استانا قالاسىنداعى «ازىرەت سۇلتان» مەشىتىندە قازاقستان مۇسىلماندارى ءدىني باسقارماسىنىڭ ۇيىمداستىرۋىمەن وتكەن ءى رەسپۋبليكالىق «ۇزدىك يمام» ينتەللەكتۋالدى ءبىلىم سايىسىنىڭ سالتاناتتى ماراپاتتاۋ ءراسىمى ءوتتى، دەپ حابارلايدى aqshamnews.kz قمدب باسپا ءسوز قىزمەتىنە سىلتەمە جاساپ.
ماراپاتتاۋ راسىمىنە ارنايى قاتىسقان قمدب ءتوراعاسى، باس ءمۇفتي ناۋرىزباي قاجى تاعان ۇلى سايىستىڭ ماڭىزدىلىعىنا توقتالىپ، قاتىسۋشىلارعا ريزاشىلىعىن ءبىلدىردى.
«بۇگىندە قازاقستان مۇسىلماندارى ءدىني باسقارماسىنىڭ باستى مىندەتىنىڭ ءبىرى– ءدىن قىزمەتكەرلەرىنىڭ بىلىكتىلىگىن ۇزدىكسىز كوتەرىپ، ەل بىرلىگىنە، قوعام تۇراقتىلىعىنا، وتباسى قۇندىلىقتارىنا، ىزگىلىك پەن ادامگەرشىلىككە ۇندەيتىن ساۋاتتى ءدىني كادرلار دايارلاۋ. ويتكەنى يمام مەشىت قىزمەتكەرى عانا ەمەس، ول قوعامنىڭ رۋحاني تىرەگى، ۇلتتىق تاربيەنىڭ، ەل تىنىشتىعى مەن ۇلت بىرلىگىنىڭ ۇيىتقىسى. بۇگىنگى ءبىلىم سايىسى ءاربىر يمامنىڭ ءوز الەۋەتىن كورسەتىپ، ءبىلىمىن شىڭداپ، تاجىريبەسىن بايىتۋىنا ۇلكەن مۇمكىندىكتۋعىزدى دەپ ەسەپتەيمىن. ءبىلىم سايىسىنا ەلىمىزدىڭ ءار وبلىسىنان ىرىكتەلىپ كەلگەن ەڭ ۇزدىك يمامدار وزدەرىنىڭ ءبىلىمى مەن پاراسىن پاش ەتتى. سوندىقتان وسى سايىسقا قاتىسقان ءاربىر يمام جەڭىمپاز اتاندى دەپ سانايمىن. اللا قالاسا، يمامدار اراسىنداعى بۇل جارىس جىل سايىن جاڭا دەڭگەيدە ۇيىمداستىرىلىپ، داستۇرگە اينالادى دەگەن سەنىمدەمىن»، – دەدى باس ءمۇفتي.
ءادىلقازىلار القاسىنىڭ شەشىمىمەن ءى رەسپۋبليكالىق «ۇزدىك يمام» ينتەللەكتۋالدى ءبىلىم سايىسىنىڭ جەڭىمپازدارى تومەندەگىدەي:
- I ورىن: بەكزات ازاتبەك ۇلى قۇسانبايەۆ – شقو، وسكەمەن قالالىق ورتالىق مەشىتىنىڭ نايب يمامى (500 مىڭ تەڭگە)
- II ورىن: نۇرلان مۇرات – جامبىل وبلىستىق «ھيباتۋللا تاراز» مەشىتىنىڭ نايب يمامى (400 مىڭ تەڭگە)
- III ورىن: قۋانىش توقسانباي ۇلى ابىشيەۆ – الماتى قالالىق ورتالىق مەشىتىنىڭ نايب يمامى (300 مىڭ تەڭگە)
سونىمەن قاتار، جارىسقا قاتىسىپ، جۇلدەگەرلەر قاتارىنا ەنبەگەن يمامدارعا 50 000 تەڭگەدەن ىنتالاندىرۋ سىياقىسى بەرىلدى.