ءال-فارابي اتىنداعى قازاق ۇلتتىق ۋنيۆەرسيتەتىنىڭ 356 ورىندىق №5 جاتاقحاناسى كۇردەلى جوندەۋدەن ءوتىپ، جۋرناليستيكا فاكۋلتەتىنىڭ ستۋدەنتتەرىنە سالتاناتتى تۇردە قايتا بەرىلدى. وسىعان وراي وقۋ ورنىندا ب ا ق وكىلدەرىنە ارنالعان ارنايى باسپا ءسوز تۋرى ۇيىمداستىرىلدى.
بەس قاباتتى جاڭارعان عيماراتتىڭ اشىلۋىنا ۋنيۆەرسيتەت باسشىلىعى، زيالى قاۋىم وكىلدەرى، قازۇۋ تۇلەكتەرى، وقىتۋشى-پروفەسسورلار قۇرامى مەن جۋرناليستيكا فاكۋلتەتىنىڭ ستۋدەنتتەرى، ب ا ق وكىلدەرى قاتىستى.
ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ ستۋدەنتتەردى جاڭا قونىستارىمەن قۇتتىقتادى.
«№5 جاتاقحانانىڭ قولىنا قالام ۇستاعان قاۋىم ءۇشىن وزىندىك تەرەڭ تاريحى بار. قازۇۋ-دا وقىعان ەسىمى ەلگە تانىمال جۋرناليستەر وسى ستۋدەنتتەر ۇيىندە تۇردى. بۇگىن سول ءداستۇر جالعاسىن تاۋىپ، جۋرناليستيكا فاكۋلتەتىندە وقىپ جاتقان ءبىلىم الۋشى جاستارعا قولدانىسقا بەرىلدى.
الداعى ۋاقىتتا ءال-فارابي اتىنداعى قازاق ۇلتتىق ۋنيۆەرسيتەتى قۇرىلىسىنىڭ ەكىنشى كەزەڭىندە قالاشىقتا جاڭا جاتاقحانالار بوي كوتەرەتىن بولادى»، – دەدى رەكتور.
ودان سوڭ ۋنيۆەرسيتەت باسشىسى جۋرناليستەرگە جاتاقحانانىڭ جوندەۋ جۇمىستارىنىڭ بارىسى جايلى اڭگىمەلەدى. جوندەۋ كەزىندە عيماراتتىڭ سىرتقى قاسبەتى جاڭارتىلىپ، بارلىق بولمەنىڭ قابىرعالارى قايتا سىلانىپ، ارلەندى. ەسىك-تەرەزە، ەدەن توسەنىشتەرى مەن جيھازدار ساتىپ الىندى. سونىمەن قاتار ەلەكتر جۇيەسى قايتا جۇرگىزىلىپ، جارىق بەرۋشى شامدار جاڭادان ورناتىلدى. ءار سەكسياعا زاماناۋي دۋش كابينالارى قويىلىپ، سانيتارلىق-تەحنيكالىق جابدىقتار اۋىستىرىلدى. بۇعان قوسىمشا عيماراتتىڭ cۋ قۇبىرى مەن كارىز جۇيەسى مونتاجدالدى.
جۋرناليستيكا فاكۋلتەتىنىڭ 1-كۋرس ستۋدەنتى حامزا ەردەن: «ءبىز №15 جاتاقحانادان قازاق جۋرناليستيكاسىنىڭ تاريحى وربىگەن قاسيەتتى مەكەنگە قايتا ورالدىق. بۇل تاريحي ءسات. بۇل جاتاقحانادا كوپتەگەن زيالى قاۋىم وكىلدەرى تۇرعان. مۇندا ستۋدەنتتەر جايلى ءومىر ءسۇرۋى ءۇشىن بارلىق جاعداي جاسالىپ وتىر. ەندى ءار سەكسيادا دۋش بار. ءار قاباتتا اس بولمەسى، وقۋ زالى دا قاراستىرىلعان. جاتىن بولمەلەرى كەڭەيىپ، جاتاقحانانىڭ جالپى ديزاينى وزگەرتىلگەن. جالپى قالاشىقتاعى عيماراتتار مەن جاتاقحانالار كۇن ساناپ جاڭارىپ كەلەدى. ءبىز وتە قۋانىشتىمىز»، – دەپ ءوز اسەرىمەن ءبولىستى.
باسپا ءسوز تۋرى ءال-فارابي كىتاپحاناسىندا جالعاستى. وندا جانسەيىت تۇيمەبايەۆ قازۇۋ قۇرىلىسىنىڭ ءىى كەزەڭىنىڭ جوسپارىمەن تانىستىرىپ، جۋرناليستەر ساۋالىنا جاۋاپ بەردى.
سونداي-اق جۋرناليستەر پۋلى قالاشىقتا وتكەن قىزىقتى ستۋدەنتتىك كۇندەردى ەسكە الىپ، ءبىلىم الۋشىلاردىڭ تىنىس-تىرشىلىگىن كوزبەن كورۋگە مۇمكىندىك الدى.
ايتا كەتسەك، №5 جاتاقحانادا سوڭعى بەس جىلدا فيزيكا-تەحنيكالىق فاكۋلتەتىنىڭ ستۋدەنتتەرى قونىستانعان بولاتىن. ءال-فارابي اتىنداعى قازۇۋ باسقارما ءتوراعاسى – رەكتورى جانسەيىت تۇيمەبايەۆتىڭ اتىنا تۇلەكتەر تاراپىنان جاتاقحانانى جۋرناليستيكا فاكۋلتەتىنە قايتا بەرۋ تۋرالى ۇسىنىس تۇسكەن ەدى. وسىعان سايكەس ۋنيۆەرسيتەت اكىمشىلىگى ءتيىستى شەشىم قابىلداپ، كۇردەلى جوندەۋدەن وتكەن جاتاقحانا بولاشاق جۋرناليستەرگە قايتا پايدالانۋعا بەرىلدى.
ءال-فارابي اتىنداعى قازۇۋ-دىڭ باسپا ءسوز قىزمەتى