استانادا 18-19 قاڭتار كۇندەرى بارلىق پراۆوسلاۆيە شىركەۋلەرىندە كرەششەنيە مەرەكەسى ءراسىمى وتەدى، دەپ حابارلايدى ەلوردا اكىمدىگىنىڭ رەسمي سايتى.
2024 جىلى كرەششەنيە مەرەكەسىنىڭ ءراسىمى 18-19 قاڭتاردا استانا قالاسىنىڭ بارلىق پراۆوسلاۆيە شىركەۋلەرىندە وتەدى. ولار: ۋسپەن كافەدرالدى سوبورى (كۇيشى دينا كوشەسى، 27)، كونستانتين-ەلەنين شىركەۋى (رەسپۋبليكا داڭعىلى، 12)، سەرافيم ساروۆتىڭ شىركەۋى (بوگەنباي باتىر داڭعىلى، 8).
ەسىل وزەنىندەگى مۇزدىڭ قالىڭ بولماۋىنا بايلانىستى استانا قالاسىنىڭ توتەنشە جاعدايلار دەپارتامەنتىنىڭ ۇسىنىسى نەگىزىندە شومىلاتىن ورىندار ەسىل وزەنىنىڭ سول جاعالاۋىنداعى ورتالىق جاعاجايدا ورنالاستىرىلدى.
جاپپاي شومىلۋعا ارنالعان ويىقتار ەسىل وزەڭىنىڭ سول جاعالاۋىنداعى «استانا» ساياباعىنىڭ جاعالاۋىندا (ورتالىق جاعاجاي) ورناتىلادى.
شومىلاتىن ورىندار 18 قاڭتار كۇنى ساعات 19:30-دان باستاپ 19 قاڭتار ساعات 02:00-گە دەيىن قولجەتىمدى بولادى.
سونداي-اق، جاپپاي شومىلۋ 19 قاڭتار تاڭعى 08:00-دەن ساعات 23:00-گە دەيىن جالعاسادى.
ءدىني ءراسىم بارىسىندا استانا قالاسىنىڭ توتەنشە جاعدايلار دەپارتامەنتى سۋدا قۇتقارۋ قىزمەتى جانە پوليسيا دەپارتامەنتىنىڭ قىزمەتكەرلەرى تۇرعىنداردىڭ قاۋىپسىزدىگىن قامتاماسىز ەتەدى. بۇل كۇنى شومىلۋ ورىندارىندا جەدەل جاردەم بريگادالارى كەزەكشىلىك ەتەدى.
ەلوردا تۇرعىندارى مەن قوناقتارىن قاۋىپسىزدىك شارالارىن ساقتاۋعا جانە شومىلۋ كەزىندە اۋا رايى جاعدايلارىن ەسكەرۋگە شاقىرامىز.
سونداي-اق قاۋىپسىزدىك ەرەجەلەرىن جانە شومىلۋعا ارنالعان ورىنداردى ەستە ۇستاعان ءجون: كۋپەلدىڭ جانىندا 3 ادامنان ارتىق تۇرماۋ كەرەك، تەك قۇتقارۋشىلار مەن مەديسينا قىزمەتكەرلەرىنىڭ باقىلاۋىمەن سۋعا ءتۇسۋ قاجەت. سۋعا كىرمەس بۇرىن، دەنەنى قىزدىراتىن جاتتىعۋ جاساپ، راسىمنەن كەيىن ءوزىڭىزدى سۇلگىمەن ىسقىلاپ، جىلى زاتتاردى كيىپ، ىستىق شاي ءىشۋىڭىز كەرەك. ەگەر شومىلۋ كەزىندە دەنساۋلىعىڭىزدىڭ ناشارلاعانىن سەزسەڭىز، دەرەۋ شومىلۋ ورنىندا كەزەكشى دارىگەرلەرگە حابارلاسۋعا كەڭەس بەرەمىز.