كوۆيدتەن كەيىنگى ءبىلىم بەرۋ جۇيەسىن جەتىلدىرۋ جولدارى دۇنيەجۇزىلىك ءبىلىم فورۋمىندا كوتەرىلدى

لوندوندا دۇنيەجۇزىلىك ءبىلىم فورۋمى ءوتىپ جاتىر

«پاندەميا كەزىندە مەكتەپتەردى جاپقانىمىز دۇرىس بولمادى». لوندوندا وتكەن بۇكىلالەمدىك ءبىلىم فورۋمىندا ءسوز العان ساراپشىلار وسىنداي تۇجىرىم جاسادى، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ. 

ۇلىبريتانيا ۇكىمەتىنىڭ قولداۋىمەن ۇيىمداستىرىلعان جيىنعا قازاقستاندىق دەلەگاسيا دا قاتىسىپ، كوۆيدتەن كەيىنگى ءبىلىم بەرۋ جۇيەسىن جەتىلدىرۋ جولدارىن تالقىلاۋدا. الەمنىڭ 115 ەلىنەن  جينالعان ساراپشىلار ءبىلىم بەرۋ ساپاسى مەن ينكليۋزيۆتىگىن ارتتىرۋ بويىنشا جاڭا ۇسىنىستارىمەن بولىسۋدە.

"بۇل - ءبىلىم سالاسىنىڭ ءبىرىنشى باسشىلارىمەن تاجىريبە الماسىپ، بايلانىستار ورناتۋدىڭ بىردەن-بىر مۇمكىندىگى. ماڭىزدىسى - بىر-بىرىمىزدەن ۇيرەنىپ، جەتىستىكتەرىمىزدى سالىستىرۋعا جاعداي جاسالىپ وتىر. بۇل باسقوسۋ، اسىرەسە، كوۆيدتەن كەيىن وتە ەرەكشە مانگە يە بولىپ تۇر. ويتكەنى پاندەميا كەزىندە كوپتەگەن مەملەكەتتەردىڭ ءبىلىم جۇيەسىنىڭ ساپاسى تومەندەپ كەتكەنى راس"، - دەيدى  بريتان كەڭەسىنىڭ قازاقستان جانە ورتالىق ازيا بويىنشا ديرەكتورى ەريك لوري.

"قازاقستان پاندەميا كەزىندەگى ءبىلىم ساپاسىنىڭ دەڭگەيىنە يۋنيسەف-پەن بىرگە تالداۋ جاسادى. ازىرگە ونىڭ قورىتىندىسى ءازىر ەمەس. الايدا العاشقى ناتيجەلەرى كوڭىل كونشىتپەيدى"، - دەيدى ساراپشى.

"مۇعالىمدەردەن ساۋالناما الىپ باستادىق. سول ساۋالنامالاردىڭ العاشقى ناتيجەلەرىنە قاراساق، مۇعالىمدەر پاندەميا كەزىندە بالالاردىڭ ءبىلىم ساپاسى تومەندەدى دەگەن جاۋاپتاردى بىزگە بەرىپ جاتىر. ەكىنشى باعىت وقۋشىلاردىڭ ناقتى وقۋ جىلى كەزىندە العان باعالارىن پاندەمياعا دەيىن، پاندەميا كەزىندە جانە پاندەميادان كەيىن، وسى ءۇش ۋاقىتتا الىپ سالىستىرىپ، جاقىن ارادا الاتىن بولامىز"، - دەيدى  «اقپاراتتىق-تالداۋ ورتالىعى» اق باسقارما ءتوراعاسىنىڭ مىندەتىن اتقارۋشى ماعجان امانعازى.