سۋ ۇلكەيتكىش اينەك سياقتى جارىق ساۋلەسىمەن شاعىلىسىپ، ودان ءورت شىعىپ كەتۋ ءقاۋپى بار.
پەتروپاۆل قالاسى توتەنشە جاعدايلار باسقارماسىنىڭ قىزمەتكەرلەرى وسىنداي ەسكەرتۋ جاسادى، دەپ حابارلايدى Almaty-akshamy.kz.
قازاقپارات اگەنتتىگىنىڭ تاراتقان اقپاراتىنا ساي، وتكەن جەكسەنبىدە پەتروپاۆلدا ەرەكشە وقيعا بولعان. اتاپ ايتقاندا، 9 شىلدە ساعات 20:20-دا 101 نومەرىنە ش. ءۋاليحانوۆ كوشەسىندەگى 5 قاباتتى تۇرعىن ءۇيدىڭ ەكىنشى قاباتىنداعى پاتەرلەردىڭ ءبىرىنىڭ بالكونىندا ءتۇتىن كورىنگەنى تۋرالى اقپارات تۇسەدى. پاتەر قۇلىپتاۋلى بولعان، ال ەشقانداي ءورت بەلگىلەرى كورىنبەيدى. انىقتالعانىنداي، جوعارى قاباتتا تۇراتىن كورشىلەرى ءتۇتىندى بايقاعان. بالكوننىڭ سىرتىنا بەكىتىلگەن گۇل وسىرۋگە ارنالعان اعاشتان جاسالعان قوراپ تۇتانعان بولىپ شىقتى. ول كۇننىڭ ىستىعىنان جانا باستاعان.
سقو تجد «ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى» مم №2 مامانداندىرىلعان ءورت ءسوندىرۋ ءبولىمىنىڭ قىزمەتكەرلەرىنە بالكونعا اۆتوساتىمەن كوتەرىلىپ، ءورت كوزىن ءسوندىرۋ ءۇشىن ءبىر شەلەككە تولمايتىن سۋ جەتكىلىكتى بولدى. ماماندار ورتكە ءۇيدىڭ جوعارعى قاباتتارىنان تۇسكەن تەمەكى تۇقىلىنىڭ سەبەپ بولعانىن انىقتادى.
وسى ورايدا، ءورت سوندىرۋشىلەر قاۋىپسىزدىكتى ەسكە سالادى:
- بالكوندا ەرىتكىشتەردى، بوياۋلاردى ۇستاۋ وتە ءقاۋىپتى.
- بالكوندى قاجەتسىز زاتتارمەن تولتىرماعان دۇرىس.
- وتتىقتى قالدىرماڭىز، كۇن ساۋلەسىنەن قىزعان كەزدە ول جارىلىپ كەتۋى مۇمكىن.
- بالكونعا، تەرەزە الدىنا سۋ قويماڭىز، ولار ۇلكەيتكىش اينەك سياقتى جارىق ساۋلەسىن شوعىرلاندىرۋى مۇمكىن!
- ءورت تۇتانسا، دەرەۋ «101» تەلەفون نومەرى ارقىلى حابارلاۋ كەرەك. ەگەر ءورت كۇشەيىپ كەتسە، جەل ۇرلەپ كەتپەۋ ءۇشىن ەسىكتى جانە تەرەزەلەردى مىقتاپ جاۋىپ، بالكوننان دەرەۋ شىعىڭىز. كورشىلەرگە ءورت تۋرالى ەسكەرتىڭىز.