مۇناي تاسىمالداۋدىڭ ەڭ ءتيىمدى باعىتى.
ق ر ەنەرگەتيكا ءمينيسترى بولات اقشولاقوۆ 15 قازانعا دەيىن كاسپيي قۇبىر كونسورسيۋمى (كقك) ەكى جىلجىمالى ايلاق قۇرىلعىسىن ىسكە قوسۋدى جوسپارلاپ وتىرعانىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كاسپيي قۇبىر كونسورسيۋمىنا (كقك) كەلەتىن بولساق، قالقىمالى سيستەرنالاردى اۋىستىرۋى ءتيىس مەردىگەرلەرمەن ماسەلەلەر شەشىلدى. ءبىرىنشى قاشىقتان بايلاۋ قۇرىلعىسى شامامەن 10 قازاندا اۋىستىرىلادى. ەكىنشىسى 15 قازانعا دەيىن، ياعني ءۇش قاشىقتان بايلاۋ قوندىرىعىسى تولىق ىسكە قوسىلۋى ءتيىس»، - دەدى بولات اقشولاقوۆ.
مينيستر كقك قازاقستاندىق مۇناي تاسىمالداۋدىڭ ەڭ ءتيىمدى باعىتى ەكەنىن ايتتى. ونىڭ پىكىرىنشە، باسقا جولدار قاراجات جاعىنان ءتيىمدى ەمەس، ءبىراق ءبارىبىر مۇنايدى ەكسپورتتاۋعا مۇمكىندىك بەرەدى. بولات اقشولاقوۆ «قاشاعانداعى» جوندەۋ جۇمىستارىنا قاتىستى ساۋالعا دا جاۋاپ بەردى.
«قاشاعانداعى جوندەۋ جۇمىستارىنىڭ بىرنەشە شەشىمى بار. قازان ايىنىڭ 20-نا قاراي كەن ورنى بۇرىنعى ءوندىرۋ رەجيمىنە – تاۋلىگىنە 400 مىڭ باررەل وندىرۋگە ورالادى. ەگەر 15-20 قازانعا دەيىن كاسپيي قۇبىر كونسورسيۋمى مەن «قاشاعان» جۇمىسىن باستاسا، وندا مۇلدە پروبلەما جوق»، - دەدى بولات اقشولاقوۆ.
ايتۋىنشا، ءىرى كەن ورنىنداعى جوندەۋ جۇمىستارىنا بايلانىستى تاۋلىگىنە 200 مىڭ باررەل شىعىن كەلگەن.
بۇعان دەيىن مينيستر «KIOGE-2022» حالىقارالىق مۇناي جانە گاز كورمە-كونفەرەنسياسى بارىسىندا ەلىمىزدىڭ ەنەرگەتيكا سالاسىن دامىتۋدىڭ باسىم باعىتتارىنىڭ ءبىرى مۇناي-گاز-حيميا سالاسى ەكەنىن ايتتى.
ەسكە سالساق، ماۋسىم ايىندا كاسپيي قۇبىر كونسورسيۋمىنىڭ مۇناي تاسىمالدايتىن 2 قۇرىلعىسى جۇمىسىن ۋاقىتشا توقتاتقان بولاتىن.