كوزدىڭ ناشار كورۋىنە تەك گادجەتتەر عانا كىنالى مە؟
ءقازىر كوپشىلىكتىڭ اراسىندا زاماناۋي گاجدەتتەر كوزدىڭ ناشارلاۋىنا سەبەپ بولادى دەگەن پىكىر تاراعان. وفتالمولوگ دارىگەرلەردىڭ ايتۋىنشا، كوزدىڭ «قىراعىلىعىن» تومەندەتەتىن گادجەتتەن باسقا دا سەبەپتەر بار ەكەن.
- قان تامىرلارى اۋرۋى
ارتىق سالماق، تۇقىم قۋالاۋشىلىق، جامان ادەتتەر (نيكوتين جانە الكوگول) سياقتى فاكتورلار جالپى قانتامىرلار جۇيەسىنە اسەر ەتەدى جانە كورۋ قابىلەتىنىڭ بۇزىلۋ ءقاۋپىن ارتتىرۋى مۇمكىن.
مىسالى، گيپەرتونيا ارتەريالار مەن تامىرلارعا، سونىڭ ىشىندە كورۋ ورگانىنداعى تامىرعا زاقىم كەلتىرۋى مۇمكىن. مۇنداي ماسەلەنىڭ بارى كوز ءتۇبىن زەرتتەۋ كەزىندە انىقتالادى.
- ينفەكسيالاردان تۋىنداعان اۋرۋلار
جۇقپالى اۋرۋلار، مىسالى:
گەرپەس؛
پارازيتتىك ينفەكسيالار (توكسپولازموز، ديروفيلياريا، تريحينوز جانە ت.ب.)؛
مەرەز؛
تۋبەركۋلەز؛
اقتق ينفەكسياسى جانە ت.ب.
ينفەكسيالاردىڭ سيمپتومدارى ءار كەزدە ءار ءتۇرلى بولادى، كەيدە ناۋقاس اۋىرىپ تۇرعانىن بىلمەي قالادى دا دياگنوز كەزدەيسوق قويىلادى. ال اۋرۋىنا شاعىمدانعان ادامدار كوزدىڭ قىزارۋى، كورۋ فۋنكسيالارىنىڭ ايتارلىقتاي تومەندەۋى جانە كوزدىڭ قىشۋى دەگەن بەلگىلەردى اتايدى. كەز كەلگەن جاعدايدا وفتالمولوگتىڭ كەڭەسى قاجەت، ويتكەنى كەز كەلگەن ينفەكسيانىڭ اقىرى اۋىر زارداپتارعا اكەلۋى مۇمكىن.
- قانت ديابەتى
بۇل كورۋ ورگانىن ءبىرىنشى زاقىمدايتىن اۋرۋ، كوبىنەسە وفتالمولوگ قانت ديابەتىنىڭ بار ەكەنىن انىقتايدى، ال پاسيەنتتىڭ ءوزى ول تۋرالى ءالى بىلمەۋى دە مۇمكىن. ديابەتتىك رەتينوپاتيا (كوز تورلى قابىعىنىڭ زاقىمدالۋى) كوز ءتۇبىن تەكسەرۋ كەزىندە انىقتالادى. قانت ديابەتىنە شالدىققان كەزدە كوزدىڭ تورلى قابىعى مەن قان تامىرلارى زاقىمدانادى. قانت ديابەتىنىڭ كەسىرىنەن تورلى قابىق ءىسىنىپ، قاتپارلانىپ، كوزدى شەل باسىپ، سوڭى سۋ قاراڭعىلىققا سوقتىرۋى ىقتيمال. مۇنداي جاعدايدا ەندوكرينولوگ پەن وفتالمولوگتىڭ تۇراقتى باقىلاۋى قاجەت. دەگەنمەن، قانت ديابەتىمەن اۋىراتىنداردىڭ بارلىعىندا بىردەي كورۋ ورگانىن زاقىمدانا بەرمەيتىنىن ەسكەرگەن ءجون.
- اۋتويممۋندى پاتولوگيا
ناۋقاستىڭ يممۋندىق جۇيەسىندەگى «قاتەلىكتەن» تۋىنداعان اۋرۋلاردىڭ كەسىرىنەن ساۋ جاسۋشالارعا زاقىم كەلەدى. دەنەنىڭ مۇشەلەرى مەن تىندەرى، سونىڭ ىشىندە كوز دە اۋتويممۋندى اۋرۋدان زارداپ شەگەدى. ونداي اۋرۋلارعا مىنالار جاتادى:
پسوريازدى ارتريت؛
ريەۆماتويدتى ارتريت؛
شەگرەن سيندرومى جانە ت.ب.
شاشىراڭقى سكلەروز دا كوز اۋرۋىن تۋدىرۋى مۇمكىن. بۇل جاعدايدا كوز قوزعالتقاندا اۋىرسىنادى، كورۋ قابىلەتى ۋاقىتشا تومەندەيدى.
- نيەۆرولوگيالىق اۋرۋلار
ادام اعزاسىنىڭ ءبارى بىر-بىرىمەن بايلانىستى. كوز بەن ميدىڭ بايلانىسى اسىرەسە جاقىن. سوندىقتان ءبىرقاتار نيەۆرولوگيالىق اۋرۋلار كوز بۇلشىقەتتەرىنىڭ قوزعالماي قالۋى، قوسارلانۋ، باسىر سياقتى كورۋ قىزمەتىنە ءجيى اسەر ەتەدى. بۇل اۋرۋلاردىڭ كەسىرىنەن مي قۇرىلىمدارىنىڭ زاقىمدالۋىن بولدىرماۋ ءۇشىن نيەۆروپاتولوگپەن كەڭەسۋدى كەيىنگە قالدىرماۋ كەرەك.