Almaty-akshamy.kz سايتىنىڭ بۇگىنگى جاڭالىقتارىنا شولۋ – كۇن كەرۋەنى
تايلاندقا بارما!
ءسىبىر جاراسىن جۇقتىرۋ ءقاۋپى بار. تۋريزم جانە سپورت مينيسترلىگى تايلاندقا باراتىن قازاقستاندىقتارعا ەسكەرتۋ جاسادى.
«اشىق دەرەككوزدەرگە سايكەس، تايلاندتىڭ بۋريرام پروۆينسياسى جاقىن ماڭداعى لاوستا ءۇش جاعداي انىقتالعاننان كەيىن، اۋىر باكتەريالىق اۋرۋ بولىپ تابىلاتىن ءسىبىر جاراسىنىڭ ءقاۋپى بارى تۋرالى ەسكەرتۋ جاسادى. ءسىبىر جاراسى جانۋارلاردان ادامعا، مىسالى، ءىرى قارا مەن بۋيۆولدىڭ شيكى ەتىن جەۋ ارقىلى جۇعۋى مۇمكىن»، دەلىنگەن تۋريزم جانە سپورت مينيسترلىگىنىڭ حابارلاماسىندا.
گۇلدەنسە اۋىل...
بيىل اۋىلداردىڭ ينفراقۇرىلىمىن دامىتۋعا 900 ملرد تەڭگە ءبولىندى.
«اۋىل – ەل بەسىگى» باعدارلاماسىن ىسكە اسىرۋ اۋىلدىق جەرلەرگە جەكە ينۆەستيسيالار تارتۋعا وڭ اسەرىن تيگىزۋدە. مينيسترلىك تاراپىنان 2023 جىلى بيۋدجەت قاراجاتى شىعىستارىنىڭ تيىمدىلىگىنە تالداۋ جۇرگىزىلدى. مىسال رەتىندە، تۇركىستان وبلىسىنىڭ تولە بي اۋدانىنىڭ 16 اۋىلى 3،5 ملرد تەڭگەگە بيۋدجەتتەن قارجىلاندىرىلدى. وسى اۋىلداردا 21،2 ملرد تەڭگەگە 40 جوبانى ىسكە اسىرۋعا جەكە ينۆەستيسيا تارتىلدى. وسىلايشا، 1 بيۋدجەتتىك تەڭگەگە 6 جەكە ينۆەستيسيا تەڭگەسى تيەسىلى ەكەنىن كورىپ وتىرمىز. ال اقمولا وبلىسىنىڭ جاقسى اۋدانىنىڭ 6 اۋىلىنا 1 بيۋدجەتتىك تەڭگەگە 3 جەكە ينۆەستيسيا تەڭگەسى تارتىلدى»، دەدى پرەمەر-مينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ.
قار جاۋماي قالسا، قايتەمىز؟
پارلامەنتتە جاڭا سۋ كودەكسىن تانىستىرعان سۋ رەسۋرستارى جانە يرريگاسيا ءبىرىنشى ۆيسە-مينيسترى بولات بەكنيازدىڭ ايتۋىنشا، الداعى بىرنەشە جىل ەلىمىز قار مەن جاڭبىر سۋىن پايداعا اسىرماق. 2030 جىلعا قاراي وندىرىستىك كاسىپورىندار پايدالاناتىن سۋلارىنىڭ تەڭ جارتىسىن اعىن سۋلاردان الۋى ءتيىس.
قايتقان جەردىڭ قايىرى بار ما؟
الماتى پروكۋرورلارى 960 گەكتار جەردى ۇلتتىق بانككە قايتارىپ بەردى. قالا پروكۋراتۋراسى سوت اكتىلەرى مەن سوت ۇكىمدەرىن تالداۋدىڭ نەگىزىندە «Capital Bank Kazakhstan» اق مەن «AsiaCreditBank» اق تاراتىلعان بانكتەردىڭ جالعىز اكسيونەرى بولىپ تابىلاتىن بورىشكەردىڭ (ش. جاۋاپ بەرۋشىنىڭ) اكتيۆتەرى شىعارىلعانىن انىقتادى. الماتى قالاسى پروكۋراتۋراسىنىڭ مالىمەتىنشە، جاۋاپ بەرۋشىنىڭ قارىزى 15 ملرد-تان استام تەڭگەنى قۇرادى.
كوزدەن كەتسە دە، كوڭىلدەن كەتپەگەن...
ەلدى 30 جىلداي باسقارعان تۇڭعىش پرەزيدەنت نۇرسۇلتان نازاربايەۆ 2019 جىلى 19 ناۋرىز كۇنى پرەزيدەنتى رەتىندەگى وكىلەتتىگىن توقتاتقان ەدى. وسىدان بەس جىل بۇرىن ءدال وسى كۇنى سول كەزدەگى مەملەكەت باسشىسى نۇرسۇلتان نازاربايەۆتىڭ قازاقستان حالقىنا ۇندەۋ جولداپ، پرەزيدەنتتىكتەن كەتەتىنىن مالىمدەگەن بولاتىن.
ناۋرىز-كەرۋەن
الماتى كوشەلەرىمەن «كوش. ناۋرىز –دۋمان» مەرەكەلىك كەرۋەنى ءجۇرىپ وتەدى. 21 ناۋرىزداعى تەاترلاندىرىلعان كەرۋەنگە باتىر، بۇركىتشى، اقىن جانە باسقا دا وبرازداعى 1000-نان استام ادام قاتىسادى. سونىمەن قاتار، قالا تۇرعىندارى مەن قوناقتارى ارباداعى كيىز ءۇيدى، قىز كۇيمەسىن، قورجىنعا جىبەك ماتالار مەن كىلەمدەر ارتقان تۇيەلەردى، ات ۇستىندەگى باتىرلاردى، قۇماي تازىلار مەن مەرگەنشىلەردى، جالپى جەتى قازىنا نىشاندارىن كورە الادى.
«اتادان مال قالعانشا، تال قالسىن!»
وسى ءتامسىلدى ۇستانعان المالى اۋدانىنىڭ ارداگەرلەر وداعى مەن المالى اۋدانىنىڭ بەلسەندى ۇزاق ءومىر ورتالىعىنىڭ اقساقالدارى قازاقستان-بريتان تەحنيكالىق ۋنيۆەرسيتەتىنىڭ جانىنا اعاش ەكتى.
7% كىمدى جارىلقايدى؟
ەلىمىزدە جاڭا يپوتەكا ىسكە قوسىلماق. ۇكىمەت جاڭا يپوتەكانى ءساۋىردىڭ سوڭىندا، مامىردىڭ باسىندا ىسكە قوسپاقشى. ازىرشە باعدارلامانىڭ بۇگە-شىگەسى ايقىندالعان جوق. ءبىر انىعى: 7%-دىق مولشەرلەمە تۇرمىسى تومەن وتباسىلارعا ارنالعان: مۇنداي ساناتقا كوپبالالى وتباسىلار، جەتىم بالالار، مۇمكىندىگى شەكتەۋلى تۇلعالار جانە ت.ب. قالعان جۇرتقا – 9%-دىق مولشەرلەمە بەلگىلەنەدى.