بۇل تۋرالى فريستايل-موگۋلدان قازاقستان قۇراماسىنىڭ باس باپكەرى ەلەنا كرۋگلىحينا بەيجىڭدە ءوتىپ جاتقان وليمپيادا ويىندارىنىڭ العاشقى جارىس كۇنىنىڭ قورىتىندىسىنا ارنالعان باسپا ءسوز كونفەرەنسياسىندا ايتتى، دەپ حابارلايدى Almaty-akshamy.kz. 

ءبىز تورەلىككە قاتىستى پكىر ايتا المايمىز. سەبەبى تورەشىلەردىڭ تاجىريبەسى جوعارى. ولار 4 جىل بويى ىرىكتەۋدەن وتەدى. ولاردىڭ شەشىمىنە قاتىستى پىكىر ايتۋعا قۇقىعىمىز جوق. جالپى، قۇراما وليمپياداعا دايىن بولدى. مەدال الۋعا نيەتتەندىك. ءبىراق جاعداي وسىلاي بولدى. ناتيجە دە كوڭىلىمىزدەن شىقپادى. ءوز جانكۇيەرلەرىمىزدەن كەشىرىم سۇرايمىز، - دەدى ەلەنا كرۋگلىحينا.

ونىڭ ايتۋىنشا، ءبىراق ءومىر مۇنىمەن اياقتالمايدى. 

- سپورت تا توقتامايدى. وسى جاعدايدان شەشىم شىعارىپ، ساباق الۋ كەرەك. ءارى قاراي دايىندىقتى جالعاستىرۋ كەرەك. جازدا كارانتين شارالارىنىڭ كەسىرىنەن دايىندىق جاساۋ قيىن بولدى. كۇزدە دە سىرعانايتىن قار ىزدەدىك. بارلىق سپورتشى جىل بويى قاردا سىرعانايدى. قازاقستان قۇراماسى بارلىعىنان از جاتتىعۋ جاساپ، جاقسى ناتيجە كورسەتەدى. ءبىز بىرلىك پەن رۋحىمىزدى بىرىكتىرىپ، العا بەتتەپ بارامىز. كوماندامىز ۇلكەن ءارى اۋىزبىرشىلىگى زور. يۋليا گالىشيەۆاعا ەرەكشە العىس ايتقىم كەلەدى. ءبىز وسىمەن توقتامايمىز، بەرىلمەيمىز، ودان ءارى جۇمىس ىستەيمىز، - دەدى ول.