جوندەۋ جۇمىستارى ءساتتى اياقتالىپ، بۇگىندە بارلىق شەكتەۋلەر الىنىپ تاستالدى
ق ر پرەمەر-مينيسترى ءاليحان سمايىلوۆ پەن كقك باس ديرەكتورى نيكولاي گوربان كاسپيي قۇبىر كونسورسيۋمىنىڭ تۇراقتى جۇمىسىن قامتاماسىز ەتۋ جانە دامىتۋ ماسەلەلەرىن تالقىلادى، دەپ حابارلايدى Almaty-akshamy.kz.
پرەمەر-مينيستردىڭ نازارىنا كومپانيانىڭ 2022 جىلعى وندىرىستىك قىزمەتىنىڭ قورىتىندىلارى، اعىمداعى جۇمىسى جانە الداعى كەزەڭگە ارنالعان جوسپارلارى تۋرالى اقپارات ۇسىنىلدى.
ءاليحان سمايىلوۆ كقك قازاقستاننىڭ مۇناي ونەركاسىبىندە ماڭىزدى ءرول اتقاراتىندىقتان، ونىڭ تۇراقتى جۇمىسى ۇكىمەتتىڭ ۇدايى نازارىندا ەكەنىن اتاپ ءوتتى.
«وتكەن جىلى تەڭىز تەرمينالىندا ايلاق قۇرىلعىلارىنىڭ بۇزىلۋىنا بايلانىستى كقك قىزمەتىندە شەكتەۋلەر ورىن الدى. جوندەۋ جۇمىستارى ءساتتى اياقتالىپ، بۇگىندە بارلىق شەكتەۋلەر الىنىپ تاستالدى. سونىمەن قاتار الداعى ۋاقىتتا مۇنداي جاعدايلارعا جول بەرمەۋ ءۇشىن بارلىق ءتيىستى شارالاردى قابىلداۋ قاجەت»، — دەدى ءاليحان سمايىلوۆ.
ۇكىمەت باسشىسىنىڭ پىكىرىنشە، قۇبىردىڭ وتكىزۋ قابىلەتىن ارتتىرۋ – ماڭىزدى ماسەلە، بۇل قازاقستاننان مۇنايدىڭ قوسىمشا كولەمىن تاسىمالداۋدى قامتاماسىز ەتۋگە مۇمكىندىك بەرەدى.
ءوز كەزەگىندە نيكولاي گوربان كقك مۇناي قۇبىرىنىڭ تۇراقتى جۇمىسىن قامتاماسىز ەتۋ جانە قولدانىستاعى جابدىقتاردىڭ سەنىمدىلىگىن ارتتىرۋ ءۇشىن بارلىق قاجەتتى شارالار ىسكە اسىرىلاتىنىن اتاپ ءوتتى. سونىمەن قاتار تار جەرلەردى جويۋ باعدارلاماسىن تابىستى ىسكە اسىرۋ ناتيجەسىندە 2022 جىلدىڭ سوڭىندا قۇبىر جۇيەسىنىڭ وتكىزۋ قابىلەتى قازاقستان اۋماعىنان جىلىنا شامامەن 72،5 ملن تونناعا دەيىن مۇناي تاسىمالداۋعا مۇمكىندىك بەردى.
كەزدەسۋ قورىتىندىسى بويىنشا ءاليحان سمايىلوۆ ق ر ۇكىمەتى بارلىق ماسەلەلەردى ودان ءارى پىسىقتاۋعا دايىن ەكەنىن اتاپ ءوتتى.