قۇزىرلى ورگاننان پلاتفورمانىڭ سانانى ۋلايتىن جارناماسىن تەكسەرۋدى سۇراعان
باس پروكۋراتۋرا «كۇندەلىك» جۇيەسىن قاتاڭ سىناعان دەپۋتات ەرلان سايىروۆقا جاۋاپ بەردى، دەپ حابارلايدى اlmaty-akshamy.kz Qaz365.kz-كە سىلتەمە جاساپ.
ماجىلىسمەن بۇدان بۇرىن وقۋ-اعارتۋ مينيسترلىگى «وسى شەتەلدىك جۇيە ءۇشىن جىلىنا 800 ملن تەڭگە جۇمساپ وتىر دەگەن اقپاراتتى تەكسەرۋدى» تالاپ ەتكەن. قۇزىرلى ورگاننان پلاتفورمانىڭ سانانى ۋلايتىن جارناماسىن تەكسەرۋدى سۇراعان.
ەسكە سالا كەتسەك، بۇعان دەيىن ەرلان سايىروۆ پرەمەر-مينيستردىڭ ورىنباسارى تامارا دۇيسەنوۆاعا، باس پروكۋرور بەرىك اسىلوۆقا ساۋال جولداپ، جوبا ارقىلى 4 ميلليون قازاقستاندىق وقۋشىنىڭ جەكە مالىمەتتەرىن جيناۋ، ساقتاۋ جانە وڭدەۋ قىزمەتىن ەشقانداي ىرىكتەۋ مەن بايقاۋسىز، شەتەلدىك كومپانياعا 12 جىلعا بەرىلىپ كەتكەنىن حابارلاعان ەدى. ونىڭ سوزىنشە، بۇل سالادا شەتەلدەن باسقارىلاتىن قولدان جاسالعان مونوپوليا پايدا بولعان. دەپۋتات سىرتقى مونوپوليا كۇشىمەن قازاقستاننىڭ بارلىق بالالارى، مۇعالىمدەرى مەن اتا-انالارى (جالپى سانى 7 ميلليون ادام) مەملەكەت پايدالانۋعا مىندەتتەگەن «كۇندەلىكتەن» كۇندەلىكتى جاعىمسىز جارناما كورۋگە ءماجبۇر ەكەنىن اتاپ وتەدى.
«بۇل از بولعانداي، «كۇندەلىك» جۇيەسى «ۇلتتىق اقپاراتتىق تەحنولوگيالار» اتتى مەملەكەتتىك مەكەمەنىڭ سەرۆەرلەرىن پايدالانادى جانە ول ءۇشىن وقۋ-اعارتۋ مينيسترلىگى جىل سايىن 800 ملن تەڭگە قارجى تولەيدى دەگەن اقپاراتتى باس پروكۋراتۋرا تەكسەرۋى قاجەت»، - دەدى دەپۋتات.
سايىروۆ «قازاقستاندىقتاردىڭ مالىمەتتەرى جوعالسا، جارناما بەرۋشىلەرگە ساتىلسا نەمەسە استىرتىن زياندى جولمەن قولدانىلسا، كىم جاۋاپ بەرەدى؟» دەپ دابىل قاققان.
الايدا باس پروكۋراتۋرا «كۇندەلىك» جۇيەسىنىڭ جارناماسى تەكسەرىلگەنىن، ولاردىڭ بۇل ارەكەتى مەملەكەتتىك-جەكەشەلىك ارىپتەستىك تۋرالى زاڭنامانىڭ تالاپتارىنا قايشى كەلمەيتىنىن حابارلاعان.
«سونداي-اق «ۇلتتىق اقپاراتتىق تەحنولوگيالار» اق (بۇدان ءارى – «ۇات» اق) رەسۋرستارىندا «كۇندەلىك» اج ورنالاستىرۋعا جىل سايىن سەرۆەر ۇسىنعانى ءۇشىن قاراجات بولىنەتىنىن حابارلايمىز. بيىل 309 ملن 893 مىڭ تەڭگە، 2022 جىلى - 259 ملن تەڭگە ءبولىندى. بۇل قارجىلاندىرۋ سيفرلىق دامۋ جانە اەروعارىش ونەركاسىبى مينيسترلىگىنىڭ تەلەكوممۋنيكاسيالار كوميتەتى مەن «ۇات» اق اراسىندا حوستينگ ۇسىنۋ بويىنشا قىزمەتتەر كورسەتۋگە ارنالعان شارتتا كوزدەلگەن»، - دەپ حابارلايدى قۇزىرلى ورگان.
باس پروكۋراتۋرا ۇلتتىق ەكونوميكا مينيسترلىگى ۋاكىلەتتى ورگان رەتىندە «كۇندەلىك» ەلەكتروندى جۋرنالدارى مەن كۇندەلىكتەرىنىڭ جوبالارىنا سالالىق ساراپتامانىڭ وڭ قورىتىندىسىن بەرگەنىن ەسكەرتەدى. ءقازىر ەلدەگى مەملەكەتتىك مەكتەپتەردە 4 سيفرلىق ءبىلىم بەرۋ پلاتفورماسى قولدانىلاتىنىن جەتكىزدى.
«كۇندەلىك» اج 15 وڭىردە پايدالانىلادى، قالعان وڭىرلەردە جەرگىلىكتى اتقارۋشى ورگاندار وزگە دە سيفرلىق ءبىلىم بەرۋ پلاتفورمالارىن («Edus mektep»، «Bilim All» «Bilim class») دەربەس ايقىندادى. تيىسىنشە، ءبىلىم بەرۋ پلاتفورمالارىنىڭ بالاما نۇسقالارى بار. «كۇندەلىك» اج جۇمىس ىستەۋىنە قاتىستى، ونىڭ ىشىندە جارنامانى تاراتۋ ماسەلەلەرى بويىنشا باس پروكۋراتۋراعا قانداي دا ءبىر شاعىمدار مەن ارىزدار كەلىپ تۇسكەن جوق»، - دەپ حابارلايدى باس پروكۋراتۋرا.