الماتىدا كرەديتتەر بويىنشا مەرزىمى وتكەن بەرەشەكتى قالاي رەتتەۋگە بولادى؟
وڭىرلىك كوممۋنيكاسيالار قىزمەتىنىڭ الاڭىندا بانكروتتىق جانە تولەم قابىلەتتىلىگىن قالپىنا كەلتىرۋ راسىمدەرى، قارىزدار مەن ميكروكرەديتتەر بويىنشا مەرزىمى وتكەن بەرەشەكتى رەتتەۋ ءتارتىبى تۋرالى ق ر قارجى نارىعىن رەتتەۋ جانە دامىتۋ اگەنتتىگىنىڭ قارجى قىزمەتتەرىن تۇتىنۋشىلاردىڭ قۇقىقتارىن قورعاۋ دەپارتامەنتىنىڭ ديرەكتورى الەكساندر تەرەنتيەۆ ايتىپ بەردى، دەپ حابارلايدى اlmaty-akshamy.kz.
ونىڭ ايتۋىنشا، قارجى نارىعىن رەتتەۋ جانە دامىتۋ اگەنتتىگىنىڭ باعىتتارىنىڭ ءبىرى قارجى قىزمەتتەرىن تۇتىنۋشىلاردىڭ قۇقىقتارىن قورعاۋدى قامتاماسىز ەتۋ بولىپ تابىلادى. اگەنتتىك تۇتىنۋشىلاردىڭ قۇقىقتارىن قارجى ۇيىمدارى تاراپىنان تەرىس پايدالانۋدان جانە جوسىقسىز پراكتيكادان قورعاۋدى قامتاماسىز ەتۋ ءۇشىن قاداعالاۋ راسىمدەرىن ىسكە اسىرادى. ازاماتتاردىڭ وتىنىشتەرىنە تەرەڭ تالداۋ جۇرگىزىلەدى، تاقىرىپتىق جانە قۇجاتتامالىق تەكسەرۋلەر ۇيىمداستىرىلادى، انىقتالعان بۇزۋشىلىقتاردى جويۋ ءۇشىن قاداعالاۋ شارالارى قابىلدانادى.
«2023 جىلى اگەنتتىك ازاماتتار مەن زاڭدى تۇلعالاردان كەلىپ تۇسكەن 59،4 مىڭنان استام ءوتىنىشتى قارادى. وتىنىشتەرگە جاسالعان تالداۋ كورسەتكەندەي، قارجىلىق قىزمەتتەردى تۇتىنۋشىلاردىڭ قۇقىقتارىن بۇزۋدىڭ كوپشىلىگى كرەديتورلاردىڭ ازاماتتاردىڭ مەرزىمى وتكەن بەرەشەگىن رەتتەۋ بويىنشا شارالار قابىلداماۋى بولدى: بانكتىك قارىزدار مەن ميكروكرەديتتەر بويىنشا (تيىسىنشە 53% جانە 29%). وتىنىشتەردىڭ 19%-ى قارجى نارىعىنىڭ باسقا سۋبەكتىلەرى بويىنشا»، - دەدى الەكساندر تەرەنتيەۆ.
انىقتالعان بۇزۋشىلىقتار بويىنشا 2023 جىلدىڭ باسىنان بەرى اگەنتتىك قارجى ۇيىمدارىنا قاتىستى 224 شارا قولدانىپ، شامامەن 189،9 ملن تەڭگە سوماسىنا 159 اكىمشىلىك جازا شىعاردى.
ونىڭ ايتۋىنشا، قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ ماقساتىندا 2021 جىلعى 1 قازاننان باستاپ كرەديتتىك ۇيىمداردىڭ تولەمگە قابىلەتسىز قارىز الۋشى – جەكە تۇلعالاردىڭ بەرەشەگىن رەتتەۋدىڭ ءبىرىڭعاي زاڭنامالىق ءتارتىبى قولدانىلادى.
ساراپشى قارىزدار مەن ميكروكرەديتتەر بويىنشا مەرزىمى وتكەن جاعدايدا قارىز الۋشىلارعا نە ىستەۋ كەرەكتىگىن ەگجەي-تەگجەيلى ايتىپ بەردى.
2021 جىلعى 1 قازاننان باستاپ قازاقستاندا كرەديتتى وتەۋدە قيىندىقتارعا تاپ بولعان ازاماتتاردىڭ پروبلەمالىق بەرەشەگىن رەتتەۋ ءتارتىبى قولدانىلادى. بانكتەر مەن ميكروقارجى ۇيىمدارى (مقۇ) ونى ورىنداۋعا جانە بورىشكەرلەردىڭ قارىزدارى مەن ميكروكرەديتتەرىن قايتا قۇرىلىمداۋعا وتىنىشتەرىن قاراۋعا مىندەتتى.
«2022 جىلى كرەديتتىك ۇيىمدار قارىز الۋشىلاردىڭ 708،7 مىڭ ءوتىنىشىن قارادى، ولاردىڭ 74،5% -ىندا - 527،8 مىڭ قارىز الۋشىدپ قايتا قۇرىلىمداۋ ماقۇلداندى»، - دەپ ناقتىلادى ساراپشى.
سونداي-اق، قارجى نارىعىن رەتتەۋ جانە دامىتۋ اگەنتتىگىنىڭ تالابى بويىنشا كرەديتتىك ۇيىمدار قارىزدار مەن ميكروكرەديتتەر بويىنشا مەرزىمى وتكەن بەرەشەكتى رەتتەۋدىڭ مىندەتتى ءتارتىبىن ەسكەرەتىن ىشكى نورماتيۆتىك قۇجاتتاردى وزەكتەندىرگەنىن ايتتى. رەسمي ينتەرنەت-رەسۋرستاردا، الەۋمەتتىك جەلىلەردە جانە ءموبيلدى قوسىمشالاردا بانكتەر مەن مقۇ مەرزىمى وتكەن بەرەشەكتى رەتتەۋ تەتىگى تۋرالى اقپاراتتى ورنالاستىرادى، سونداي-اق كرەديتتەردى قايتا قۇرىلىمداۋ ماسەلەلەرى بويىنشا قارىز الۋشىلارعا كەڭەس بەرۋ ءۇشىن قوسىمشا جەدەل جەلىلەردى اشادى.