قوعامدىق كولىكپەن قاتىناۋ باعاسى – 80 تەڭگە
الماتىدا قاتىنايتىن №41 اۆتوبۋستىڭ مارشرۋتى وبلىستاعى گۇلدالا اۋىلىنا دەيىن ۇزارتىلدى، دەپ حابارلايدى Almaty-akshamy.kz Almaty.tv-گە سىلتەمە جاساپ.
22 شىلدە ىسكە قوسىلعان باعىت گۇلدالا اۋىلىنان شىعىپ، «الماتى-1» تەمىرجول ۆوكزالى ارقىلى كوكجيەك ىقشاماۋدانىنا دەيىن بارادى. قازىرگى تاڭدا تولىقتاي جاڭارتىلعان 10 اۆتوبۋس بار ەكەن. وندا ەلەكتروندى بيلەت، ياعني وڭاي جۇيەسى جانە جەڭىلدىكتەر قاراستىرىلىپتى. قوعامدىق كولىكپەن قاتىناۋ باعاسى - 80 تەڭگە.
«اۋىلدىڭ ىشىندە قالاعا باراتىن اۆتوبۋس بولعانعا نە جەتسىن؟! پاندەيا كەزىندە حالىق قينالىپ قالدى. №404 اۆتوبۋس توقتاعالى3 جىلداي بولدى. 3 جىلدىڭ ىشىندە كىشكەنتاي بالالار مەن ۇلكەن كىسىلەرگە قيىن بولدى. ۆوكزالعا بارادى ەكەن، بازارلارعا بارادى. قالاعا جەتسەك بارار جەرىڭ دە الىس بولمايدى»، – دەدى گۇلدالا اۋىلىنىڭ تۇرعىنى ديناگۇل نيەتبايەۆا.
جاۋاپتى ماماننىڭ ايتۋىنشا، حالىق سانى ارتىپ جاتسا، قوسىمشا اۆتوبۋس ءبولۋ ماسەلەسى دە قاراستىرىلماق.
«ورتا سىيىمدىلىقتى اۆتوبۋس. ديزەل تۇتىنادى. دەگەنمەن ول تولىقتاي ەۋرو-5 ستاندارتتارىنا لايىقتى. گۇلدالا كەنتىنىڭ بۇگىنگى كۇنى حالىق سانىن، قولدانۋشى سانىن ەسەپتەگەننەن كەيىن، الداعى ۋاقىتتا №41 اۆتوبۋس سانىن ۇلعايتۋ، كوبەيتۋ سۇراقتارى قوسىمشا قاراستىرىلاتىن بولادى»، – دەدى موبيلدىلىك باسقارماسىنىڭ ءبولىم باسشىسى ابىلايحان ومارحان.