مەملەكەت باسشىسى ق.توقايەۆتىڭ تاپسىرماسىن ورىنداۋ اياسىندا شىعىس قازاقستان وبلىسى بويىنشا ەكولوگيا دەپارتامەنتى ۋاكىلەتتى ورگانمەن جانە عىلىمي ۇيىمدارمەن بىرلەسىپ، بيىلعى جىلعى 28-30 قىركۇيەك ارالىعىندا كۇرشىم اۋدانىنداعى كۇرشىم جانە قىستاۋ-كۇرشىم وزەندەرىنىڭ لاستانۋ فاكتىسى بويىنشا «ۆيزول» گەولوگيالىق بارلاۋ كومپانياسى» جشس-نە قاتىستى جوسپاردان تىس ەكولوگيالىق تەكسەرۋ جۇرگىزدى دەپ حابارلايدى almaty-akshamy.kz
تەكسەرۋ بارىسىندا كاسىپورىندى جاۋاپكەرشىلىككە تارتۋعا نەگىز بولاتىنداي قازاقستان رەسپۋبليكاسىنىڭ قولدانىستاعى ەكولوگيالىق كودەكسىنىڭ نورمالارىنا سايكەس كەلمەيتىن ءبىرقاتار ولقىلىقتار انىقتالدى.
وسىلايشا، تەحنولوگيالىق سۋ جيناقتاعىشتاردىڭ توعانىنان سۋدىڭ جەر بەدەرىنە اسىپ كەتۋى جانە قىستاۋ-كۇرشىم وزەنىنە قۇياتىن تۇندىرعىشتان سۋ اعىزۋ فاكتىلەرى انىقتالدى. ناتيجەسىندە «اكىمشىلىك قۇقىقبۇزۋشىلىق تۋرالى» كودەكستىڭ (ارى قاراي – اقبتك) 328-بابىنىڭ 1-بولىگى بويىنشا اكىمشىلىك قۇقىقبۇزۋشىلىق تۋرالى حاتتاما تولتىرىلدى.
ايىپپۇل مولشەرى ءوز ەركىمەن سۋ اعىزۋدىڭ كولەمى ناقتىلانعاننان كەيىن ايقىندالاتىن بولادى.
بۇدان باسقا، تاۋ-كەن جۇمىستارىنىڭ جوسپارىنا سايكەس كەن ورنىن يگەرگەننەن كەيىن تابيعي وبەكتىلەردى تەحنيكالىق جانە بيولوگيالىق رەكۋلتيۆاسيا كومەگىمەن نەگىزگى كۇيىنە كەلتىرۋ كەرەك. ياعني، تابيعي لاندشافتتى، اعاش وسىمدىكتەرىن جانە جانۋارلار الەمىنىڭ تىرشىلىك ورتاسىن قالپىنا كەلتىرۋ قاجەت.
«ۆيزول» گبك» ج ش س ۋاقىتىلى زەرتتەۋلەر جۇرگىزبەگەنى، بيولوگيالىق نەگىزدەمە ازىرلەمەگەنى جانە شارۋاشىلىق قىزمەت ناتيجەسىندە بالىق رەسۋرستارىنا كەلەتىن زيان ورىن الماعانى بەلگىلى بولدى. سونىمەن قاتار، تاۋ-كەن جۇمىستارى تۇرعىسىنان قالدىقتاردى باسقارۋ جۇيەسى ساقتالماعان.
وسى بۇزۋشىلىقتار ءۇشىن كاسىپورىنعا قاتىستى اقبتك-نىڭ 332-بابىنىڭ 2-بولىگى جانە 344-بابىنىڭ 3-بولىگى بويىنشا اكىمشىلىك قۇقىقبۇزۋشىلىق تۋرالى حاتتامالار جاسالدى. بۇل باپتار بويىنشا سالىنعان ايىپپۇل كولەمى 200 مىڭ تەڭگەدەن اسادى.
سونىمەن قاتار، انىقتالعان بۇزۋشىلىقتاردى جويۋ ماقساتىندا جوعارىدا اتالعان تاۋ-كەن كومپانياسىنا قورشاعان ورتاعا تەرىس اسەردىڭ الدىن الۋ جانە ازايتۋ جونىندەگى ءتيىمدى ءىس-شارالاردى ىسكە اسىرۋ، تابيعي ورتا كومپونەنتتەرىنە زەرتتەۋلەر جۇرگىزۋ، بيولوگيالىق نەگىزدەمە ازىرلەۋ جانە بالىق قورلارىنا كەلتىرىلگەن زيان ءۇشىن وتەماقى جۇرگىزۋ قاجەتتىگى تۋرالى نۇسقاما بەرىلدى.
ورىندالعان جۇمىستاردىڭ ناتيجەلەرى تۋرالى قوسىمشا حابارلاناتىن بولادى.
ەستەرىڭىزگە سالا كەتەيىك، 2021 جىلعى قىركۇيەك ايىنىڭ ورتاسىندا شىعىس قازاقستان وبلىسى كۇرشىم اۋدانىنداعى كۇرشىم جانە قىستاۋ وزەندەرى ارنالارىنىڭ ءقاۋىپتى حيميالىق زاتتارمەن لاستانۋى مۇمكىن ەكەندىگى تۋرالى اقپارات الەۋمەتتىك جەلىلەردە ۇلكەن قوعامدىق رەزونانس تۋدىرىپ، ەل پرەزيدەنتى شۇعىل شارالار قابىلداۋ تۋرالى ءتيىستى تاپسىرما بەرگەن بولاتىن.