىن ينفلياسيا جىلدام ارتىپ، تۇركيالىق سەناريي بولۋى مۇمكىن دەيدى. مۇنداي سالدار بولماس ءۇشىن، بازالىق ستاۆكا نە تەڭەسۋ كەرەك، نەمەسە جوعارى بولۋى شارت. سوندا ءبىرقاتار سۇرانىس شەكتەلىپ، بەلگىلى ءبىر دارەجەدە تاۋارلاردىڭ باعاسى تۇسە باستاۋى كەرەك. 

«يپوتەكالىق كرەديتتەردىڭ پايىزى ءوسىپ كەتەتىن بولسا، وندا ءۇيدى يپوتەكاعا الاتىن ادامداردىڭ سانى ازايادى. بۇل تۇرعىدا، كەرىسىنشە، سۇرانىس ازايۋىنىڭ ناتيجەسىندە ءۇيدىڭ باعاسى قاتتى وسپەيدى. كەرىسىنشە، ءوسىم پروسەسى توقتاپ قالۋى مۇمكىن. كۇزدە، قىركۇيەكتە، بىزدە ينفلياسيا كىشكەنە تەجەلەدى. ينفلياسيانىڭ كىشكەنە بولسا دا، تۇساۋلاناتىن ۋاقىتى. ول كەزدە بازالىق پايىزدىڭ مولشەرلەمەسىن ءوسىرۋدىڭ نەگىزى جوق. كەرىسىنشە، مۇمكىن بولسا، تومەندەتكەن دۇرىس»، - دەدى ەكونوميست ماقسات حالىق.