كۋرچاتوۆتا تومەن بايىتىلعان ۋران وتىنى بار رەاكتور ىسكە قوسىلدى

كۋرچاتوۆتاعى ۇلتتىق يادرولىق ورتالىقتا تومەن بايىتىلعان ۋران وتىنى بار رەاكتور ىسكە قوسىلدى.

ستراتەگيالىق ساناتتاعى عىلىمي ەكسپەريمەنت جانە ماگاتە-نىڭ ۇزاق مەرزىمدى باعدارلامالارىنا سايكەس كەلەدى. بۇل – قازاقستاندىق ەنەرگەتيكا سالاسىندا دا، جالپى الەمدە دە اۋىز تولتىرىپ ايتاتىن وقيعالاردىڭ ءبىرى، دەپ حابارلايدى Almaty-akshamy.kz 

قازىرگى تاڭدا  وتاندىق فيزيكتەر رەاكتوردىڭ جاڭا يادروسىنىڭ سيپاتتامالارىن زەرتتەۋ ۇستىندە، سونداي-اق، رەسەي مەن اقش-تاعى ارىپتەستەرىمەن بىرگە وتىننىڭ جاڭا ءتۇرىن پايدالانۋ ارقىلى ەنەرگيا ءوندىرۋدىڭ كورسەتكىشتەرىن جاقسارتۋدى كوزدەپ وتىر. سىناقتار 2023 جىلى اياقتالادى دەپ جوسپارلانعان.

"ۇلتتىق يادرولىق ورتالىعىندا ۆگ-1م زەرتتەۋ رەاكتورىن تومەن بايىتىلعان ۋران وتىنىمەن ىسكە قوسۋ ءساتتى اياقتالدى. ال، وسىدان تۋرا 30 جىل بۇرىن، ۇلتتىق يادرولىق ورتالىق قۇرىلعان جىلى، ۆگ-1 رەاكتورىن جوعارى بايىتىلعان وتىنمەن ىسكە قوسۋ تابىستى جۇرگىزىلگەن ەدى. كەلەسى كەزەڭدە جاڭا رەاكتوردىڭ ەنەرگەتيكالىق قۋاتى ىسكە قوسىلادى، جاڭا بەلسەندى اۋماقتاعى قاجەتتى سيپاتتامالاردى ەكسپەريمەنتالدى تۇردە انىقتاۋ جۇزەگە اسادى"، - قرۇياو باس ديرەكتورى ەرلان باتىربەكوۆ.