ۆيرۋس انا سۇتىندە كەزدەسپەيدى.
انالار بالا ەمىزۋدى COVID-19-بەن اۋىرعان كەزدە دە، ۆاكسينادان كەيىن دە جالعاستىرا الادى. دۇنيەجۇزىلىك دەنساۋلىق ساقتاۋ ۇيىمىنىڭ ماماندارى وسىنداي مالىمدەمە جاسادى، دەپ حابارلايدى Almaty-akshamy.kz
زەرتتەۋلەرگە سايكەس، بۇل اۋرۋدى تۋدىراتىن SARS-CoV-2 ۆيرۋسى انا سۇتىندە تابىلعان جوق. سونىمەن قاتار، انانىڭ العان ۆاكسيناسى بالاعا ءقاۋىپ توندىرمەيدى.
ددۇ ساراپشىلارىنىڭ ايتۋىنشا، يممۋنيزاسيادان كەيىن انا سۇتىنەن كوروناۆيرۋسقا قارسى انتيدەنەلەر تابىلعان، ول بالانى اۋرۋدان قورعاي الادى.
«ءۇش بالاسىن دا ەمىزىپ وسىرگەن انا رەتىندە مەن ەمشەك ءسۇتى نارەستە ءۇشىن ەڭ جاقسى تاماقتانۋ كوزى ەكەنىن بىلەمىن، ءتىپتى اناسىنىڭ COVID-19 جۇقتىرعانى راستالسا دا. ەگەر اۋرۋ جۇقتىرعان انا ءتيىستى ساقتىق شارالارىن قولدانسا، ول بالاسىن ەمىزۋىنە بولادى»، - دەپ بۇۇ جاڭالىقتارىنىڭ باسپا ءسوز قىزمەتى ددۇ ەۋروپالىق ايماقتىق كەڭسەسىنىڭ ەلدىك ستراتەگيالار مەن دەنساۋلىق ساقتاۋ جۇيەسى ءبولىمىنىڭ ديرەكتورى ناتاشا اززوپاردي-مۋسكاتقا سىلتەمە جاساپ حابارلادى.
ماماندار ەمشەك ءسۇتىنىڭ قۇرىلىمى تۋرالى دا ايتتى.
«ەمشەك سۇتىندە نارەستەنى تىنىس الۋ جولدارىنىڭ اۋرۋلارىنان قورعايتىن انتيدەنەلەر مەن باسقا يممۋنولوگيالىق ەلەمەنتتەر بار. بالانىڭ ءوسۋى، دامۋى مەن دەنساۋلىعى ءۇشىن ەمشەك ءسۇتىنىڭ ماڭىزدىلىعىن راستايتىن كوپتەگەن دالەلدەر بار، سونىمەن قاتار ول ءومىردىڭ سوڭىنا دەيىن سەمىزدىك پەن جۇقپالى ەمەس اۋرۋلاردىڭ الدىن الۋعا كومەكتەسەدى»، - دەپ قوستى ول.
ددۇ ساراپشىلارى COVID-19 جۇقتىرعان ەمىزەتىن انالارعا تاماقتاندىرۋ كەزىندە ماسكا كيۋدى، نارەستەگە جاقىنداماس بۇرىن قولىن سابىنمەن مۇقيات جۋۋدى جانە قولدانىستاعى زاتتاردى دەزينفەكسيالاۋدى ۇسىنادى.
الەم بويىنشا بالانى ەمشەك سۇتىمەن قورەكتەندىرۋ دۇنيەجۇزىلىك دەنساۋلىق ساقتاۋ ۇيىمىنىڭ پوستكەڭەستىك ەلدەردى قامتيتىن ەۋروپالىق ايماعىندا ەڭ تومەنگى كورسەتكىشكە يە. ەۋروپاداعى نارەستەلەردىڭ تەك 13% -ى عانا ءومىرىنىڭ العاشقى التى ايىندا تەك ەمشەك ءسۇتىن ەمە الادى.