وسىنداي اتاۋمەن الماتىدا بەلگىلى ونەرتانۋشىلار ابدۋلحاميت جانە سايرا رايىمبەرگەنوۆتەردىڭ داۋلەسكەر كۇيشىنىڭ ءومىرى مەن شىعارماشىلىعىنا ارنالعان مونوگرافياسى جارىق كوردى.
جيناق ءۇش تومنان تۇرادى. ءبىرىنشى تومى قازاق تىلىندە، ەكىنشى تومى ورىس تىلىندە باسىلعان. ال ءۇشىنشى كىتاپتا قازانعاپ كۇيلەرىنىڭ نوتاسى جاريالانعان.
اۆتورلار "بۇل-ينتەراكتيۆتى كىتاپ" دەيدى. مىسالى، كۇيلەردىڭ تاريحىن وقىپ، قاسىنداعى QR كودتى باسساڭىز بەينەنۇسقاسىن دا كورە الاسىز. مونوگرافيادا قازانعاپتىڭ 73 شاكىرتىنىڭ ءومىربايانى جازىلعان. مۇندا دا QR كودتىڭ كومەگىمەن وتكەن عاسىردىڭ 60-شى جىلدارىنان بەرگى بەينەتاسپالاردى كورۋگە بولادى.
تانىستىرىلىمنىڭ سوڭى كونسەرتكە ۇلاستى. قازانعاپ تىلەپبەرگەن ۇلى - 1854-1921 جىلدار ارالىعىندا ءومىر سۇرگەن قازاقتىڭ ايگىلى كۇيشى-كومپوزيتورى. ونىڭ «كوكىل»، «ىلمە»، «اقجەلەڭ»، «بوگەلەك» سەكىلدى كۇيلەرى تىڭدارمانعا جاقسى تانىس.
«بۇل ءىستى مەن 1978 جىلى باستاپپىن. 1978 جىلدان باستاپ قانشا ەكسپەديسياعا باردىم. سوناۋ اقتوبە وبلىستارىنىڭ بۇكىل اۋداندارىن ارالادىم. مىنا جاعىندا تۇرىكمەنستانعا شىعىپ كەتتىم. مىنا جاعىندا قاراقالپاقستانعا شىعىپ كەتتىم. مىنا جاعىندا دوڭىزتاۋ. قاي جەردە قازانعاپتىڭ كۇيىن ورىندايتىن اقساقال بار دەسە، سونىڭ ءىزباسارلارى بار دەسە، سولاردىڭ ىزىمەن ءجۇردىم»، - دەيدى كۇيشى، ونەر زەرتتەۋشى ابدۋلحاميت رايىمبەرگەنوۆ.