توتەنشە جاعدايلار ءمينيسترى سىرىم ءشارىپحانوۆ «كوستەنكو» شاحتاسىنداعى جاعداي تۋرالى باياندادى
31 قازاندا ق ر پرەمەر-مينيسترى ءاليحان سمايلوۆتىڭ توراعالىعىمەن وتكەن ۇكىمەت وتىرىسىندا توتەنشە جاعدايلار ءمينيسترى سىرىم ءشارىپحانوۆ كوستەنكو اتىنداعى شاحتاداعى جاعداي تۋرالى باياندادى، دەپ حابارلايدى Almaty-akshamy.kz توتەنشە جاعدايلار مينيسترلىگىنە سىلتەمە جاساپ.
بۇگىنگى كۇنى ىزدەستىرۋ-قۇتقارۋ جۇمىستارى بارىسىندا 45 كەنشىنىڭ دەنەسى جانە الدىن-الا بولجام بويىنشا 46-شى قازا تاپقان ادامنىڭ دەنە بولشەكتەرى تابىلدى.
قايتىس بولعان 40 ادامنىڭ جەكە باسى انىقتالدى، 6-ۋى انىقتالمادى. ولاردى سايكەستەندىرۋ ءۇشىن ءتيىستى ساراپتامالار جۇرگىزىلەدى.
ىزدەۋ جۇمىستارى ەلەكتر ەنەرگياسىنىڭ بولماۋىمەن، تاۋ-كەن قازبالارىنىڭ ۇزىندىعىمەن، كوپتەگەن بۇزىلعان مەحانيزمدەردىڭ بولۋىمەن قيىندادى. سۋ باسقان جەكەلەگەن تاۋ-كەن قازبالارىندا جۇمىس جاساۋ قيىنعا ءتۇستى.
قازىرگى ۋاقىتتا اشىق جانۋ وشاقتارى جوق، گاز جاعدايى قالىپتى. شاحتانىڭ قىزمەتىن قالپىنا كەلتىرۋ ءۇشىن تاۋ-كەن قازبالارىن زەرتتەۋ جانە جەكەلەگەن ۋچاسكەلەردە سۋ سورۋ جۇمىستارى جۇرگىزىلۋدە.
«اۆاريانىڭ سەبەپتەرىن تەرگەپ-تەكسەرۋ شەڭبەرىندە ۇكىمەتتىك كوميسسيا مۇشەلەرىمەن بىرگە شاحتاعا ءتۇستىم. ءبىز وتە ماڭىزدى بۇزىلۋلاردى انىقتادىق. تاۋ-كەن قازبالارىندا شاحتا جابدىقتارى جىلجىپ كەتكەن. 15-تەن استام وقشاۋلاعىش بوگەتتەر مەن جەلدەتۋ قۇرىلىستارى قيراعان»، - دەپ اتاپ ءوتتى مينيستر.
قازىرگى ۋاقىتتا تاعى 7 شاعىن كوميسسيا قۇرىلىپ، جۇمىس ىستەپ جاتىر. سونىمەن قاتار تەرگەۋگە قازاقستاننان جانە شەتەلدەردەن ساراپتامالىق ۇيىمدار تارتىلدى.
ەستەرىڭىزگە سالايىق، اعىمداعى جىلعى 28 قازاندا ساعات 2-دەن 36 مينۋت كەتكەندە «ارسەلورميتتال تەمىرتاۋ» اق كومىر دەپارتامەنتىنىڭ كوستەنكو اتىنداعى شاحتادا تەرەڭدىگى 700 مەتردە جانۋ بولىپ، كەيىننەن مەتان-اۋا قوسپاسىنىڭ جارىلۋى ورىن الدى. بۇل جەرگە دەرەۋ «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» ج ش س قاراعاندى فيليالىنىڭ كۇشتەرى جىبەرىلدى.
اۆاريا كەزىندە اۋىسىمدا 252 كەنشى بولدى، ونىڭ 201ء-ى وزدىگىنەن كوتەرىلىپ، 5ء-ى تاۋ-كەن قۇتقارۋ كۇشتەرىمەن تابىلىپ، جەر بەتىنە شىعارىلدى.
جالپى، 30 قازاننان باستاپ قاراعاندى وبلىسىنىڭ بەس شاحتالارىندا (اباي، ساران، شاحتينسك، كۇزەمبايەۆ جانە لەنين اتىنداعى)ءوندىرۋ پروسەستەرى قايتا جانداندى.
«تەنتەك» شاحتاسىندا تەك دايىندىق جۇمىستارى جۇرگىزىلۋدە.
«قازاقستان» شاحتاسىندا ونىڭ قارقىندى جۇمىس ىستەۋى ءۇشىن بارلىق جۇمىستار قامتاماسىز ەتىلۋدە جانە اەروگاز جاعدايى باقىلاۋدا.