كرەاتيۆتى يندۋستريانىڭ بولاشاعى جارقىن
الماتى قالاسىنىڭ اكىمى باقىتجان ساعىنتايەۆتىڭ 25 ماۋسىمداعى تىكەلەي ەفيردە وتكەن بريفينگىنە قالا تۇرعىندارى پىكىر ءبىلدىرىپ جاتىر. سولاردىڭ ءبىرى بەكنۇر دوسجان كيسيكوۆ، جازۋشى، قالالىق قوعامدىق كەڭەس مۇشەسى، ەۋرازيالىق فرانچايزينگ قاۋىمداستىعى ءتوراعاسى، دەپ حابارلادى Almaty-akshamy.kz.
«شاھار باسشىسىنىڭ بارلىق ءسوزى ورىندى. دەسە دە، وسى تۇستا ماعان ەرەكشە اسەر ەتكەنى كرەاتيۆتى يندۋسترياعا قاتىستى ايتقان ويى.
«كرەاتيۆتى يندۋستريا» تەرمينى ءار ءتۇرلى سالالارمەن بايلانىستى: ەكونوميكالىق سالادان الەۋمەتتىك مادەني سالالارعا دەيىن قامتيدى. ول شىعارماشىلىق قىزمەتتىڭ ءار ءتۇرلى سالالارىندا يننوۆاسيالىق تەحنولوگيالاردىڭ ەلەۋلى ورنى: ويىنداردى ازىرلەگەن كەزدە، باعدارلامالىق ونىمدەردىڭ ءار تۇرىندە، ۆيرتۋالدى نەمەسە تولىقتىرىلعان شىڭدىق ونىمدەرىندە، مۋزىكا، ونەر، جارناما، ساۋلەت، كينەماتوگرافيا، انيماسيا، ديزاين جانە شىعارماشىلىق قىزمەتپەن تىكەلەي نەمەسە جاناما تۇردە بايلانىستى باسقا دا سالالار.
بۇگىندە، راسىمەن قالامىز كرەاتيۆتى تۇرعىدان جاقسى دامىپ كەلەدى. ماسەلەن «الاتاۋ» كرەاتيۆتى حابى» بار. مۇنداي ورتالىقتار، باستامالار، اسىرەسە قازىرگى جاعدايدا كاسىپكەرلەرگە ۇلكەن كومەك بەرەدى. كەلەشەكتە قالادا كرەتيۆتى يندۋستريا جاقسى داميدى دەگەن ويدامىن.
فرانچايزينگ قاۋىمداستىعىنىڭ وكىلى رەتىندە، قالا اۋماعىندا كاسىپكەرلەرگە جاسالاتىن جاعدايدى دۇرىس دەپ ويلايمىن. ءبىزدىڭ ەلىمىزدە بيزنەستىڭ 90 پايىزى داعدارىسقا دەيىنگى كەزەڭگە بەيىمدەلگەن. ياعني بارلىعى تۇراقتى تابىستىڭ بولۋىنا ۇيرەنىپ قالعان. ال داعدارىس كەزىندە كاسىپ جۇرگىزۋدىڭ ءادىسى وزگەردى. بۇرىنعىداي مول تابىس تۇسپەگەنىمەن، اۋپىرىمدەپ ءومىر سۇرۋگە بولادى. كاسىپكەرلەردىڭ دەنى بولاشاقتا تابىس تابۋ ءۇشىن قىزمەتىن جالعاستىرا بەرۋگە ۇمتىلادى. اشىعىن ايتۋ كەرەك، ءبىزدىڭ كاسىپكەرلەر مۇنداي جاعدايعا ءالى بەيىمدەلمەگەن. دەسەك تە، وسىنىڭ ءوزى ەلىمىزدە، شاھاردا نارىقتىڭ قارقىندى جۇمىس ىستەپ تۇرعانىن كورسەتەدى. بۇل – جۇمىس ىستەگىسى كەلمەيتىندەر كەتەدى، ولاردىڭ ورنىن باسقالار باسادى دەگەن ءسوز. شاھاردا ءبىرشاما بيزنەس تۇرلەرىنىڭ قىزمەتى توقتايدى. ەسەسىنە جاڭا كاسىپ تۇرلەرى مەن كاسىپكەرلەر پايدا بولادى. ەڭ مىقتى برەندتەر عانا ءوزىن-وزى ساقتاپ قالادى. الداعى ۋاقىتتا نارىقتا دەموكراتيالىق قۇندىلىقتارعا بەيىمدەلگەن بيزنەس تۇرلەرى عانا داميدى. كاسىپكەرلەر از اينالىمنان كوپ پايدا تاۋىپ ۇيرەنگەن. ەندىگى جەردە بيزنەستى دامىتۋدىڭ الەمدىك ۇلگىسىمەن جۇرۋگە تۋرا كەلەدى. ياعني اينالىم كوپ، پايدا از بولادى. بۇل – تۇتىنۋشىلار ءۇشىن ءتيىمدى. شاھاردا پاندەميا كەزىندە كاسىبى تۇرالاپ قالعان كاسىپكەرلەرگە جاڭا جۇمىس ورىندارى اشىلاتىنى ايتىلدى. مۇنىڭ ءوزى قالا باسشىسى تاراپىنان ۇسىنىلعان جاقسى مۇمكىندىك»، - دەدى بەكنۇر دوسجان كيسيكوۆ.